ភ្នំពេញៈ មន្ត្រីក្រសួងយុត្តិធម៌ បានធ្វើការច្រានចោលទៅលើកំណត់ត្រារបស់មជ្ឈមណ្ឌលសិទ្ធិមនុស្សកម្ពុជា CCHR ដែលបានលើកឡើងពីភាពចន្លោះប្រហោងនៃគ្រប់គ្រងស្ថានភាពកុមារក្នុងប្រព័ន្ធយុត្តិធម៌ព្រហ្មទណ្ឌ នៅកម្ពុជាមិនបានល្អ។ អ្នកនាំពាក្យក្រសួងយុត្តិធម៌ លោក គឹម សន្តិភាព បានថ្លែងប្រាប់ឲ្យដឹងនៅរសៀលថ្ងៃទី២៨ ខែតុលានេះថា សព្វថ្ងៃនេះ ក្រសួងយុត្តិធម៌ បានធ្វើការយ៉ាងជិតស្និតជាមួយនឹងអង្គការយូនីសេហ្វ ក្នុងកិច្ចការពារសិទ្ធិកុមារពាក់ព័ន្ធ និងសំណុំរឿងក្តីផ្សេងជាមួយស្ថាប័នជាច្រើនទៀត ដោយបានពង្រឹងលើការយកចិត្តទុកដាក់លើបញ្ហានេះយ៉ាងខ្លាំង។
បើតាមអ្នកនាំពាក្យក្រសួងយុត្តិធម៌ខាងលើនេះ ក៏បានបដិសេធន៍ដែរថា កន្លងមកនេះ មិនមានការឃុំខ្លួនអនិតិជនដោយដាក់ឲ្យនៅជាមួយមនុស្សពេញវ័យទេ ដូច្នេះលោកសូមអំពាវនាវឲ្យបណ្តាអង្គការសង្គមស៊ីវិលទាំងអស់ មេត្តាចុះទៅត្រួតពិនិត្យស្ថានភាពកុមារនៅតាមពន្ធនាគារឲ្យបានឃើញជាក់ស្តែង អំពីការរៀបចំទុកដាក់កុមារល្មើសច្បាប់នៅតាមពន្ធនាគារនោះ ម្យ៉ាងក៏ទទួចសុំឲ្យបណ្តាអង្គការសង្គមស៊ីវិល ប្រសិនបើមានចំណុចសង្ស័យ ឬបញ្ហាអ្វីមួយនោះ សូមមេត្តាទាក់ទង និងជម្រាបជូនពីបញ្ហានេះឲ្យអ្នកពាក់ព័ន្ធទាំងអស់បានដឹងផង។
ចំពោះការលើកឡើងរបស់លោក គឹម សន្តិភាព ត្រូវបានធ្វើឡើងបន្ទាប់ពីកំណត់ត្រារបស់មជ្ឈមណ្ឌលសិទ្ធិមនុស្ស (CCHR) ដែលបានចេញផ្សាយ កាលពីថ្ងៃទី២៦ ខែតុលា ឆ្នាំ២០១៤ ពាក់ព័ន្ធទៅនឹងការរិះគន់លើស្ថានភាពកុមារ នៅក្នុងប្រព័ន្ធយុត្តិធម៌ព្រហ្មទណ្ឌកម្ពុជានោះ។
យោងតាមកំណត់ត្រារបស់មជ្ឈមណ្ឌលសិទ្ធិមនុស្សកម្ពុជា(CCHR) ដែលបានរៀបរាប់ដោយសង្ខេបទៅលើការវាយតម្លៃពីស្ថានភាពបច្ចុប្បន្ន នៃប្រព័ន្ធយុត្តិធម៌អនីតិជននៅកម្ពុជា បានសន្និដ្ឋានថា បើទោះជាកម្ពុជា មានក្របខ័ណ្ឌច្បាប់ចែងពីអនីតិជនក្នុងប្រព័ន្ធយុត្តិធម៌ព្រហ្មទណ្ឌក្ដី ប៉ុន្តែនីតិវិធីសម្រាប់អនុវត្តទៅលើអនីតិជននៅតែមានការព្រួយបារម្ភនៅឡើយ ព្រោះអាជ្ញាធរកម្ពុជា ត្រូវផ្ដល់ការយកចិត្តជាពិសេសចំពោះជនសង្ស័យជាអនីតិជន និងកុមារបើទោះបីជាច្បាប់ និងក្រមព្រហ្មទណ្ឌបានចែងអំពីមាត្រាមួយចំនួនយ៉ាងពិសេសពាក់ព័ន្ធនឹងកុមារហើយក៏ដោយ។
ជាមួយគ្នានេះ កំណត់ត្រាសង្ខេបដដែលនេះ បានបញ្ជាក់ដែរថា ចំពោះបទដ្ឋានអន្តរជាតិនានាបានទទួលស្គាល់ថា កុមារជាប់ចោទពីការរំលោភច្បាប់ព្រហ្មទណ្ឌ តម្រូវឲ្យមានការថែទាំ និងផ្ដល់កិច្ចការពារយ៉ាងពិសេស។ លើសពីនេះ ពួកគេមានសិទ្ធិទទួលបានការជំនុំជម្រះដោយយុត្តិធម៌ដូចមនុស្សពេញវ័យ ព្រមទាំងទទួលបានកិច្ចការពារបន្ថែម ដើម្បីឲ្យដឹងថា កុមារខុសពីមនុស្សពេញវ័យ ក្នុងការវិវឌ្ឍន៍ផ្នែករាងកាយ និងសតិស្មារតី។ ហើយខណៈមានការរៀបចំឲ្យមានយុត្តិធម៌ដល់អតិថិជន រដ្ឋត្រូវតែមាននីតិវិធីនានា ដើម្បីធានាថា សិទ្ធិ និងកិច្ចការពារទាំងនេះ ត្រូវបានគេគោរពតាម និងធានាថា ផលប្រយោជន៍របស់កុមារ ត្រូវបានគេគិតគូរនៅគ្រប់ដំណាក់កាលទាំងអស់។
គួរបញ្ជាក់ថា ចំពោះកំណត់ត្រាសង្ខេបដែលកម្រាស់១៤ទំព័រ របស់មជ្ឈមណ្ឌលសិទ្ធិមនុស្សកម្ពុជា ត្រូវបានចេញផ្សាយកាលពីថ្ងៃទី២៦ ខែតុលា កន្លងមក គឺជាទិន្នន័យដែលប្រមូលបានក្នុងអំឡុងពេល នៃការសង្កេតការណ៍សវនាការរយៈពេល៦ឆ្នាំ គឺពីឆ្នាំ២០០៩ ដល់ឆ្នាំ២០១៤៕
