Cambodia Today: October 2014

Wednesday, October 29, 2014

NAGA World ចាប់ផ្ដើមរុះរើ សំណង់នៅក្នុង ទីតាំងវិទ្យាស្ថាន ពុទ្ធសាសនបណ្ឌិត្យ

ភ្នំពេញ៖ តាមរយៈហ្វេសប៊ុក របស់លោក យ៉ែម បុញ្ញឬទ្ធ ប្រធានគណៈកម្មការ ទី៧នៃរដ្ឋសភា ក្រុមហ៊ុន NAGA World ចាប់ផ្ដើមរុះរើសំណង់ នៅក្នុងទីតាំងវិទ្យាស្ថាន ពុទ្ធសាសនបណ្ឌិត្យបណ្ដើៗហើយ បន្ទាប់ ពីមានការសួរនាំ របស់គណៈកម្មការទី៧ នៃរដ្ឋសភា ជាមួយនឹងរដ្ឋមន្រ្តី ក្រសួងធម្មការ និងសាស នា កាលពីកន្លងមក ។

ក្នុងវីដេអូក្លីបដែលបានបង្ហោះក្នុងទំព័រហ្វេសប៊ុក របស់ លោក យ៉ែម បុញ្ញឬទ្ធ នៅថ្ងៃទី៣០ខែតុលាឆ្នាំ ២០១៤នេះ លោក យ៉ែម បុញ្ញឬទ្ធ បានសសេរសំណេរ ដោយខ្លីថា " ក្រោយការសួរនាំរបស់ គណៈ កម្មការទី៧នៃរដ្ឋសភា ជាមួយនឹងរដ្ឋមន្រ្តីក្រសួងធម្មការ និងសាសនា ទាក់ទងនឹង "វិទ្យាស្ថាន ពុទ្ធ សាសនបណ្ឌិត្យ" និងក្រោមការ តាមដាន យ៉ាងយកចិត្តទុកដាក់ ពីប្រជាពលរដ្ឋខ្មែរ ព្រះសង្ឃ និង អ្នកតំណាងរាស្រ្ត ថ្ងៃនេះយើងឃើញលទ្ធផល ជាបណ្តើរៗនៃការរុះរើអគារដែករបស់ NAGA World ដែលបានសាងសង់ នៅក្នុងទីតាំងវិទ្យាស្ថាន ពុទ្ធសាសន បណ្ឌិត្យ "។

មជ្ឈមណ្ឌលព័ត៌មានដើមអម្ពិលនឹងព្យាយាមទាក់ទងសុំការបំភ្លឺបន្ថែមពី លោក យ៉ែម បុញ្ញឬទ្ធ ពាក់ព័ន្ធបញ្ហានេះ នៅពេលបន្តិចទៀត ៕

ពន្ធនាគារ គ្រោះថ្នាក់បំផុតទាំង១០លើលោក មានថៃ១ដែរ

បើនិយាយពីពន្ធនាគារ គឺគ្មានមួយណាមានសុវត្ថិភាពសម្រាប់អ្នកទោសទេ។ អ្នកទោសចូលថ្មី យ៉ាងហោចណាស់ ក៏ត្រូវឆ្មាំគុកឬអ្នកលេងស្វាគមន៍មួយដៃមួយជើងទ្រមខ្លួនដែរ។ ខាងក្រោមនេះ ជាកន្លែងឃុំឃាំងទាំង១០ គ្រោះថ្នាក់បំផុតលើពិភពលោក ហើយក្នុងនេះក៏មានគុកថៃមួយដែរ។
១០. ពន្ធនាគារនៅកោះ Rikers ទីក្រុង New York អាមេរិក
Rikers ជាកោះមួយដែលមានពន្ធនាគារ១០ ដែលជាសរុបរួម ជាធម្យមទទួលអ្នកទោស១២០០០ ក្នុង១ថ្ងៃ។ ពន្ធនាគារទាំងនោះមានរឿងអាស្រូវរឿងបាញ់ប្រហារ ចាប់រំលោភ សម្លាប់ ដោយអ្នកយាមគុក និងអ្នកទោស។ ទីនេះមានកន្លែងកម្សាន្ត “fight club” ដែលឆ្មាំគុកបង្កើតឡើង ដើម្បីឱ្យអ្នកទោសវ៉ៃគ្នា។

៩. ពន្ធនាគារ La Sante ទីក្រុងប៉ារីស បារាំង

បើកនៅឆ្នាំ១៨៦៧ ពន្ធនាគារ La Sante មានចម្ងាយបីបួនគីឡូពីទន្លេ Seine។ ក្នុងសម័យសង្គ្រាមលោកលើកទី២ វាជាកន្លែងបង្ខាំងអ្នកទោស និងធ្វើទារុណកម្ម។ តាមប្រវត្តិសាស្ត្រ មានអ្នកទោសតែបីនាក់ប៉ុណ្ណោះ ដែលអាចរត់គេចរួចខ្លួន។

៨. ពន្ធនាគារ Petak រុស្ស៊ី
Petak គុកនៅលើបឹងស ( White Lake បឹងធំ១ក្នុងចំណោម១០នៅអឺរ៉ុប) ជាកន្លែងឃុំខ្លួនអ្នកទោសសាហាវៗ ដ៏ដាច់ស្រយាលរបស់រុស្ស៊ី។ អ្នកទោសទាំងអស់ ត្រូវបានគេដាក់ឱ្យនៅដាច់ពីគ្នា ហើយក្នុង១ថ្ងៃអ្នកទោសម្នាក់ៗ ត្រូវគេឃុំយ៉ាងហោចណាស់២០ម៉ោង ឬច្រើនជាង២០ម៉ោង។ អ្នកទោសត្រូវគេអនុញ្ញាតឱ្យជួបសួរសុខទុក្ខតែពីរថ្ងៃប៉ុណ្ណោះ ក្នុងមួយឆ្នាំ។ សីតុណ្ហភាពនៅរដូវរងាជាមធ្យម១០អង្សា ប៉ុន្តែពេលត្រជាក់ខ្លាំងអាចធ្លាក់-៤០អង្សាក៏មាន។ ទម្រាំរួចទោស អ្នកខ្លះបានបាត់បង់ការចងចាំ។

៧. ពន្ធនាគារ Bang Kwang ថៃ
ស្ថិតនៅចម្ងាយបីឬបួនគីឡូម៉ែត្រពីបាងកក Bang Kwang ជាពន្ធនាគារតឹងតែងបំផុតនៅប្រទេសថៃ។ អ្នកទោសភាគច្រើន ជាជនបរទេស។ អ្នកទោសទាំងអស់ ត្រូវធ្វើការលុបលាងទោសក្នុងពន្ធនាគារនេះយ៉ាងតិច២៥ឆ្នាំ។ មួយថ្ងៃ អ្នកទោសបានបាយជាមួយបន្លែមួយកូនចានតូច ហើយបើអ្នកណាត្រូវការអ្វីបន្ថែម អាចរកទិញបានក្នុងអាហារដ្ឋាននៅទីនេះ។ ពន្ធនាគារនេះខ្វះទឹកប្រើប្រាស់ ហើយអ្នកទោសភាគច្រើន កើតជំងឺខ្វះអាហារ និងជំងឺឆ្លង។

៦. ពន្ធនាគារ La Sabaneta វេណេហ្ស៊ុយអេឡា
អ្នកទោសវេណេហ្ស៊ុយអេឡា ត្រូវគេឃុំខ្លួនក្នុងពន្ធនាគារ La Sabaneta។ ពន្ធនាគារនេះមានមនុស្សច្រើន មានបញ្ហាខ្វះហិរញ្ញវត្ថុ និងខ្វះបុគ្គលិកបម្រើការ។ មានពួកអ្នកលេងច្រើន ហើយករណីរំលោភ និងអំពើឃាតកម្មជារឿងពេញនិយមនៅទីនេះ។ ក្នុងឆ្នាំ២០១២ អ្នកទោស៥៩១នាក់ត្រូវបានសម្លាប់ និង១៦នាក់ត្រូវសម្លាប់ក្នុងឆ្នាំ២០១៣។ អ្នកយាមគុកបានរឹបអូសកាំភ្លើងវែងខ្លី និងគ្រឿងញៀនជាច្រើននៅផ្លូវក្រោមដីពីពួកអ្នកទោស។

៥. ពន្ធនាគារ Diyarbakir ទួរគី
ពន្ធនាគារដ៏តឹងតែង និងមានអ្នកទោសច្រើន Diyarbakir ត្រូវគេបង្កើតឡើងក្នុងឆ្នាំ១៩៨០ ដើម្បីឃុំខ្លួនឧក្រិដ្ឋជន និងអ្នកទោសនយោបាយ។ តាមប្រវត្តិសាស្ត្រ វាជាពន្ធនាគារដែលមានខ្មោចលងសាហាវបំផុត។ ចាប់តាំងពីបើកមក អ្នកទោសរាប់រយនាក់ ត្រូវបានដាក់ទណ្ឌកម្មដល់ស្លាប់ និងច្រើននាក់ទៀតបានដុតខ្លួនឯង ដើម្បីឱ្យគេចផុតពីអំពើព្រៃផ្សៃ។ សព្វថ្ងៃមានក្មេងប្រុសស្រីវ័យ១៣ ដល់ ១៧ឆ្នាំ ចំនួន៣៥០នាក់កំពុងបម្រើការងារនៅក្នុងគុកនេះ។

៤. ពន្ធនាគារ Gldani រដ្ឋ Georgia អាមេរិក
ពន្ធនាគារមួយនេះ ត្រូវបានគេស៊ើបអង្កេត ក្រោយវីដេអូចាប់រំលោភ វាយដំ និងធ្វើទារុណកម្មអ្នកទោស លេចលើបណ្ដាញអ៊ីនធឺណិត។ វីដេអូបង្ហាញថា ឆ្មាំគុកបានវាយអ្នកទោសដោយដំបងប៉ូលិស និងដងអំបោស។ ក្រោយបែកធ្លាយពេញពិភពលោក លក្ខខណ្ឌក្នុងគុកនេះ មានសភាពល្អបន្តិច ហើយរដ្ឋាភិបាលបានចាប់ខ្លួន កាត់ទោស ឆ្មាំគុកលើអំពើព្រៃផ្សៃរបស់ពួកគេ។

