ភ្នំពេញ៖ នាយកដ្ឋានព័ត៌មាន និងឯកសារនៃក្រសួងការបរទេសកម្ពុជា បានឲ្យដឹងថា ស្ត្រីខ្មែររងគ្រោះចំនួន៤ នាក់ក្នុងចំនោម៦ នាក់ ដែលបានចាញ់បោករៀបការទៅប្រទេសចិនត្រូវបានជួយសង្គ្រោះឲ្យធ្វើមាតុភូមិនិវត្តន៍មកប្រទេសកម្ពុជាវិញ នៅវេលាម៉ោង១១ព្រឹក ថ្ងៃទី១៣ ខែធ្នូ ឆ្នាំ២០១៤ តាមជើងយន្តហោះ K6489 ហើយស្ត្រីខ្មែរ២នាក់ផ្សេងទៀតនឹងមកតាមក្រោយបន្ទាប់ពីធ្វើការលែងលះរួច។
បើតាមប្រភពពីនាយកដ្ឋានព័ត៌មាន និងឯកសារនៃក្រសួងការបរទេសកម្ពុជាដដែលនោះបានបញ្ជាក់ថា ស្ថានអគ្គកុងស៊ុលកម្ពុជាប្រចាំទីក្រុងសៀងហៃ ប្រទេសចិន បានជួយសង្គ្រោះស្ត្រីខ្មែរ ចំនួន៦នាក់ ដែលត្រូវមេខ្យល់បោកបញ្ឆោតនាំយកទៅរៀបការជាមួយ បុរសជនជាតិចិន ហើយស្ត្រីទាំង៦ នាក់នោះរួមមាន ទី១.វិចិត្ត ចិន្តា មានស្រុកកំណើតនៅខេត្តកំពង់ស្ពឺ ទី២.ធឹង ស្រីលក្ខណ៍ មានស្រុកកំណើតនៅខេត្តកំពង់ចាម ទី៣.ធី ស្រីលី មានស្រុកកំណើតនៅខេត្តកំពង់ចាម ទី៤.អ៊ុក សាវ៉េត មានស្រុកកំណើតនៅខេត្តកំពង់ចាមទី៥. ឈ្មោះ ទី ចាន់ថា និងទី៦. ឈ្មោះ សំ ចន្ទ្រា។
ក្រសួងការបរទេសកម្ពុជាបញ្ជាក់ថា ស្ត្រីខ្មែររងគ្រោះចំនួន៤ នាក់ធ្វើមាតុភូមិនិវត្តន៍ត្រឡប់មកកម្ពុជាវិញ នៅថ្ងៃទី១៣ ខែធ្នូ ឆ្នាំ២០១៤ នេះ វេលាម៉ោង ១១ ព្រឹក តាមជើងយន្តហោះ K6489 ចំណែក ២ នាក់ផ្សេងទៀត មាននឹងធ្វើមាតុភូមិនិវត្តន៍ត្រឡប់មកកម្ពុជាវិញ បន្ទាប់ពីធ្វើការលែងលះជាមួយបុរសជាជនជាតិចិនរួច៕