មជ្ឈដ្ឋានអ្នកវិភាគអំពីវិស័យអប់រំបានសម្គាល់ឃើញថា លទ្ធផលនៃការប្រឡងនោះហើយវាជាកម្រិតនៃលទ្ធផលការងារដូចជាការងារគ្រប់គ្រងព្រមទាំងការងារបង្រៀននិងរៀនគ្រប់ភូមិសិក្សាទាំងអស់។ គេបាននិយាយថា ការប្រឡងសញ្ញាបត្រទុតិយភូមិឆ្នាំនេះវាជារបត់មួយជាបន្ទាន់និងឆាប់រហ័សដែលទាមទារឲ្យមានរបត់មួយនៃការកែលម្អគុណភាពអប់រំជាមួយគ្នាជាស្វ័យប្រវត្តិ។
ជាមួយនឹងលទ្ធផលប្រឡងគេបានធ្វើការប្រៀបធៀបដូចវេជ្ជបណ្ឌិតបានពិនិត្យអ្នកជំងឺរួចហើយយ៉ាងនោះដែរគឺតែងបានដឹងអំពីមូលហេតុនៃជំងឺនិងបានស្គាល់មេរោគដែលកំពុងរាតត្បាតសរីរាង្គកាយត្រង់ចំណុចណានោះអស់ហើយ។ ដូចនេះចំពោះការងារបន្តរបស់គ្រូពេទ្យគឺការព្យាបាលជំងឺឲ្យបានជាសះស្បើយឡើងវិញប៉ុណ្ណោះ។ យ៉ាងណាមិញចំពោះលទ្ធផលនៃការប្រឡងបាក់ឌុបកន្លងទៅនេះក៏ជាមូលហេតុចម្បងមួយដែលជាខ្សែញាក់គ្រប់បណ្តាញនៃភូមិសិក្សាទាំងអស់ឲ្យមានការកែលម្អគុណភាព និង ប្រសិទ្ធភាពអប់រំឡើងវិញចាប់ពីឆ្នាំសិក្សា២០១៤-២០១៥នេះតទៅ។
ចំពោះភូមិសិក្សាដែលជាដំណាក់កាលចុងក្រោយនៃការសិក្សារបស់សិស្សនិងនិស្សិតនោះ គឺកម្រិតឧត្តមសិក្សាដែលគិតចាប់ពីការសិក្សានៅមហាវិទ្យាល័យនិងសាកលវិទ្យាល័យឡើងទៅ។
ជាពិសេសសិស្សរៀនបានចប់បរិញ្ញាបត្រ។ ជាបន្តមានភាគខ្លះបានរៀនយកអនុបណ្ឌិតនិងបណ្ឌិតទៀតផង។ ប៉ុន្តែគុណភាពនៃថ្នាក់លើនោះគឺបឋមសិក្សា មធ្យមសិក្សាបឋមភូមិ និងមធ្យមសិក្សាទុតិយភូមិ។ បានសេចក្តីថា ថ្នាក់ដឹកនាំក្រសួងអប់រំបានសម្លឹងមើលភូមិសិក្សាទាំង៣នេះដែលជាមូលដ្ឋាននៃការកែលម្អគុណភាព។
កន្លងមកគេតែងបានដឹងថា មានអង្គការនិងគម្រោងក្នុងការកែលម្អគុណភាពអប់រំនៅបឋមសិក្សាដូចជាអង្គការប៉ាសិច អ៊ុយនីសែហ្វ គម្រោងអេគីប អង្គការស៊ីប៉ា...