៣. ពន្ធនាគារ Contonou Civil ប្រទេសបេណាំង (Benin)
បេណាំង ជាប្រទេសតូចមួយនៅអាហ្វ្រិកខាងលិច ជិតប្រទេសតូហ្គោ និងនីហ្សេរីយ៉ា។ គុកនេះក៏មានអ្នកទោសច្រើនលើសលុប។ អ្នកទោសខ្លះដេកដូរវេនគ្នា ហើយខ្លះទៀតបានស្លាប់ដោយសារថប់ដង្ហើមពេលដេក និងជំងឺឆ្លង។ ច្រើនជាង៩០% កំពុងរង់ចាំការកាត់ទោស។

២. ពន្ធនាគារ Tadmor ស៊ីរី
ឈាមយ៉ាងច្រើនបានដក់ជាប់ឥដ្ឋក្នុងពន្ធនាគារនេះ។ មិនថាអ្នកទោសធម្មតា ឧក្រិដ្ឋជន ឬអ្នកទោសនយោបាយទេ គឺទទួលបានទណ្ឌកម្មស្មើគ្នា។ ឆ្មាំគុកជាអ្នកមានអំណាច។ នៅទីនេះ គ្មានសៀវភៅ ទូរទស្សន៍ វិទ្យុទេ ហើយការធ្វើទារុណកម្មជាការកម្សាន្តល្អបំផុត។

១. ពន្ធនាគារ Gitarama Central រ្វ៉ាន់ដា (Rwanda)
Gitarama Central ជាពន្ធនាគាររន្ធត់របស់ប្រទេសរ្វ៉ាន់ដា នៅកណ្ដាលទ្វីបអាហ្វ្រិក។ គុកនេះគ្មានបន្ទប់ទេ ហើយមានអ្នកទោសច្រើនលើសលប់ តែគ្មានថវិកាផ្គត់ផ្គង់គ្រប់គ្រាន់ឡើយ។ ចំណែកការស្លាប់របស់អ្នកទោស មិនមែនដោយសារការធ្វើទារុណកម្ម ការអត់ឃ្លាន ឬជំងឺទេ គឺស្លាប់ដោយការសម្លាប់ និងស៊ីសាច់គ្នាឯង៕

ព្រះករុណាព្រះមហាក្សត្រអំពាវនាវឱ្យប្រជាជាតិរួមសាមគ្គីក្រោមដំបូលរដ្ឋធម្មនុញ្ញ

ភ្នំពេញ ៖ មហាមីទ្ទីញខួបទី១០ នៃការឡើងគ្រងព្រះសិរីរាជសម្បត្តិរបស់ ព្រះករុណាព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាបានប្រព្រឹត្តទៅ នៅពីមុខព្រះបរមរាជវាំង កាលពីព្រឹកថ្ងៃទី២៩ ខែតុលា ឆ្នាំ២០១៤ ដែលព្រះរាជាបានកត់សម្គាល់ពីសមិទ្ធផលរបស់សង្គម និងបានអំពាវនាវឱ្យប្រជាជាតិរួបរួមគ្នាក្រោមដំបូលរដ្ឋធម្មនុញ្ញ។

នៅក្នុងព្រះរាជសុន្ទរកថាលើព្រះទីនាំងចន្ទឆាយា ព្រះករុណាព្រះ បាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាបានមានព្រះរាជបន្ទូលថា តាមរយៈមីទ្ទីញនេះ យើងអាចសន្និដ្ឋានបានថា មាតុភូមិ និងប្រជាជនកម្ពុជាយើងពិតជា នឹងទទួលបានអនាគតភ្លឺស្វាង ក្នុងក្តីសង្ឃឹមខ្ពស់រស់នៅក្រោមដំបូលរដ្ឋធម្មនុញ្ញតែមួយ ដែលធានាបានឯកភាពជាតិដ៏រឹងមាំ។ ព្រះមហាក្សត្រមានព្រះរាជបន្ទូលទៀតថា មហាមីទ្ទីញនាពេលនេះស្ថិតក្នុងដំណាក់កាល ដែលមានស្ថិរភាពនយោបាយ និងសន្តិសុខជាតិត្រូវបានធានាពេញលេញ និងស្របពេលដែលរាជរដ្ឋាភិបាលបានបំពេញភារកិច្ចឧត្តុង្គឧត្តមតាមតួនាទីរបស់ខ្លួនយ៉ាងសកម្ម ។ «នៅក្នុង ឱកាសនេះ ខ្ញុំសូមអំពាវនាវបងប្អូនប្រជាពលរដ្ឋកម្ពុជាគ្រប់មជ្ឈដ្ឋាន សូមរួបរួមសាមគ្គីជាធ្លុងមួយស្ថិតក្រោមដំបូលរដ្ឋធម្មនុញ្ញ និងច្បាប់រដ្ឋ ដើម្បីចូលរួមចំណែកការពារ និងកសាងមាតុភូមិជាទីស្នេហារបស់យើងលើគ្រប់វិស័យ»។

កាលពីចុងខែតុលាឆ្នាំ២០០៤ មហាមីទ្ទីញអបអរសាទរព្រះរាជ ពិធីឡើងគ្រងរាជសម្បត្តិរបស់ព្រះករុណាព្រះបាទសម្តេចព្រះ បរម នាថ នរោត្តម សីហមុនី ក៏បានប្រព្រឹត្តទៅយ៉ាងអធិកអធមនៅមុខព្រះបរមរាជវាំង ហើយកាលពីរាត្រីថ្ងៃទី២៨ ខែតុលា ឆ្នាំ២០១៤ទូរទស្សន៍ជាតិកម្ពុជាបានចាក់ផ្សាយឡើងវិញ នូវមហាមីទ្ទីញជាប្រវត្តិសាស្ត្រនេះ ។

ព្រះរាជវង្សានុវង្ស សម្ដេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ព្រមទាំងនាម៉ឺនសព្វមុខមន្ត្រី ថ្នាក់ដឹកនាំជាន់ខ្ពស់ មន្ត្រីរាជការគ្រប់លំដាប់ថ្នាក់ កងកម្លាំងប្រដាប់ អាវុធ សិស្សានុសិស្ស និស្សិត និងប្រជាពលរដ្ឋជាងមួយម៉ឺននាក់បានឈរតាមផែននីមួយៗ នៅខាងមុខព្រះបរមរាជវាំងផងដែរ ។ បណ្តាអង្គទូត និងអង្គការអន្តរជាតិប្រចាំកម្ពុជាក៏បានអញ្ជើញចូលរួមក្នុងព្រះរាជពិធីនេះដែរ។

ព្រះករុណាជាអម្ចាស់ជីវិតលើត្បូងមានព្រះរាជបន្ទូលថា រយៈ ពេលកន្លងទៅនេះមាតុភូមិកម្ពុជា និងប្រជាពលរដ្ឋយើងមានការប្រែប្រួលមុខមាត់ថ្មីគួរឱ្យកោតសរសើរ ។ តាមគោលនយោបាយបង្រួបបង្រួមជាតិ ផ្សះផ្សាជាតិ សាមគ្គីជាតិជាព្រះរាជបណ្តាំបន្ថែមចុងក្រោយ របស់ព្រះករុណាព្រះវររាជបិតាជាតិខ្មែរ ជាទីគោរពសក្ការៈដ៏ខ្ពង់ខ្ពស់ បំផុតនៅទីនេះក្នុងឆ្នាំ២០១១ រាជរដ្ឋាភិបាលដែលមានសម្តេចអគ្គ មហាសេនាបតីតេជោ ហ៊ុន សែន ជាប្រមុខដឹកនាំដ៏ឆ្លាតវៃបានដាក់ ចេញនូវគោលនយោបាយដ៏ត្រឹមត្រូវ បាននាំមកនូវសុខសន្តិភាព ស្ថិរភាពនយោបាយ សាមគ្គីភាព ឯកភាពជាតិជូនប្រជាជាតិ និងមាតុភូមិយ៉ាងល្អប្រសើរ ។ យើងកំពុងតែសប្បាយរីករាយ និងទទួលផល ជាវិជ្ជមាន ដែលផ្តើមចេញពីកម្លាំងកសាង និងការពារជាតិមាតុភូមិ ប្រកបដោយសុខដុរមនារបស់ជនរួមជាតិយើង ។

១ទសវត្សរ៍បានកន្លងផុតទៅហើយ ព្រះរាជាណាចក្រកម្ពុជាដែលស្ថិតក្រោមម្លប់ដ៏ត្រជាក់របស់ព្រះមហាក្សត្រជាទីគោរពសក្ការៈ និងក្រោមការដឹកនាំរបស់រាជរដ្ឋាភិបាលកម្ពុជា បានបង្កើតឡើងនូវសមិទ្ធផលជាច្រើនលើគ្រប់វិស័យ ប៉ុន្តែក៏មិនមែនមានន័យថា មិនបានឆ្លងកាត់ឧបសគ្គដ៏ក្តៅគគុករាប់មិនអស់នោះទេ ព្រោះមានមជ្ឈដ្ឋានអគតិខ្លះបានព្យាយាមម្តងហើយម្តងទៀត ដើម្បីផ្តួលរំលំរបបរាជានិយមនៅកម្ពុជា ។ ប៉ុន្តែរាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែន និងដោយមានការចូលរួមគាំទ្រពីសំណាក់ប្រជាជនទូទាំងប្រទេសបានធ្វើឱ្យឧបាយកលរបស់ពួកអគតិទាំងនោះទទួលបរាជ័យ។

ព្រះមហាក្សត្រមានព្រះរាជបន្ទូលថា លើមូលដ្ឋាននៃមហាសាមគ្គីជាតិទាំងមូល ក្នុងស្ថានភាពសង្គមជាតិមានសុខសន្តិភាព និង ស្ថិរភាពនយោបាយនេះហើយ ដែលជាប្រភពកំណប់នៃការអភិវឌ្ឍ លើវិស័យនានា ជាពិសេសវិស័យសេដ្ឋកិច្ច ដែលជាដង្ហើមរស់របស់ជាតិយើង ។ សមិទ្ធផលដ៏ធំធេងទាំងឡាយ ដែលយើងសម្រេចបាននេះ ពិតជាបានតាមរយៈការខិតខំពង្រីកនូវវប្បធម៌សន្តិភាព ការផ្សះផ្សាបង្រួបបង្រួមជាតិ ការលើកស្ទួយលទ្ធិប្រជាធិបតេយ្យ សេរីពហុបក្ស ការគោរពសិទ្ធិសេរីភាព និងសេចក្តីថ្លៃថ្នូររបស់មនុស្ស ការការពារសន្តិសុខ សុវត្ថិភាព ស្ថិរភាព និងសណ្តាប់ធ្នាប់សង្គម ការកែលម្អអភិបាលកិច្ច ដើម្បីលើកស្ទួយវិស័យសាធារណៈ និងសមធម៌សង្គម និង ការលើកកម្ពស់កិច្ចសហប្រតិបត្តិការ ដើម្បីបម្រើសំណូមពរនៃការអភិវឌ្ឍសេដ្ឋកិច្ចជាតិ ។

