សៀមរាប ៖ ចំណុចសំខាន់ៗជាច្រើនត្រូវបានលើកឡើងដោយសម្ដេចអគ្គមហាសេនាបតីតេជោ ហ៊ុន សែន សម្រាប់ការពិភាក្សានៅក្នុងពិធីបើកសិក្ខាសាលាថ្នាក់តំបន់ស្ដីពី«ការប្រែក្លាយតំបន់ជនបទ ចក្ខុវិស័យជាយុទ្ធសាស្ត្រសម្រាប់តំបន់អាស៊ីប៉ាស៊ីហ្វិកនៅក្នុងខេត្តសៀមរាប កាលពីថ្ងៃទី០២ខែធ្នូ ឆ្នាំ២០១៤។
សម្ដេចនាយករដ្ឋមន្ត្រីមានប្រសាសន៍ក្នុងពិធីដែលមានការចូលរួមពីគណៈប្រតិភូមកពីស្ថាប័នដៃគូអភិវឌ្ឍន៍ សង្គមស៊ីវិល និង គណៈប្រតិភូមកពីតំបន់អាស៊ីប៉ាស៊ីហ្វិកថា យើងចាំបាច់ត្រូវរិះរកវិធាន ការបន្តលើកកម្ពស់កំណើនសេដ្ឋកិច្ច និង ការបង្កើតការងារនៅតំបន់ជនបទទាំងក្នុង និង ក្រៅ វិស័យកសិកម្ម ជាពិសេសសម្រាប់ក្រុមយុវជន។ ក្នុងនោះចាំបាច់ត្រូវធានាឱ្យបាននូវការតភ្ជាប់គ្នាឱ្យសកម្មរវាងតំបន់ជនបទ និង ទីក្រុងដោយផ្ដោតការវិនិយោគលើហេដ្ឋារចនាសម្ព័ន្ធថាមពល និង បង្កើននូវលំហូរនៃទំនិញ ចំណេះដឹង បច្ចេកវិទ្យា និង ហិរញ្ញវត្ថុចូលទៅក្នុងតំបន់ជនបទ។ សម្ដេចតេជោថ្លែងថា យើងចាំបាច់ត្រូវធ្វើឱ្យប្រសើរឡើងនូវរបៀបវារៈ ដែលអាចឱ្យប្រជាជននៅជនបទមានលទ្ធភាពទទួលបានធនធានចាំបាច់ និង កសាងសមត្ថភាពរបស់ខ្លួន សំដៅជំរុញឱ្យមានការផ្លាស់ប្ដូរឆ្ពោះទៅរកការអភិវឌ្ឍន៍ជនបទប្រកបដោយចីរភាព ត្រូវវិនិយោគលើកសិកម្មខ្នាតតូចនៅតាមជនបទ សម្រាប់ធានាសន្តិសុខ ស្បៀង និង អាហារូបត្ថម្ភទាំងក្នុងតំបន់ និងពិភពលោក។ កសិកម្មគ្រួសារខ្នាតតូចមានតួនាទីស្នូលក្នុងកិច្ចអភិវឌ្ឍជនបទជាទម្រង់កសិកម្ម ដែលមានលក្ខណៈគ្របដណ្ដប់នៅក្នុងវិស័យស្បៀងអាហារ ហើយក្នុងខណៈពេលដែលការកើនឡើង នៃតម្រូវការនៅលើអាហារនឹងបង្កើតកាលានុវត្តភាពគ្រួសារកសិករ និង បង្កើនសកម្មភាពធុរកិច្ច។ ក្នុងបរិការណ៍នេះ យើងចាំបាច់ត្រូវរិះរកវិធីជួយកសិករឱ្យទទួលបាននូវសិទ្ធិប្រើប្រាស់ធនធានធម្មជាតិ ទទួលបានសេវាប្រកបដោយផលិតភាពដូចជា ហិរញ្ញវត្ថុ និង ទីផ្សារជាដើម។ ទន្ទឹមនេះយើងចាំបាច់ត្រូវជំរុញការងារវិនិយោគឯកជនឱ្យបានទៅដល់ជនបទ ក្នុងន័យពង្រីកទីផ្សារកសិផលរបស់ប្រជាជនផង និង រួមចំណែកប្រែក្លាយតំបន់ជនបទផង។
