បន្ទាប់​ពី​ស្ថានការណ៍​នយោបាយ​ឡើង​កំដៅ សម្តេច​តេជោ ហ៊ុន​សែន នឹង​បង្ហាញ​មុខ នៅ​ថ្ងៃ​សុក្រ​

ភ្នំពេញ: បន្ទាប់​ពី​ស្ថានការណ៍​នយោបាយ​ឡើង​កំដៅ តាមរយៈ​វិធានការ​របស់​តុលាការ​ចោទប្រកាន់ និង​ចាប់​ដាក់​ពន្ធនាគា​រលើ​បេក្ខជន​ជាប់ឆ្នោត​តំណាងរាស្ត្រ​គណបក្ស​សង្គ្រោះ​ជាតិ ជា​បន្តបន្ទាប់ ចាប់តាំងពី​ថ្ងៃ​ទី​១៥​កក្កដា​រួចមក សម្តេច​នាយករដ្ឋមន្ត្រី ហ៊ុន សែន នឹង​ចូលរួម​ក្នុង​កិច្ចប្រជុំ​ពីរ នៅ​ថ្ងៃ​សុក្រ ទី​១៨ ខែកក្កដា ឆ្នាំ​២០១៤​។​

​តាម​កម្មវិធី នៅ​ពេល​ព្រឹក​ថ្ងៃ​សុក្រ ទី​១៨​កក្កដា សម្តេច​ហ៊ុន​សែន នឹង​អញ្ជើញ​ជា​អធិបតីភាព ក្នុង​កិច្ចប្រជុំ​ពេញអង្គ​គណៈរដ្ឋមន្ត្រី​។ ចំណែក​នៅ​ពេល​រសៀល សម្តេច​ហ៊ុន​សែន និង​សម្តេចកិត្តិព្រឺទ្ធបណ្ឌិត នឹង​អញ្ជើញ​ចូលរួម​ក្នុង​ពិធី​ពិសា​រអាហារ​ស្រាយ​បួស​ខែ​រ៉ា​ម៉ា​ឌន នៃ​សាសនា​ឥស្លាម​កម្ពុជា​។ ពិធី​ជួបជុំ​នោះ ធ្វើឡើង នៅ​មជ្ឈមណ្ឌល​កោះ​ពេជ្រ រាជធានី​ភ្នំពេញ ចាប់ពី​ម៉ោង ៤ និង ៣០ នាទី តទៅ​។​

​ជា​ការកត់សម្គាល់ រាល់​វេទិកា និង​កិច្ច​ជួបជុំ ដែល​សម្តេច​ហ៊ុន​សែន ចូលរួម សម្តេច​នឹង​ថ្លែង​សារ​នយោបាយ​ជាច្រើន​ផងដែរ​៕​