ព្រះមហាក្សត្រមានព្រះរាជបន្ទូលទៀតថា ឈរលើមូលដ្ឋាននៃ មហាសាមគ្គីជាតិឯកភាពជាតិ ក្រោមទង់ដ៏សុខសាន្តនៃព្រះពុទ្ធសាសនា និងក្រោមបារមីព្រះបរមក្សត្រ ដែលជាបុព្វបុរសជាតិ ជាស្ថាបនិក ដ៏ល្បីល្បាញនៃការកសាងប្រាង្គប្រាសាទដ៏ល្អប្រណិត ស្ថិតនៅស្កឹមស្កៃគ្រប់ទិសទីទូទាំងព្រះរាជាណាចក្រកម្ពុជា មាតុភូមិដែលជាកេរមរតកជាតិដ៏មានតម្លៃ ពុំអាចកាត់ថ្លៃបានរបស់យើង ពិតជាពុំអាចមានសត្រូវណាមួយរំលោភឈ្លានពាន មកលើបូរណភាពទឹកដីបានឡើយ ៕

ឧបសគ្គធំបីដែលរារាំងដល់បរិយាកាសវិនិយោគថ្មីបន្ថែមទៀត ដែលកម្ពុជាត្រូវធ្វើការកែទម្រង់

ភ្នំពេញ ៖ របាយការណ៍វាយតម្លៃអំពីបរិយាកាសវិនិយោគឆ្នាំ២០១៤ របស់ធនាគារពិភពលោក (WORLD BANK) និងធនាគារអភិវឌ្ឍន៍អាស៊ី(ADB) ដែលចេញផ្សាយកាលពីថ្ងៃទី២៨ ខែតុលា បានបង្ហាញថា ឧបសគ្គធំបី ដែលបង្កនូវការលំបាកយ៉ាងធ្ងន់ធ្ងរដល់កិច្ចប្រឹងប្រែងរបស់កម្ពុជា ក្នុងការទាក់ទាញវិនិយោគថ្មីៗបន្ថែមទៀត។

ឧបសគ្គធំបីនេះ គឺតម្លៃអគ្គិសនីនៅកម្ពុជា មិនគ្រាន់តែមានតម្លៃថ្លៃជាងបណ្តាប្រទេសជិតខាងភាគច្រើនប៉ុណ្ណោះទេ ប៉ុន្តែថែមទាំងផ្គត់ផ្គង់មិនបានជាប់លាប់ទៀតផង ជាពិសេសនៅក្នុងតំបន់សេដ្ឋកិច្ចពិសេស។ បញ្ហាមួយទៀតក្រុមហ៊ុនដែលបានចុះបញ្ជីនៅតែបានមើលឃើញថា ការបង់ប្រាក់ក្រៅផ្លូវការជាកត្តារារាំងដ៏ធំមួយចំពោះការធ្វើអាជីវកម្ម ក៏ដូចជាពលករជំនាញផងដែរ ដែលស្នើឲ្យកម្ពុជាធ្វើការកែទម្រង់ផងដែរ ដើម្បីឱកាសវិនិយោគរបស់ខ្លួន។

លោក អាឡាសាន សូ (Alassane Sow) ប្រធានគ្រប់គ្រងធនាគារពិភពលោកប្រចាំកម្ពុជា មានប្រសាសន៍ថា «កម្ពុជាមានការរីកចម្រើនជឿនលឿនទៅមុខយ៉ាងខ្លាំងក្នុងការបង្កើនឲ្យមានចម្រុះភាពនៃផលិតផលថ្មី និងទាក់ទាញវិនិយោគិនធំៗបន្ថែមទៀត ហើយយើងសង្ឃឹមថា របាយការណ៍របស់យើង នឹងជំរុញឲ្យមានកិច្ចពិភាក្សាជាសាធារណៈមួយដែលឈានទៅរកបរិយាកាសធុរកិច្ចមួយ ដែលមានលក្ខណៈប្រសើរសម្រាប់ការអភិវឌ្ឍវិស័យឯកជន»។

យ៉ាងណាក៏ដោយរបាយការណ៍របស់ធនាគារទាំងពីរខាងលើ ក៏បានទទួលស្គាល់នូវភាពប្រសើរឡើងរបស់កម្ពុជានៅលើផ្នែកវិនិយោគទុនផ្ទាល់ពីបរទេស។ របាយការណ៍នេះ បានគាំទ្រយុទ្ធសាស្ត្រចតុកោណ៥ឆ្នាំរបស់រាជរដ្ឋាភិបាលកម្ពុជា ដែលបានខិតខំប្រឹងប្រែងនូវប្រភេទផលិត កម្ម និងគុណតម្លៃបន្ថែម នៃផលិតកម្មឲ្យកាន់តែប្រសើរឡើងថែមទៀត និងបង្កលក្ខណៈងាយស្រួលដល់ក្រុមហ៊ុននានា ក្នុងការបង្កើត ធ្វើប្រតិបត្តិការ ពង្រីក និងបង្កើនប្រភេទនៃសកម្មភាពអាជីវកម្មរបស់ខ្លួន។

លោក ជូលៀន លេធីម័រ ក្លឺក (Julian Latimer Clarke) អ្នកសេដ្ឋកិច្ចជាន់ខ្ពស់ផ្នែកពាណិជ្ជកម្មរបស់ធនាគារពិភពលោក ដែលជាអ្នកសរសេររបាយការណ៍នេះ បានថ្លែងថា «ប្រាក់ខែទាប ការដែលកម្ពុជាទទួលបានភាពអនុគ្រោះលើទំនិញនាំចូលទៅសហភាពអឺរ៉ុប និងកម្មវិធីបន្ធូបន្ថយពន្ធរបស់រដ្ឋាភិបាលទាំងអស់នេះ បានទាក់ទាញដល់វិនិយោគទុន និងនាំឲ្យមានភាពប្រសើរឡើងវិញលើការវិនិយោគទុនផ្ទាល់ពីបរទេស។ ប៉ុន្តែរដ្ឋាភិបាលចាំបាច់ត្រូវតែដោះស្រាយនូវបញ្ហាធ្ងន់ធ្ងរនានា ដែលរារាំងដល់ក្រុមហ៊ុនទាំងអស់»។

ធនាគារទាំងពីរខាងលើ ក៏បានផ្តល់យោបល់ដល់ការដោះស្រាយបញ្ហាតម្លៃអគ្គិសនី ព្រមទាំងកាត់បន្ថយការប្រាស្រ័យទាក់ទងជួបគ្នាដោយផ្ទាល់រវាងវិនិយោគិននិងមន្ត្រីរដ្ឋាភិបាល ដោយកំណត់តាមមធ្យោបាយឆាប់រហ័ស ក្នុងការមើលច្បាប់ពាណិជ្ជកម្មតាមប្រព័ន្ធអ៊ីនធើណេត និងពង្រីកប្រព័ន្ធទិន្នន័យគយស្វ័យប្រវត្តិបន្ថែមទៀត ដើម្បីកាត់បន្ថយពេលវេលា និងថ្លៃចំណាយរបស់ពាណិជ្ជករ។

កាលពីដើមខែតុលានេះ ធនាគារពិភពលោក ក៏បានចេញផ្សាយនូវរបាយការណ៍ថ្មីរបស់ខ្លួន ដោយបានបង្ហាញថា កំណើនសេដ្ឋកិច្ចរបស់ប្រទេសកម្ពុជាមានលំនឹងល្អ ទោះបីជាមានភាពមិនប្រាកដប្រជានៅក្នុងស្រុក និងអស្ថេរភាពនៅក្នុងបណ្តាប្រទេសជិតខាងខ្លួនក្តី។ កំណើនសេដ្ឋកិច្ចរបស់កម្ពុជាត្រូវបានព្យាករណ៍ថា នឹងកើនឡើងដល់៧.២ភាគរយ នៅក្នុងឆ្នាំ២០១៤ និង៧.៥ភាគរយនៅក្នុងឆ្នាំ២០១៥។ វិស័យកាត់ដេរ នៅតែជាក្បាលម៉ាស៊ីនដ៏សំខាន់មួយសម្រាប់ជំរុញកំណើនសេដ្ឋកិច្ច និងបន្ទាប់មក គឺមានវិស័យសំណង់ កសិកម្ម និងទេសចរណ៍។

ក៏ប៉ុន្តែ បញ្ហាប្រឈមដែលសំខាន់ គឺត្រូវធ្វើយ៉ាងណាជំរុញវិស័យកសិកម្ម ទេសចរណ៍ និងផលិតកម្ម។ វិធានការនានាដូចជា ការបង្កើនវិនិយោគទុនសាធារណៈលើសេវាកម្មផ្តល់យោបល់ផ្នែកកសិកម្ម ការបណ្តុះគ្រាប់ពូជ និងហេដ្ឋារចនាសម្ព័ន្ធធារាសាស្ត្រ អាចបង្កើនផលិតភាពនៃវិស័យកសិកម្មបាន។ ក្រុមហ៊ុននានាអាចទទួលបានអត្ថប្រយោជន៍ ពីការលុបបំបាត់ចោលនូវកត្តារា រាំងសំខាន់ៗនានាដូចជា តម្លៃអគ្គិសនីខ្ពស់ និងប្រព័ន្ធដែលគ្មានលក្ខណៈប្រកួតប្រជែង៕

បាញ់កាំជ្រួច អបអរសាទរ ពិធីឡើងគ្រងរាជ្យ សម្បត្តិ ផ្ទុះត្រូវអ្នកមើល ស្លាប់ម្នាក់ របួស ៤នាក់ (មានវីដេអូ)

