វាហាក់ដូចជាពិបាកជាងការគិតទៅទៀត នៅពេលមើលឃើញក្រុម Real Madridបំបែកពងមាន់របស់ក្រុម Almeriaរហូតដល់ទៅ៤-១ នៅក្រៅទឹកដីរបស់ខ្លួន ដើម្បីបន្តឈរនៅលើកំពូលតារាង La Ligaក៏ដូចជាសម្រេចបានជ័យជំនះលើកទី២០ជាប់ៗគ្នារបស់ពួកគេ ព្រមទាំងជាការត្រៀមខ្លួនយ៉ាងល្អឥតខ្ចោះសម្រាប់ការប្រកួត Clup World Cupរបស់ពួកគេ។
ក្រុម Real Madridនឹងត្រូវធ្វើដំណើរទៅកាន់ទីក្រុង Moroccoនៅថ្ងៃអាទិត្យនេះ ដើម្បីបន្ថែមពានរង្វាន់ក្លឹបបាល់ទាត់ពិភពលោកពីលើ ពានរង្វាន់ក្លឹបជើងឯកបាល់ទាត់អឺរ៉ុប Champions Leagueដែលពួកគេដណ្ដើមបានកាលពីខែឧសភាកន្លងទៅនៅក្នុងទីក្រុង Lisbon។
នៅទីបញ្ចប់២គ្រាប់ពីកីឡាករ Cristiano Ronaldoទំនងជាធ្វើឲ្យក្រុមReal Madridឈ្នះការប្រកួតដូចបកចេក ប៉ុន្តែដែលនឹកស្មានមិនដល់នោះគឺ ក្រុម Almeriaបានខកខានបាល់ប៉េណាល់ទី និងជាការសង្គ្រោះបាល់ដ៏អស្ចារ្យលើកដំបូងរបស់អ្នកចាំទី Iker Casillasនៅការប្រកួត La Ligaចាប់តាំងពីឆ្នាំ២០១១មក បានធ្វើឲ្យការប្រកួតបន្តក្នុងលទ្ធផល២-១។ ការប្រកួតនៅតែទទឹងទទែង រហូតដល់តារាស៊ូពើស្តាស្ថិតក្នុងក្រមជម្រើសជាតិព័រទុយហ្គាល់ម្នាក់នេះ បន្ថែមគ្រាប់បាល់ទី៣ ក្រោយពីមានការបញ្ជូនបាល់អាតាក់ ពីកីឡាករ Gareth Baleនិងកីឡាករ Karim Benzemaរួចមកនោះ។
សូមបញ្ជាក់ដែរថា អំឡុងការប្រកួតដ៏ស្វិតស្វាញមួយនេះដែរ អ្នកចាត់ការ Carlos Ancelottiនៅរារែកចិត្តនៅឡើយ ចំពោះដកចេញកីឡាករសំខាន់ៗរបស់លោក សម្រាប់ទុកជើងលេងនៅការប្រកួតលើកក្រោយ ប៉ុន្តែគ្រូបង្វឹកសញ្ជាតិអ៊ីតាលីម្នាក់នេះ មិនទាន់ហ៊ានធ្វើការសម្រេចចិត្តភ្លាមៗនោះទេ រហូតដល់នាទីចិត្តចប់ការប្រកួត ទើបសម្រេចដកកីឡាករ Benzemaចេញពីការប្រកួត។
អ្នកចាំទី Casillasបាននិយាយក្រោយការប្រកួតថា ពេលបញ្ចប់ការប្រកួតក្នុងតង់ទី១ យើងបាននិយាយគ្នាថា ក្រុមលេងមិនទាន់ដល់កម្រិតរបស់ខ្លួននោះទេ ដូច្នេះហើយត្រូវតែខំប្រឹងតទៅទៀត រហូតដល់សម្រេចបានលទ្ធផលជាផ្លែផ្កាបែបនេះ៕