ភ្នំពេញ ៖ កិច្ចជំនួបចរចារវាងថ្នាក់ដឹកនាំទាំង២នៃគណបក្សប្រជាជនកម្ពុជានឹងគណបក្សសង្គ្រោះជាតិបានចាប់ផ្តើមដំណើរការនៅវេលាម៉ោង៩និង៥នាទីព្រឹកថ្ងៃទី២២ ខែកក្កដា ឆ្នាំ២០១៤ នៅវិមានព្រឹទ្ធសភាតាមការគ្រោងទុក ។
ជំនួបថ្នាក់កំពូលនេះផងដែរគេសង្កេតឃើញមានប្រតិភូគណបក្សប្រជាជនកម្ពុជាដឹកនាំដោយសម្តេចអគ្គមហាសេនាបតីតេជោ ហ៊ុន សែន, លោក សាយ ឈុំ, ឧបនាយករដ្ឋមន្ត្រី ស ខេង, លោក ព្រំ សុខា, លោក សក់ សេដ្ឋា, លោក សោម សឿន, លោក ប្រាក់ សុខុន និងលោក កើត រិទ្ធ រួមទាំងថ្នាក់ដឹកនាំមកអមជាមួយរួមមានលោក អូន ព័ន្ធមុនីរ័ត្ន, លោក ជាម យៀប, លោក ឈាង វុន, លោកស្រី ជូ ប៊ុនអេង ។ ដោយឡែកថ្នាក់ដឹកនាំគណបក្សសង្គ្រោះជាតិរួមមាន លោក សម រង្ស៊ី, លោក កឹម សុខា, លោក ប៉ុល ហំម, លោក យឹម សុវណ្ណ, លោក យ៉ែម បុញ្ញឫទ្ធិ, លោក សុន ឆ័យ, លោក គួយ ប៊ុនរឿន និងលោក អេង ឆៃអ៊ាង ។
វត្តមានលោក សម រង្ស៊ី ប្រធានគណបក្សសង្គ្រោះជាតិ និងលោក កឹម សុខា បានដឹកនាំប្រតិភូរបស់ខ្លួនមកកាន់វិមានព្រឹទ្ធសភាដល់វេលាម៉ោង៨និង៥៥នាទីព្រឹក ។ ដោយឡែកវត្តមានរបស់សម្តេចតេជោ ហ៊ុន សែន បានអញ្ជើញមកដល់នៅវេលាម៉ោង៩និង៥នាទីព្រឹក ដែលទិដ្ឋភាពរួមកិច្ចជំនួបចរចារវាងជំនួបកំពូលថ្នាក់ដឹកនាំទាំង២បង្ហាញពីការស្វាគមន៍ប្រកបដោយការចាប់យកនូវភាពទម្លុះទម្លាយការទ័លច្រកផ្នែកនយោបាយអស់រយៈពេល១ឆ្នាំកន្លងមកនេះ ។
គួររំលឹកថា នាព្រឹកថ្ងៃទី២២ ខែកក្កដា ឆ្នាំ២០១៤នេះគឺជាការទទួលយកពីម្ចាស់សន្លឹកឆ្នោតដែលតែងតែប្រាថ្នាដ៏ទទូចឲ្យគណបក្សជាប់ឆ្នោតទាំង២ទទួលយកការបង្រួបបង្រួមជាតិ ផ្សះផ្សាជាតិ ការអភិវឌ្ឍន៍ជាតិសាសន៍ខ្មែរតែមួយ ដើម្បីសុខសន្តិភាព និងការអភិវឌ្ឍន៍ ហើយជាការឆ្លើយតបរបស់លោក សម រង្ស៊ី កាលពីព្រឹកថ្ងៃទី១៩ ខែកក្កដា ឆ្នាំ២០១៤ ក៏បានថ្លែងទៅកាន់អ្នកគាំទ្ររបស់ខ្លួនផងដែរថា ជំនួបកំពូលថ្នាក់ដឹកនាំគណបក្សទាំង២ដែលនឹងធ្វើនេះគឺជាការទម្លុះទម្លាយភាពទ័លច្រកផ្នែកនយោបាយឲ្យបានចប់សព្វគ្រប់ ៕
ប្រភព៖ http://nokorwatnews.com/detailnews.php?newsid=43192&mnu=2&cid=4#sthash.ADlLdIip.dpbs