ភ្នំពេញ៖ អ្នកទស្សនាពិធីបាញ់កាំជ្រួចអបអរសាទរ ព្រះរាជពិធីយាងគ្រងរាជ្យសម្បត្តិព្រះមហាក្សត្រម្នាក់ បានស្លាប់ និង៤នាក់ផ្សេងទៀតបានរងរបួស ដោយសារគ្រាប់កាំជ្រួចបានហោះទៅបុកពួកគេ នាវេលាម៉ោងប្រមាណ ៧ និង ៣០នាទីយប់ថ្ងៃទី២៩ ខែតុលា ឆ្នាំ២០១៤ ស្ថិតនៅត្រើយម្ខាង នៃទន្លេចតុមុខទល់មុខព្រះបរមរាជវាំង ស្ថិតក្នុង ភូមិក្បាលជ្រោយ សង្កាត់ជ្រោយចង្វា ខណ្ឌជ្រោយចង្វា ស្ថិតក្បែងអគារសណ្ខាគារសុខា ដែលកំពុងសាងសង់។

អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានឲ្យដឹងនៅក្រោយកើតហេតុភ្លាមថា គ្រាប់កាប់ជ្រួច ដែលហោះទៅមុខអ្នកទស្សនាឲ្យស្លាប់ និងរងរបួសនោះ ជាគ្រាប់ចុងក្រោយ នៃពិធីបាញ់កាំជ្រួច។បើតាមលោក ឡុង ឌីម៉ង់ បានឲ្យដឹងថា មូលហេតុ ដែលនាំឲ្យកាំជ្រួចហោះទៅបុកមនុស្សនេះ ដោយសារតែសម្បកកាំជ្រួចផ្ទុះ ធ្លាយ ធ្វើឲ្យកាំជ្រួចមិនហោះឡើងទៅលើបាន ក៏ហោះទៅបុកមនុស្សតែម្តង។

លោក ឡុង ឌីម៉ង់ បានបញ្ជាក់ថា ជនរងគ្រោះស្លាប់ និងរងរបួសនោះ ដោយសារពួកគេព្យាយាមទៅឈរមើល សកម្មភាពក្រុមអ្នកបច្ចេកទេសបាញ់កាំជ្រួច។ ជនរងគ្រោះ ដែលត្រូវកាំជ្រួចផ្ទុះត្រូវនេះ ជនរងគ្រោះបាត់បង់ជីវិតត្រូវកាំជ្រួចហោះបុកធ្លាយពោះវៀន ហើយ សម្រាប់អ្នករងរបួសធ្ងន់វិញ ត្រូវបានដាច់ជើង និងរយះជើងយ៉ាងធ្ងន់ធ្ងរផងដែរ។

ប្រភពព័ត៌មានពីកន្លែងកើតហេតុ បានឲ្យដឹងថា យុវជន ដែលស្លាប់បាត់បង់ជីវិតមានឈ្មោះ ណា គ្រី ដារ៉ូ អាយុ ២២ឆ្នាំ ស្រុកកំណើតនៅឃុំឈើ ខ្មៅ ស្រុកកោះធំ ខេត្តកណ្តាល រៀននៅសកលវិទ្យាល័យស៊ីតិច។ រីឯជនរង គ្រោះ ៤នាក់ ក្នុងនោះស្រីម្នាក់ ប្រុស ៣នាក់ ត្រូវបានគេបញ្ជូនទៅសង្គ្រោះនៅមន្ទីរពេទ្យ តែមិនទាន់ស្គាល់អត្ត សញ្ញាណនៅឡើយទេ៕

Monday, October 27, 2014

ក្រុមការងារចរចា CPP និង CNRP បន្តពិភាក្សាជាមួយគ្នា ផ្គុំសេចក្តីស្នើច្បាប់ស្តីពី ការរៀបចំនិងការប្រព្រឹត្តទៅនៃគ.ជ.ប. មាន ៧ជំពូក និង ៦៦ មាត្រា

រូបភាព ៖ ឯកសារ

ក្រុមការងារចរចានៃ គណបក្ស ប្រជាជន កម្ពុជា និងគណបក្សសង្គ្រោះជាតិ បានបន្តពិភាក្សាជាមួយគ្នា ផ្គុំសេចក្តីស្នើច្បាប់ស្តីពី “ការរៀបចំ និងការប្រព្រឹត្តទៅ របស់គណៈកម្មាធិការជាតិរៀបចំការបោះឆ្នោត” មាន ៧ ជំពូក និង ៦៦ មាត្រា នៅថ្ងៃនេះ។

នៅរសៀលថ្ងៃទី ២៧ ខែតុលា នេះ នៅវិមានរដ្ឋសភាជាតិ ក្រុមការងារចរចានៃ គណបក្ស ប្រជាជន កម្ពុជានិងគណបក្សសង្គ្រោះជាតិ បានបន្តពិភាក្សាជាមួយគ្នា ធ្វើសេចក្តីស្នើច្បាប់ ស្តីពី “ការរៀបចំនិងការប្រព្រឹត្តទៅ របស់គណៈកម្មាធិការជាតិរៀបចំការបោះឆ្នោត”។

ក្រុមការងារគណបក្សប្រជាជនកម្ពុជា មានសមាសភាពចំនួន ៨ រូប និងដឹកនាំដោយឯកឧត្តម ឧបនាយក រដ្ឋមន្ត្រី ប៊ិន ឈិន ចំណែកគណបក្សសង្គ្រោះជាតិមាន សមាសភាពចំនួន ៨ នាក់ និង ដឹកនាំដោយ ឯកឧត្ត គួយ ប៊ុនរឿន ។

នៅថ្ងៃនេះដែរ ឯកឧត្ត គួយ ប៊ុនរឿន តំណាងក្រុមការងារ គណបក្សបសង្គ្រោះ ជាតិ បាន មានប្រសាសន៍ថា ការពិភាក្សាកន្លងមកនេះ ជាការពិភាក្សាបឋម លើជំពូកនី មួយៗ និង មាត្រានីមួយៗ រហូតមក ដោយពុំទាន់បានពិភាក្សាលំអិត។ ដូច្នេះនៅថ្ងៃនេះ តំណាង ក្រុមការ ងារ នៃគណបក្សទាំងពីរ បន្តពិភាគ្សាផ្គុំជំពូកនីមួយៗ ដែលបានពិភាក្សាឯកភាព រួចហើយ ជាមួយគ្នានឹងមាត្រានានា ចូលវិញដោយពិនិត្យលើខ្លឹមសារច្បាប់ឲ្យក្លាយជាសេចក្តី ស្នើច្បាប់ ដំបូងដែលបង្កើតឡើងតាមការព្រមព្រៀងនយោបាយនៃគណបក្សទាំងពីរ ដែលមាន អាសនៈ ក្នុងសភា ។

ឯកឧត្តម គួយ ប៊ុនរឿន បានបញ្ជាក់បន្តថា ក្នុងករណីមានចំណុចណា ដែលក្រុម ការ ងារ គណបក្សទាំងពីរ ពុំអាចពិភាក្សាគ្នាដាច់ស្រេចទេនោះ គឺទុកឲ្យថ្នាក់ដឹកនាំ នៃគណបក្ស ទាំងពីរជាអ្នកធ្វើសេចក្តីសម្រេចចុងក្រោយនៅក្នុងកិច្ចប្រជុំថ្នាក់កំពូលបើចាំបាច់ អនុវត្តតាម គោល ការណ៍ កិច្ចព្រមព្រៀងថ្ងៃទី ២២ ខែកក្កដា ២០១៤។

សេចក្តីស្នើច្បាប់ស្តីពី “ការរៀបចំ និងការប្រព្រឹត្តទៅ របស់គណៈកម្មាធិការជាតិរៀប ចំ ការបោះឆ្នោត” នេះ ធ្វើឡើងដោយក្រុមសមាជិសភានៃគណបក្សទាំងពីរមានចំនួន ៧ ជំពូក និង ៦៦ មាត្រា ដែលក្រុមការងារគណបក្សទាំងពីរ បានពិភាក្សាគ្នា ឯកភាពជាមួយ គ្នារួច ហើយ ប៉ុន្តែ ត្រូវជួបគ្នាបន្តទៀត ដើម្បីពិភាក្សាលំអិត និងត្រូវការពេលវេលាសុំគំនិត យោបល់ ពីក្រុមតំណាងអង្គការសង្គមស៊ីវិលដែលមានជំនាញក្នុងការងារបោះឆ្នោត រួមទាំង ស្ថាប័នជំនាញជាតិ អន្តរជាតិនានាផងដែរ ទើបបញ្ជូនទៅសភាជាតិ។

ចំពោះសមាសភាពក្បាលម៉ាស៊ី ដឹកនាំ គ.ជ.ប. ៩ នាក់ គណបក្សសង្គ្រោះជាតិ ៤ នាក់និង គណ បក្សប្រជាជន ៤នាក់រួមទាំងលោកស្រីវេជ្ជបណ្ឌិតពុង ឈីវកេក ដែលមេដឹកនាំគណ បក្ស ទាំង ពីរ បានឯកភាពរួចហើយនោះត្រូវបោះ ឆ្នោតផ្តលការទុកចិត្ត ត្រឹម គណៈកម្មាធិការ អចិន្ត្រៃយ៍រដ្ឋសភា៕

កីឡាចំបាប់ទទួលបានមេដាយមាស១ ប្រាក់១ សំរឹទ្ធិ២នៅសិង្ហបុរី

សិង្ហបុរី ៖ កីឡាករកីឡាការិនីចំបាប់ បានឈ្នះមេដាយមាស១គ្រឿង ប្រាក់១ គ្រឿង និងសំរឹទ្ធិ២គ្រឿងក្នុងព្រឹត្ដិការណ៍ ប្រកួតជ្រើសរើសជើងឯកកីឡាអាស៊ី អាគ្នេយ៍+អូស្ដ្រាលីនៅប្រទេសសិង្ហបុរី។

តាមសេចក្ដីរាយការណ៍ពីប្រទេស សិង្ហបុរីលោក ធិន វិចិត្រ អគ្គលេខាធិ ការសហព័ន្ធកីឡាចំបាប់កម្ពុជាបានឱ្យ ដឹងថា កីឡាចំបាប់ទទួលបានមេដាយ មាស១ ប្រាក់១ និងសំរឹទ្ធិ២គ្រឿង បន្ទាប់ពីប្រកួតយកឈ្នះកាលពីថ្ងៃទី២៦ ខែតុលា ឆ្នាំ២០១៤ ។