។ល។ ប៉ុន្តែនៅពេលគម្រោងបានបញ្ចប់ទៅសាលារៀនមិនបាន បន្តនិរន្តរភាពរបស់ខ្លួនទៀតទេគឺសកម្មភាពបង្រៀននិងរៀនបានបែរទៅរកសភាពដើមវិញដែលជាទម្លាប់ធម្មតារបស់សាលារៀន។ បានសេចក្តីថា គ្រូបង្រៀនធ្វើកិច្ចតែងការបង្រៀនមិនបានរៀនទៀងទាត់ហើយការបង្រៀនក៏មិនបានគោរពទៅតាមពេលវេលាដែលបានកំណត់ក្នុងកាលវិភាគដែរ។ ចំពោះសិស្សមានការអវត្តមាន ច្រើនហើយការរៀនសូត្រនោះទៀតសោតក៏មិនបានទៀងទាត់ដែរគឺសិស្សឡើងថ្នាក់តាមរបៀបសេះហោះតែម្តងពោលគឺមិនមានពិន្ទុពិតប្រាកដនោះទេ។
ចំពោះសិស្សរៀននៅមធ្យមសិក្សាទាំងពីរកម្រិតក៏មិនខុសត្រូវ ប៉ុន្មានកាលពីការរៀនបឋមសិក្សាដែរ។ ជាពិសេសវាមានរបៀបខុសគ្នាមួយត្រង់គ្រូឆ្លៀតបង្រៀនឈ្នួលយកលុយពីសិស្សតាមរយៈមុខវិជ្ជាសំខាន់ៗមាន គណិតវិទ្យា រូបវិទ្យា និងគីមីវិទ្យាជាដើម។ នៅមានចំណុចឆករវែងខ្លះទៀតក្នុងមធ្យមសិក្សាដែលនាំឲ្យប៉ះពាល់ដល់គុណភាព និងប្រសិទ្ធភាពសិស្សតែយើងទុកនាទីបច្ចេកទេសនេះសម្រាប់ឲ្យការប្រជុំក្រុមបច្ចេកទេសខ្លួនឯងជាអ្នករកឃើញចំណុចខ្លាំងនិងរកឃើញចំណុចខ្វះខាតផ្ទាល់ខ្លួនទៅចុះសម្រាប់កែលម្អឡើងវិញឲ្យបានទាន់ពេលវេលានៃសាលារៀននីមួយៗ។
ចំពោះគំនិតធំដែលរាជរដ្ឋាភិបាលរកឃើញហើយដែលមានតែសមត្ថភាពរបស់រាជរដ្ឋាភិបាលទេដែលដោះស្រាយរួចនោះគឺបញ្ហាដំឡើងប្រាក់ខែគ្រូបង្រៀនតែម្តង។ អ៊ីចឹងបញ្ហាលុយកាក់នេះគឺអាចចេញរួចក្នុងការសម្រួលជីវភាពរស់នៅរបស់គ្រូបង្រៀនហើយ។ នេះក៏ជា ប្រសិទ្ធភាពដ៏សំខាន់មួយក្នុងការជួយសិស្សរៀនឲ្យមានគុណភាពផងដែរ។
ក្រៅពីនេះគឺគ្រូបង្រៀនមានឆន្ទៈក្នុងការបង្រៀនសិស្សនិងគ្រូបង្រៀនបានគោរពពេលវេលាត្រឹមត្រូវព្រមទាំងបញ្ចេញអស់នូវសមត្ថភាពនៃការបង្រៀនសិស្សនោះទើបការពង្រឹងគុណភាពអប់រំឲ្យបានប្រសើរ។ ជាទូទៅគេនិយាយថា បើគ្រូខំបង្រៀនសិស្សនិងសិស្សខំប្រឹងរៀន សូត្រនោះវាជាមូលដ្ឋាននៃជោគជ័យសិស្សក្នុងការប្រឡងពិតប្រាកដ។ កាលណាសិស្សមានសមត្ថភាពខ្ពស់ក្នុងការប្រឡងបាក់ឌុបក៏ដូចជាធ្វើឲ្យការសិក្សាថ្នាក់ឧត្តមឬសាកលវិទ្យាល័យបានប្រកបដោយជោគជ័យដែរ៕