សម្ដេចតេជោមានប្រសសាសន៍ថា យើងចាំបាច់ត្រូវលើកកម្ពស់ភាពធន់របស់គ្រួសារក្រីក្រនៅជនបទ។ ប្រជាជននៅជនបទងាយទទួលរងគ្រោះទៅនឹងការប្រែប្រួលអាកាសធាតុធ្ងន់ធ្ងរភ្លាមៗ ដែលរុញច្រានឱ្យពួកគាត់ធ្លាក់ចូលទៅក្នុងភាពក្រីក្រ ឬបន្តធ្វើឱ្យពួកគាត់ស្ថិតនៅក្នុងអន្ទាក់នៃភាពក្រីក្រ ពីព្រោះពួកគាត់មិនអាចចាប់បាននូវកាលានុវត្តភាពថ្មីៗភ្លាមៗនោះទេ។ តាមរយៈនេះ យើងអាចរិះរកវិធានការនានាដូចជា (១) ការផ្តល់ការលើកទឹកចិត្តដល់ការវិនិយោគដែលជួយកាត់បន្ថយភាពងាយរងគ្រោះទៅនឹងការប្រែប្រួលធ្ងន់ធ្ងរ ភ្លាមៗ ដូចជាតាមរយៈការកសាងហេដ្ឋារចនាសម្ព័ន្ធដែលធន់ទៅនឹងការប្រែប្រួលអាកាសធាតុ (២) ការផ្តល់ទំនិញ និង សេវាសាធារណៈ ដែលកាត់បន្ថយឥទ្ធិពលអវិជ្ជាមាននៃការប្រែប្រួលធ្ងន់ធ្ងរភ្លាមៗ ឬតាមរយៈការពង្រឹងសមត្ថភាពក្នុងការគ្រប់គ្រងហានិភ័យរួមមានការផ្តល់សេវាអប់រំ និង ការគាំពារសង្គម និង(៣)ជំរុញទីផ្សារឱ្យមានដំណើរការ រលូន និង ធានាបាននូវអភិបាលកិច្ចល្អ។ កិច្ចការនេះទាមទារឱ្យមានកិច្ចសហប្រតិបត្តិការក្នុងចំណោមគ្រប់តួអង្គ និង នៅគ្រប់កម្រិត។ ក្នុងន័យនេះ កិច្ចអន្តរាគមន៍ដូចជាការជួយឱ្យសហគមន៍អាចពឹងផ្អែកលើខ្លួនឯងមានទម្លាប់សហការគ្នា អាចជាការអនុវត្តល្អបំផុតមួយនាំមក នូវផលប្រយោជន៍សម្រាប់យើងទាំងអស់គ្នា។
សម្ដេចតេជោបានប្រាប់អង្គសិក្ខាសាលាថា ជារួមយើងត្រូវយល់ឱ្យបានច្បាស់ថា ការគិតគូរ និង គូសវាសបានត្រឹមត្រូវនឹងកំណត់ដល់រូបរាងនៃតំបន់ជនបទដែលប្រជាជនយើងរស់នៅប្រកបមុខរបរចិញ្ចឹមជីវិត ដែលនឹងរួមចំណែកសំខាន់ដល់ការងារពង្រីកវិសាលភាពសេដ្ឋកិច្ចជាតិការអភិវឌ្ឍន៍សង្គម បរិស្ថានឱ្យប្រកបដោយចីរភាព។ ខ្ញុំជឿជាក់ថា ការពិភាក្សារបស់អង្គសិក្ខាសាលានៅថ្ងៃនេះ និង ថ្ងៃស្អែកនឹងផ្តល់លទ្ធផលជាផ្លែផ្កា និង រួមចំណែកនាំយើងទាំងអស់គ្នាខិតកាន់តែ ជិតទៅរកចក្ខុវិស័យនេះ៕