កីឡាករដែលរកបានមេដាយមាស គឺកីឡាករ ឌន សៅ បានផ្ដួលកីឡាករ ឥណ្ឌូនេស៊ីឈ្មោះ Torres Robertson ក្នុង លទ្ធផលពិន្ទុ ១១-០ ខណៈកីឡាការិនី ចូវ សុធារ៉ា ទទួលបានមេដាយប្រាក់ បន្ទាប់ ពីយកឈ្នះកីឡាការិនីហ្វីលីពីនឈ្មោះ Nauabja Resegyn ក្នុងលទ្ធផល១១-១។ រីឯកីឡាករ ចាប លឿន ឈ្នះមេដាយ សំរឹទ្ធិបន្ទាប់ពីប្រកួតចុងក្រោយចាញ់ កីឡាករមកពីប្រទេសអូស្ដ្រាលីឈ្មោះ Evans Connor ក្នុងលទ្ធផល ៤-០ ។ចំណែកកីឡាករឆាំ ពិស៊ីន ក៏ទទួល បានមេដាយសំរឹទ្ធិមួយគ្រឿងផងដែរ គឺ ប្រកួតវិញ្ញាសាចំបាប់ក្រិកកូប្រភេទ ទម្ងន់៦៦គីឡូក្រាម ។

លោក ធិន វិចិត្រ បានចាត់ទុកការ ប្រកួតនេះក្រុមកីឡាករកីឡាការិនីចំបាប់ ទទួលបានលទ្ធផលល្អប្រសើរដោយបាន មេដាយជូនជាតិមាតុភូមិ ហើយលោក ក៏ថ្លែងអំណរគុណដល់ថ្នាក់ដឹកនាំក្រសួង អប់រំ យុវជន និងកីឡាដែលបានផ្ដាំផ្ញើ ឱ្យក្រុមអត្ដពលិកចំបាប់ខំប្រឹងប្រែង ដណ្ដើមយកមេដាយពីព្រឹត្ដិការណ៍ខាង លើមកជូនជាតិមាតុភូមិរបស់ខ្លួន ។ លោកក៏បានអរគុណដល់លោក វ៉ាត់ ចំរើន ប្រធានសហព័ន្ធកីឡាចំបាប់ និង លោក ខេស៊ី បាណាត់ អនុប្រធានសហ ព័ន្ធកីឡាចំបាប់ដែលបានចំណាយថវិកា ផ្ទាល់ខ្លួនចំនួន៦.៨០០ដុល្លារសម្រាប់ ថ្លៃសំបុត្រយន្ដហោះ ។

គួរបញ្ជាក់ថា នៅវេលាម៉ោង៥ ល្ងាចថ្ងៃទី២៨ ខែតុលា ឆ្នាំ២០១៤ ក្រុម ប្រតិភូនិងអត្ដពលិកចំបាប់បានមកដល់ អាកាសយានដ្ឋានអន្ដរជាតិភ្នំពេញ ៕

តុលាការកោះហៅមេដឹកនាំសហជីពចំនួន២រូបបំភ្លឺករណីហិង្សានៅផ្លូវវ៉េងស្រេងកាលពីដើមឆ្នាំ២០១៤

ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញកាលពីថ្មីនេះបានចេញដីកាចំនួន២ផ្សេងគ្នា កោះហៅមេដឹកនាំសហជីពចំនួន២ រូប គឺលោក រ៉ុង ឈុន ក្នុងនាមប្រធានសមាគមគ្រូបង្រៀនកម្ពុជាឯករាជ្យ និងអ្នកស្រី យ៉ាង សោភ័ណ្ឌ ប្រធានសហព័ន្ធសហជីពកម្ពុជា ឲ្យចូលបំភ្លឺនៅដំណាច់ខែតុលានេះដូចគ្នា ទាក់ទងអំពើហិង្សានៅផ្លូវវ៉េងស្រេង ដែលបានកើតឡើងកាលពីដើមឆ្នាំ២០១៤នេះ។

យោងតាមដីកាបង្គាប់ឲ្យចូលខ្លួនបំភ្លឺចំនួន២ ចេញដោយលោក ជា សុខហៀង ចៅក្រមស៊ើបសួរសាលាដំបូងរាជធានីភ្នំពេញ ហើយដែលការិយាល័យរបស់យើងទទួលបាននៅថ្ងៃទី២៧ ខែតុលា ឆ្នាំ២០១៤ បានដឹងថា លោក រ៉ុង ឈុន អាយុ៤៥ ឆ្នាំ ប្រធានសមាគមគ្រូបង្រៀនកម្ពុជាឯករាជ្យ ត្រូវបានចោទប្រកាន់ពីបទ ហិង្សាដោយចេតនា មានស្ថានទម្ងន់ទោស ធ្វើឲ្យខូចខាតដោយចេតនាមានស្ថានទម្ងន់ទោស គំរាមកំហែង ថានឹងធ្វើឲ្យខូចខាតដែលភ្ជាប់នូវបញ្ហាអ្វីមួយ និងប្រើមធ្យោបាយ ដើម្បីជាឧបសគ្គដល់ចរាចរណ៍សាធារណៈ ដែលប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី២៥ ខែធ្នូ ឆ្នាំ២០១៣ រហូតថ្ងៃទី៣ ខែមករា ឆ្នាំ២០១៤ តាមមាត្រា២១៨, ៤១១, ៤២៤ នៃក្រមព្រហ្មទណ្ឌ និងមាត្រា៧៨ នៃច្បាប់ចរាចរផ្លូវគោក។ ដីកាកោះហៅរបស់ចៅក្រម ជា សុខហៀង បានបង្គាប់ឲ្យលោក រ៉ុង ឈុន ចូលបំភ្លឺនៅថ្ងៃទី៣១ ខែតុលា ឆ្នាំ២០១៤ វេលាម៉ោង៨ និង៣០ នាទីព្រឹក។

ចំណែកដីកាកោះហៅមួយទៀតដែលចេញថ្ងៃតែមួយ បានបង្គាប់ឲ្យអ្នកស្រី យ៉ាង សោភ័ណ្ឌ ប្រធានសហព័ន្ធសហជីពកម្ពុជា ចូលបំភ្លឺនៅថ្ងៃទី៣១ ខែតុលា ឆ្នាំ២០១៤ នៅវេលាម៉ោង២ និង៣០ នាទីរសៀល ហើយ អ្នកស្រី យ៉ាង សោភ័ណ្ឌ ក៏ត្រូវបានចោទប្រកាន់ពីបទ ហិង្សាដោយចេតនា មានស្ថានទម្ងន់ទោស ធ្វើឲ្យខូចខាតដោយចេតនាមានស្ថានទម្ងន់ទោស គំរាមកំហែង ថានឹងធ្វើឲ្យខូចខាតដែលភ្ជាប់នូវបញ្ហាអ្វីមួយ និងប្រើមធ្យោបាយ ដើម្បីជាឧបសគ្គដល់ចរាចរណ៍សាធារណៈ ដែលប្រព្រឹត្តនៅចំណុចមុខសួនឧស្សាហកម្មកាណាឌីយ៉ា ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីថ្ងៃទី២៥ ខែធ្នូ ឆ្នាំ២០១៣ រហូតថ្ងៃទី៣ ខែមករា ឆ្នាំ២០១៤ តាមមាត្រា២១៨, ៤១១, ៤២៤ នៃក្រមព្រហ្មទណ្ឌ និងមាត្រា៧៨ នៃច្បាប់ចរាចរផ្លូវគោកដូចគ្នាដែរ។

កន្លងទៅប្រធានសហព័ន្ធសហជីពចលនាកម្មករ លោក ប៉ាវ ស៊ីណា ក៏ត្រូវបានតុលាការកោះហៅឲ្យចូលបំភ្លឺលើបញ្ហានេះដែរ និងដាក់កំហិតមិនឲ្យលោកចូលរួមធ្វើបាតុកម្មជាមួយកម្មករ ទាមទារបញ្ហាផ្សេងៗនោះទេ និងបានហាមមិនឲ្យចេញក្រៅប្រទេស និងត្រូវបង្ហាញខ្លួនពេលតុលាការកោះហៅ ហើយបើតាមការឲ្យដឹងពីប្រភពព័ត៌មានមួយចំនួនបានឲ្យដឹងថា មេដឹកនាំសហជីពចំនួន៣ រូបផ្សេងទៀត ក៏ត្រូវតុលាការកោះហៅដូចគ្នាដែរ ដែលមានលោក អាត់ ធន់ ប្រធានសហភាពការងារ, លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា និងអ្នកស្រី ម៉ម ញឹម ប្រធានសហព័ន្ធសហជីពនៃឧស្សាហកម្មវាយនភណ្ឌកាត់ដេរកម្ពុជា។

គួរបញ្ជាក់ថា នៅអំឡុងចុងឆ្នាំ២០១៣ និងដើមឆ្នាំ២០១៤ បាតុកម្មរបស់កម្មករជាច្រើនបានកើតឡើង ដែលគេដឹងថា ដឹកនាំដោយសហជីពជ្រុលនិយមមួយចំនួន ក្នុងបំណងទាមទារប្រាក់ឈ្នួលតាមអ្វី ដែលពួកគេចង់បាន ដោយមិនគិតពីផលប្រយោជន៍ធំរបស់កម្មករនោះឡើយ ហើយបាតុកម្មនោះ ក៏អាចនិយាយបានថា ធ្វើឡើងតាមការអំពាវនាវរបស់ដឹកនាំគណបក្សប្រឆាំងផងដែរ។ ជាលទ្ធផលទ្រព្យសម្បត្តិរបស់ក្រុមហ៊ុន និងទ្រព្យសម្បត្តិសាធារណៈរបស់រដ្ឋ និងឯកជនយ៉ាងច្រើនត្រូវបានបំផ្លាញ រហូតធ្វើឲ្យបាត់បង់ជីវិតកម្មករ និងរងរបួសជាច្រើននាក់ទៀតផង ខណៈពេលកម្លាំងអាជ្ញាធរចុះបង្ក្រាប និងបោសសំអាតក្រុមអនាធិបតេយ្យទាំងនោះ៕

គ្រាប់បាល់នៅនាទី៩៤របស់កីឡាករ Ribin van Persieជួយឲ្យក្រុមMan Utdឆ្លងផុតភាពអាម៉ាស់

នេះគឺជាអព្ភូតហេតុមួយសម្រាប់ក្រុម Man Utd ក្រោយពីមានគ្រាប់បាល់នៅនាទី៩៤របស់កីឡាករ Robin van Persieក្រោយពីមានការពិន័យកាតក្រហមលើកីឡាករ Branislav Ivanovic បានធ្វើក្រុមមួយនេះ រកបានលទ្ធផលស្មើ១-១ទាំងព្រលឹងចុងសក់ជាមួយក្រុមតោខៀវ Chelseaនៅក្នុងទឹកដី Old Trafford។

ក្រុមរបស់លោក Jose Mourinhoសង្ឃឹម១០០ភាគរយថា ពួកគេប្រាកដជាអាចរកបានជ័យជំនះលើក្រុមម្ចាស់ផ្ទះមួយនេះ ក្រោយពីមានគ្រាប់បាល់នៅនាទី៥៣របស់ខ្សែប្រយុទ្ធជើងចាស់Didier Drogba គឺបន្ទាប់ពីក្រុមទាំងពីរបានត្រឹមលទ្ធស្មើ០-០ប៉ុណ្ណោះមុនពេលបញ្ចប់ការប្រកួតតង់ទី១។ រីឯកីឡាករ Man Utdមិនបានបោះបង់ឆន្ទៈនៃការតស៊ូរបស់ពួកគេជាដាច់ខាត បើទោះជាខ្លួនគ្មានសមត្ថភាពគ្រប់គ្រាន់ដើម្បីទម្លុះសំណាញ់ទីរបស់ក្រុម Chelseaក៏ដោយ។

ទោះបីជាយ៉ាងណាក៏ដោយ ក្រុម Man Utdលេងមិនទាន់ដល់កម្រិតកំពូលរបស់ខ្លួននៅឡើយទេ អំឡុងការប្រកួតស៊ីសាច់ហុតឈាមមួយនេះ តែគេអាចនិយាយបានថាវាគឺជាសំណាង១ក្នុង១ពាន់សំណាងក្រុមរបស់ពួកគេ ដែលអាចចៀសផុតពីភាពអាម៉ាស់ ពេលប៉ះជាមួយក្រុមប្រជែងក្នុងស្រុក Chelseaក្នុងទឹកដីខ្លួនឯង។

ដោយឡែក អ្នកចាត់ការរបស់ក្លឹប Chelseaលោក Jose Mourinho មានការគោរពច្រើនដល់រៀមច្បង Louis van Gaal គឺលោកបានទៅចាប់ដៃជាមួយអ្នកចាត់ការរបស់ក្លឹប Man Utdម្នាក់ដល់កន្លែងអង្គុយតែម្តង៕

ជនបាញ់ប្រហារនៅរដ្ឋសភាកាណាដារៀបចំជាខ្សែវីដេអូផ្ទាល់ខ្លួនមួយ

បុរសដែលសម្លាប់ទាហានកាណាដាម្នាក់ហើយបើកការវាយប្រហារទៅលើអគាររដ្ឋសភានៃប្រទេសកាណាដាកាលពីសប្តាហ៍មុននោះបានរៀបចំជាខ្សែវីដេអូមួយដោយខ្លួនឯងមុនពេលប្រព្រឹត្តទៅតាមអ្វីដែលខ្លួនលុះទៅដោយមនោគមវិជ្ជានិងការដែលជំរុញឲ្យប្រព្រឹត្តដោយសារនយោយបាយ។ ប៉ូលិសបាននិយាយដូច្នេះកាលពីថ្ងៃអាទិត្យ។

ប៉ូលិសនៃអង្គភាព RCMP (The Royal Canadian Mounted Police) បាននិយាយនៅក្នុងសេចក្តីប្រកាសព័ត៌មានមួយថា ខ្លួនកំពុងតែដឹកនាំការធ្វើវិភាគទៅលើខ្សែវីដេអូដែលត្រូវបានផលិតដោយបុរសឈ្មោះ Michael Zehaf-Bideau ហើយប្រហែលជាមិនយកមកធ្វើការផ្សព្វផ្សាយនៅពេលនេះនៅឡើយទេ។

Zechaf-Bideau បានសំរុកចូលទៅក្នុងអគាររដ្ឋសភាដោយមានទាំងកាំភ្លើងយន្តសម្រាប់បើក ការវាយលុកមួយដើមផងកាលពីថ្ងៃពុធសប្តាហ៍កន្លងមកនេះ បន្ទាប់ពីមានករណីបាញ់ប្រហារនិងសម្រាប់នាយទាហានរងថ្នាក់ពលបាលទោ Nathan Cirillo នៅក្បែរនៅក្បែរវិមានគោរពវិញ្ញាណក្ខន្ធវរជនពលីក្នុងសង្គ្រាម។ ប៉ូលិសបាននិយាយយ៉ាងនេះ។ ដោយឡែក Zehaf-Bideau ក៏រងការបាញ់ឲ្យស្លាប់នៅក្នុងអគារសភាននោះដែរ។

កងកម្លាំងប៉ូលិសសហព័ន្ធបាននិយាយកាលពីថ្ងៃអាទិត្យថាប៉ូលិសជឿជាក់ថាកាំបិតមួយដែល Zehaf Bideau កាន់ជាប់ក្នុងដៃនោះត្រូវបានយកមកពីផ្ទុះម្តាយមីងរបស់ខ្លួន ប៉ុន្តែប៉ូលិសនៅតែស្វែងរកប្រភពដើមនៃកាំភ្លើងដែលបុរសនោះប្រើប្រាស់ថែមទៀត។ នៅក្នុងសេចក្តីប្រកាសព័ត៌មាននោះក៏បានលើកឡើងដែរ កាំភ្លើងដែលជននោះយកមកប្រើប្រាស់ជាប្រភេទអាវុធចាស់ហើយមិនដែលមានប្រើប្រាស់នៅក្នុងកងទ័ពកាណាដាទេ។ប៉ូលិសសង្ស័យថា ជននោះបានលួចលាក់ទុកកាំភ្លើងនៅឯផ្ទះរបស់ខ្លួនហើយការស៊ើបអង្កេតកំពុងតែប្រព្រឹត្តទៅ ជាបន្តទៀត។

*គោលដៅគឺឆ្ពោះទៅអារ៉ាប៊ីសាអ៊ូឌីតមិនមែនស៊ីរីទេ

ម្តាយរបស់ Zehaf Bideau បានបដិសេធនៅក្នុងលិខិតមួយច្បាប់ដែលផ្ញើទៅទីស្នាក់ការព័ត៌មានកាណាដាPostmedia នោះសេចក្តីប្រកាសព័ត៌មានមួយរបស់ប៉ូលិស RCMP បានឲ្យដឹងថា គាត់(ម្តាយរបស់ Zehaf Bideau) បានប្រាប់ប៉ូលិសថាកូនរបុសរបស់ខ្លួនមានចេតនាធ្វើដំណើរទៅកាន់ប្រទេសស៊ីរីដែលនៅទីនោះជាកន្លែងបណ្តុះបណ្តាលសកម្មភាពសកម្មជនប្រយុទ្ធ។ប៉ុន្តែបើតាមលិខិតនោះនិយាយថា កូនប្រុសរបស់គាត់ដែលមកពីក្រុង Van Couver នៅក្រុង Ottawa គឺស្វែងរកលិខិតឆ្លងដែនមួយច្បាប់ព្រោះតែចង់ធ្វើដំណើរទៅកាន់ប្រទេសអារ៉ាប៊ីសាអ៊ូឌីតដើម្បីសិក្សាតាមគម្ពីរកូរ៉ាន់។នេះបើតាមការឲ្យដឹងពីលោកស្រី Susan Bideau។

ប្រទេសកាណាដាកំពុងរៀបចំរួចហើយដែរនូវពិធីបញ្ចុះសពដល់ទៅពីរសម្រាប់ជនរងគ្រោះនៅក្រុង Ottawa ឈ្មោះCirillo ដែលសពនៅរក្សាទុកឯក្នុងក្រុង Hamilton Ontario ត្រូវធ្វើពិធីបញ្ចុះនៅថ្ងៃអង្គារនេះហើយសពនាយប៉ូលិស Patrice Vincent អាយុ៥៣ឆ្នាំត្រូវប្រារព្ធពិធីបញ្ចុះនៅថ្ងៃទី០១ ខែវិច្ឆិកា នៅក្រុង Quebec៕

Thursday, October 23, 2014

លោក កឹម សុខា ឲ្យបក្សកាន់អំណាច ត្រៀមខ្លួនធ្វើបក្ស ប្រឆាំង

ភ្នំពេញ៖ ខួប២៣ ឆ្នាំ នៃកិច្ចចរចាសន្តិភាពទីក្រុងប៉ារីស ប្រធានស្ដីទីគណបក្សសង្គ្រោះជាតិ លោក កឹម សុខា បានបង្ហាញមោទនភាពយ៉ាងខ្លាំង ចំពោះការកើនឡើងនូវអ្នកគាំទ្ររបស់ខ្លួន ព្រមទាំងពោលពាក្យផ្លែផ្កាឲ្យគណ បក្សប្រជាជនកម្ពុជា កំពុងកាន់អំណាចបច្ចុប្បន្ន ត្រៀមខ្លួនធ្វើជាគណបក្សប្រឆាំង សម្រាប់ការបោះឆ្នោតនៅអាណ ត្តិទី៦ ថែមទៀតផង។ មិនរង់ចាំយូរលោក ផៃ ស៊ីផាន មន្រ្តីរាជរដ្ឋាភិបាល មកពីគណបក្សប្រជាជនកម្ពុជាបាន ឆ្លើយតបទៅវិញភ្លាមៗ ថា ការលើកឡើងរបស់លោក កឹម សុខា គ្រាន់តែជាអំណួត និងជាការឃោសនារបស់អ្នក បរាជ័យតែប៉ុណ្ណោះ។

នៅក្នុងឱកាសប្រារព្ធពិធីអបអរសាទរខួប ២៣ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស (២៣ តុលា ១៩៩១- ២៣ តុលា ២០១៤) នាទីស្នាក់ការគណបក្សសង្រ្គោះជាតិ នៅសង្កាត់ចាក់អង្រែលើ ខណ្ឌមានជ័យ លោក កឹម សុខា បានមានប្រសាសន៍ថា អាណត្តិទី៥ គឺជាឱកាសសម្រាប់គណបក្សប្រជាជនកម្ពុជា បើកឱកាសឲ្យប្រជាពល រដ្ឋគ្រប់និន្នាការធ្វើបាតុកម្មតវ៉ាសម្តែងមតិនានា។ លុះដល់អាណត្តិទី៦ គណបក្សសង្រ្គោះជាតិ ដែលលោក កឹម សុ ខា អះអាងថា នឹងក្លាយជាអ្នកដឹកនាំរាជរដ្ឋាភិបាលនោះ ក៏នឹងបើកសិទ្ធិសេរីភាពឲ្យទូលាយជូនគណបក្សប្រជាជន ក្នុងការធ្វើបាតុកម្មសម្តែងមតិវិញផងដែរ។

ប្រធានស្តីទីគណបក្សប្រឆាំងរូបនេះ បានបញ្ជាក់យ៉ាងដូច្នេះ «អាណត្តិទី៥នេះ គឺជាឱកាសល្អណាស់ ដែលគណ បក្សកាន់អំណាច គួរបើកទ្វារពីឥឡូវទៅ បើកសិទ្ធិសេរីភាពជូនប្រជាពលរដ្ឋ។ មានន័យថា អ្នកដែលប្រឆាំងគាត់ (គណបក្សប្រជាជន) ក៏ធ្វើបាតុកម្មបាន អ្នកស្របជាមួយគាត់ ក៏ឲ្យធ្វើបាតុកម្មបាន។ បើកសិទ្ធពីឥឡូវឲ្យហើយទៅ នៅពេល ដែលគណបក្សសង្គ្រោះជាតិ ដឹកនាំរដ្ឋាភិបាលដល់ពេលគាត់ធ្វើបក្សប្រឆាំងវិញយើងហ្នឹងផ្ដល់សិទ្ធសេរី ភាពដូចគ្នា។ខ្ញុំថាយកល្អគួរត្រៀមខ្លួនធ្វើបក្សប្រឆាំងឲ្យហើយទៅ។ ខ្ញុំនិយាយមែនណាបងប្អូន យើងមើលទៅសន្ទុះ នៃការគាំទ្ររបស់ប្រជាពលរដ្ឋ គាំទ្រច្រើនណាស់ មកលើគណបក្សសង្គ្រោះជាតិ»។

លោក កឹម សុខា ក៏បានរិះគន់លើនយោបាយឈ្នះឈ្នះរបស់រាជរដ្ឋាភិបាល ដឹកនាំដោយគណបក្សប្រជាជនកម្ពុជា ផងដែរ។ លោកថា «ឈ្នះតែបក្ខពួកគេទៅ អ្នកឈ្នះ នៅតែឈ្នះរហូត អ្នកចាញ់នៅតែចាញ់រហូត បងប្អូនន័យគេ នេះ មិនមែនជាន័យនាំមកនូវសន្តិភាពដូចក្នុងកិច្ចព្រមព្រៀងសន្តិភាពទីក្រុងប៉ារីសនោះទេ»។

ប្រធានស្ដីទីរូបនេះ ក៏បានចោទប្រកាន់ទៅរាជរដ្ឋាភិបាលថាមិនបានយកចិត្តទុកដាក់ប្រារព្ធខួបកិច្ចព្រមព្រៀងទីក្រុង ប៉ារីស ២៣ តុលា ឲ្យបានធំដុំ។ សម្រាប់លោក កឹម សុខា ការអនុវត្តតាមកិច្ចព្រមព្រៀងទីក្រុងប៉ារីសរយៈពេល ២៣ឆ្នាំកន្លងមកនេះ រាជរដ្ឋាភិបាលមិនបានអនុវត្តឲ្យបានគ្រប់ជ្រុងជ្រោយនោះទេ។

ប្រតិកម្មតបទៅនឹងការលើកឡើងរបស់ លោក កឹម សុខា មន្រ្តីរាជរដ្ឋាភិបាល មកពីគណបក្សប្រជាជនកម្ពុជា បាន ហៅការលើកឡើងជាអំណួត និងយុទ្ធនាការឃោសនាសម្រាប់អ្នកបរាជ័យប៉ុណ្ណោះ។

លោក ផៃ ស៊ីផាន រដ្ឋលេខាធិការទីស្តីការគណៈរដ្ឋមន្រ្តី បានថ្លែងប្រាប់មជ្ឈមណ្ឌលព័ត៌មានដើមអម្ពិលថា «យើង ឃើញថា ឯកឧត្តម កឹម សុខា គេបានភូតពលរដ្ឋម្ដងរួចមកហើយថា គេនឹងក្លាយខ្លួនជានាយករដ្ឋមន្ត្រី ឬក៏ប្រធាន សភា តែមិនបានដូចការនិយាយ។ តែឯកឧត្តម ក៏ត្រូវចាំដែរថា តំណែងជាអនុប្រធានទី១ រដ្ឋសភា របស់ឯកឧត្តម គឺបានមកការផ្ដល់ឲ្យរបស់គណបក្សប្រជាជនទេ»។

សម្រាប់ លោក ផៃ ស៊ីផាន កិច្ចព្រមព្រៀងសន្តិភាពទីក្រុងប៉ារីស គឺបានពីកិច្ចខំប្រឹងប្រែងរបស់សម្ដេចព្រះ នរោត្តម សីហនុ និងប្រមុខរាជរដ្ឋាភិបាលសម្ដេចនាយករដ្ឋមន្ត្រី ហ៊ុន សែន៕

មន្រ្តីបក្សកាន់អំណាច និង បក្សប្រឆាំង បំពេញទស្សនកិច្ច រួមគ្នា នៅអាល្លឺម៉ង់ ស្វែងរកប្រយោជន៍ ជូនជាតិ

ភ្នំពេញ៖ មន្រ្តីកម្ពុជា ១២រូបមកពីគណបក្សប្រជាជនកម្ពុជា កំពុងកាន់អំណាច៦រូប និងគណបក្សសង្រ្គោះជាតិ ដែលជាគណបក្សប្រឆាំងមានឥទ្ធិពលនៅកម្ពុជា ៦រូប បានបំពេញទស្សនកិច្ចរួមគ្នាទៅកាន់សាធារណរដ្ឋអាល្លឺម៉ង់ រយៈពេល៩ថ្ងៃ ចាប់ពីថ្ងៃទី១៨ ដល់ថ្ងៃទី ២៦ ខែតុលា ឆ្នាំ២០១៤។ ក្នុងដំណើរទស្សនកិច្ចនេះ មន្រ្តីទាំងពីរគណ បក្សបានលើកឡើងនូវបញ្ហាដូចគ្នា និងអំពាវនាវឲ្យរដ្ឋាភិបាលអាល្លឺម៉ង់ បន្តជួយគាំទ្រដល់សាលាក្តីខ្មែរក្រហម ផ្តល់សំណងដល់ជនរងគ្រោះ ក្នុងរបបខ្មែរក្រហម ហើយក៏មានការអំពាវនាវឲ្យបន្តផ្តល់ជំនួយ ដើម្បីពង្រឹងការ គោរពសិទ្ធិ និងពង្រឹងលទ្ធិប្រជាធិបតេយ្យនៅកម្ពុជាផងដែរ។

ដំណើរទស្សនកិច្ចទៅកាន់ប្រទេសអាល្លឺម៉ង់ របស់មន្រ្តីគណបក្សនយោបាយជាប់ឆ្នោតនៅកម្ពុជាទាំងពីរបក្សនេះ ត្រូវបានធ្វើឡើងក្រោមការរៀបចំរបស់មូលនិធិ ខុនរ៉ាដ អាដិនណៅអ៊ែរ។ គណៈប្រតិភូគណបក្សប្រជាជនកម្ពុជា ដឹកនាំដោយ ឈាង វុន និងអមដំណើរដោយ លោកស្រី គ្រួច សំអាន, លោក អ៊ុក គឹមហាន, លោក ម៉ឹង សុវណ្ណា, លោក ពៅ ប៉ូលី ណែល និងលោក ហោ សេរីវឌ្ឍន៍។ គណបក្សសង្គ្រោះជាតិ ដឹកនាំដោយលោក អេង ឆៃអ៊ាង និងអមដំណើរដោយលោក យ៉ែម បុញ្ញឫទិ្ធ, លោក សុខ គឹមសេង, លោក កង គឹមហាក់, លោកស្រី តែ ច័ន្ទមុនី, និងលោក ហ៊ួរ រដ្ឋា។

ក្នុងដំណើរទស្សនកិច្ចនាថ្ងៃទី២១ ខែតុលា ឆ្នាំ២០១៤ គណៈប្រតិភូអ្នកនយោបាយកម្ពុជា ដឹកនាំដោយ លោក ឈាង វុន, លោក អេង ឆៃអ៊ាង និងលោក យ៉ែម បុញ្ញឫទិ្ធ បានជួបពិភាក្សាការងារ ជាមួយសមាជិកសភា សហ ព័ន្ធ និងមន្ត្រីសភាសហព័ន្ធ នៃសាធារណរដ្ឋសហព័ន្ធអាល្លឺម៉ង់។

នៅក្នុងជំនួបពិភាក្សានេះ លោក Roderich Kiesewetter សមាជិកសភា និងជាសមាជិកគណៈកម្មាធិការកិច្ចការ ការបរទេសរបស់សភាសហព័ន្ធអាល្លឺម៉ង់ បានផ្តល់កិត្តិយសទទួលស្វាគមន៍ គណៈប្រតិភូអ្នកនយោបាយកម្ពុជា យ៉ាងកក់ក្តៅ។ លោកបានវាយតម្លៃខ្ពស់ ចំពោះការអភិវឌ្ឍរបស់កម្ពុជា នាពេលបច្ចុប្បន្ន និងការខិតខំរបស់រាជរដ្ឋា ភិបាលកម្ពុជា ក្នុងកែប្រែពីប្រទេស ដែលទទួលជំនួយពីអង្គការសហប្រជាជាតិ ផ្នែករក្សាសន្តិសុខ ទៅជាតួអង្គមួយ ក្នុងការជួយមនុស្សជាតិ តាមរយៈសកម្មភាពបញ្ជូនទាហ៊ានកម្ពុជាទៅប្រទេសតំបន់អាហ្វ្រិកខាងជើង ការទទួល យកជនភៀសខ្លួន និងការអនុវត្តសិទ្ធិសញ្ញា ដែលកម្ពុជាជាប្រទេសហត្ថលេខីក្នុងការមិនសាយភាយមីន និង គ្រាប់ មិនទាន់ផ្ទុះផងដែរ។

យោងតាមមន្រ្តី ដែលបានអមដំណើរទស្សនកិច្ចនេះ បានឲ្យដឹងផងដែរថា ដោយឈរលើស្មារតីវប្បធម៌សន្ទនា និងសហការអភិវឌ្ឍសង្គមជាតិ គណៈប្រតិភូអ្នកនយោបាយកម្ពុជា លោក ឈាង វុន, លោក អេង ឆៃអ៊ាង និង លោក យ៉ែម បុញ្ញឫទិ្ធ បានលើករួមគ្នាពីសារសំខាន់ នៃការដោះស្រាយបញ្ហាសង្គម ដែលកម្ពុជាកំពុងប្រឈម។

មន្ត្រីនយោបាយ នៃគណបក្សកាន់អំណាច និងបក្សប្រឆាំង ក៏បានស្នើរួមគ្នាផងដែរ ឲ្យសហភាពសហព័ន្ធអាល្លឺម៉ង់ ជួយគាំទ្របន្ថែមទៀត លើវិស័យដែលកម្ពុជាកំពុងខ្វះខាត ដូចជាការផ្តល់ជំនួយដល់ សាលាក្តីខ្មែរក្រហម ដើម្បីឲ្យ ដំណើរការទៅមុខ ការផ្តល់សំណងប៉ះប៉ូវដល់គ្រួសារកម្ពុជា ដែលរងគ្រោះដោយរបបខ្មែរក្រហម ពីសំណាក់ ប្រ ទេស ដែលពាក់ព័ន្ធក្នុងសង្គ្រាម ការបន្តពង្រឹងសិទ្ធិក្នុងការទទួលកម្មសិទ្ធិដីធ្លីតាមប្រព័ន្ធ LMAP ការបន្តពង្រឹងលទ្ធិ ប្រជាធិបតេយ្យ និងអភិបាលកិច្ចល្អ ព្រមទាំងអំពាវនាវឲ្យបន្តជួយសកម្មភាព ដោះគ្រាប់មិនទាន់ផ្ទុះនៅកម្ពុជា។

នៅថ្ងៃទី២១ ខែតុលា ឆ្នាំ២០១៤ ដដែលនោះ គណៈប្រតិភូអ្នកនយោបាយកម្ពុជា ក៏បានអញ្ជើញចូលជួបសម្តែង ការគួរសម ជាមួយលោក Ministerdirigent Frank Sobolewski អនុប្រធាននាយកដ្ឋានសេវាកម្មសភា និងបាន ពិភាក្សា ស្វែងយល់ពីប្រវត្តិតួនាទី និងរបៀបរបបធ្វើការងារ របស់សភាសហព័ន្ធ នៃសាធារណរដ្ឋសហព័ន្ធអាល្លឺ ម៉ង់។

គណៈប្រតិភូ ក៏បន្តជួបពិភាក្សាជាមួយលោក Danny Freymark សមាជិកសភារដ្ឋសហព័ន្ធប៊ែរលីន និងជាអ្នក នាំពាក្យវិស័យនយោបាយបរិស្ថាន របស់ក្រុមបក្ស CDU នៅក្នុងសភារដ្ឋសហព័ន្ធ ដើម្បីស្វែងយល់ពីការងារនៅ មណ្ឌលបោះឆ្នោត របស់តំណាងរាស្ត្រថ្នាក់រដ្ឋសហព័ន្ធ។

គណៈប្រតិភូអ្នកនយោបាយកម្ពុជា ក៏បានធ្វើទស្សនកិច្ចនៅសភារដ្ឋសហព័ន្ធប៊ែរលីន និង ស្ថានអធិការបតី Fed eral Chancellery របស់លោកជំទាវ Angela Merkel អធិការបតី នៃសាធារណរដ្ឋសហព័ន្ធអាល្លឺម៉ង់ផងដែរ៕

រាជរដ្ឋាភិបាលកម្ពុជា គ្រោងប្រើប្រព័ន្ធ E-Card គ្រប់គ្រងច្រកព្រំដែន អន្តរជាតិ ប៉ោយប៉ែត

ភ្នំពេញ៖ ដើម្បីជួយសម្រួលដល់ដំណើរការឆ្លងកាត់ ព្រំដែន ឲ្យកាន់តែមានសណ្តាប់ធ្នាប់ល្អ រហ័ស ជាពិសេសងាយស្រួលគ្រប់គ្រងទិន្នន័យភ្ញៀវចេញចូល និងបង្ការភេរវកម្មនោះ រាជរដ្ឋាភិបាលកម្ពុជា កំពុងសិក្សា និងរៀបចំការគ្រប់ គ្រងច្រកព្រំដែនអន្តរជាតិប៉ោយប៉ែត តាមប្រព័ន្ធព័ត៌មានវិទ្យាដោយប្រើប្រាស់ E-Card (កាតអេឡិចត្រូនិច)។

ផែនការនេះ បានធ្វើឡើងអំឡុងពេលដែលខាងតំណាងក្រុមហ៊ុន អេប៊ល ម៉លធី សឺលូសិន លោក យិន សុវណ្ណនី បានធ្វើបទបង្ហាញដល់មន្រ្តីអគ្គនាយកដ្ឋានអន្តោប្រវេសន៍កម្ពុជា ដឹកនាំដោយវរសេនីយ៍ទោ អ៊ុយ ស៊ីថារ៉ាវុធ កាលពីរសៀលថ្ងៃពុធ ទី២២ ខែតុលា ឆ្នាំ២០១៤ នៅសណ្ឋាគារភ្នំពេញ។

ផែនការសិក្សាក៏បានបញ្ជូនទៅលោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ កាលពីថ្ងៃទី២៧ ខែកញ្ញា ឆ្នាំ២០១៤ បន្ទាប់មកលោកឧបនាយករដ្ឋមន្រ្តី ស ខេង ក៏បានធ្វើចំណារមួយ ដើម្បីឲ្យសិក្សាលម្អិតអំពីផែនការនេះ រួមទំាងបញ្ជូនគណៈប្រតិភូកម្ពុជា ដើម្បីសិក្សាបទពិសោធន៍បន្ថែម អំពីដំណើរគ្រប់គ្រងការចេញចូលតាមប្រព័ន្ធព័ត៌ មានវិទ្យានៅពេលខាងមុខ។

លោក យិន សុវណ្ណនី តំណាងក្រុមហ៊ុន បានមានប្រសាសន៍ប្រាប់មជ្ឈមណ្ឌលព័ត៌មានដើមអម្ពិលថា ការគ្រប់គ្រង និងចាត់ចែងលើការចេញ-ចូលតាមបរិវេណចំណុចឆ្លងកាត់ផ្សេងៗតាមព្រំដែនតាមប្រព័ន្ធព័ត៌មានវិទ្យា (IT) នេះ នឹងធ្វើឲ្យដំណើរឆ្លងកាត់មានសណ្តាប់ធ្នាប់ល្អ ជាពិសេសទៅទៀតនោះ គឺអាចបង្ការភេរវកម្មបានទៀតផង ដែលគម្រោងនេះ នឹងត្រូវចំណាយថវិកាអស់៧លាន៣៦ម៉ឺនដុល្លារអាម៉េរិកជាជំហានដំបូង។

លោកបន្តថា «ដំណើរការតាមប្រព័ន្ធព័ត៌មានវិទ្យាតាមបែប E-Cardនេះ នឹងផ្តល់ភាពងាយស្រួលក្នុងការធ្វើដំណើរឆ្លងកាត់ព្រំដែនរបស់ប្រជាជនកម្ពុជា និងថៃ ក្នុងតំបន់ព្រំដែនទំាងពីរ ជាពិសេសនោះគឺសមាហរណកម្មអាស៊ានឆ្នាំ២០១៥ខាងមុខ»។

លោកបន្តថា «វានឹងជួយឲ្យរាជរដ្ឋាភិបាលអាចប្រមូលថវិកាពីការចេញចូលឆ្លងកាត់ព្រំដែន បានដោយប្រសើរ អាចគ្រប់គ្រងទិន្នន័យចេញចូល បានយ៉ាងច្បាស់លាស់ និងសុក្រិនៃចំនួនពលរដ្ឋកម្ពុជាដែលឆ្លងកាត់ពំ្រដែន ដោយមានការចូលរួមរបស់កងកម្លំាងសមត្ថកិច្ចអន្តោប្រវេសន៍ ក្នុងការផលិតនេះត គឺអាចពិនិត្យ និងទប់ស្កាត់ការឆ្លងកាត់នូវមុខសញ្ញាផ្សេងៗបាន»។

ជាមួយគ្នានោះដែរ ប្រតិភូខាងកម្ពុជា ក៏នឹងទៅទស្សនកិច្ចនៅតំបន់ព្រំដែនឡាវ ថៃ ដែលមានប្រព័ន្ធដំណើរការនេះរួចហើយ ដើម្បីសិក្សាបទពិសោធន៍បន្ថែមអំពីដំណើរគ្រប់គ្រងការចេញចូលតាមប្រព័ន្ធព័ត៌មានវិទ្យា។

ពាក់ព័ន្ធនឹងប្រព័ន្ធគ្រប់គ្រងការចេញចូល តាមរយៈព័ត៌មានវិទ្យានេះ លោក យិន សុវណ្ណនី តំណាងក្រុមហ៊ុន អេប៊ល ម៉លធី សឺលូសិន ក៏បានបន្ថែមថា នៅប្រទេសជាច្រើនតំបន់អាស៊ី គឺគេមានប្រព័ន្ធនេះហើយ ដូច្នេះវានឹងផ្តល់ផលល្អសម្រាប់កម្ពុជា ក្នុងតម្លើងឲ្យមានប្រព័ន្ធនេះ ដើម្បីគ្រប់គ្រងទិន្នន័យ ក៏ដូចជាបន្ថែមចំណូលថវិកាជាតិ។

សូមបញ្ជាក់ថា ជាជំហានដំបូងនឹងមានការតម្លើងប្រព័ន្ធគ្រប់គ្រងដំណើរការឆ្លងកាត់ព្រំដែននេះ នឹងត្រូវធ្វើឡើងនៅច្រកអន្តរជាតិ ប៉ោយប៉ែត ខេត្តបន្ទាយមានជ័យ និងច្រកអន្តរជាតិបាវិត នៅខេត្ត ស្វាយរៀង មុននឹងដំណើរនៅគ្រប់ច្រកព្រំដែននៃព្រះរាជាណាចក្រកម្ពុជា ដោយក្នុងម្នាក់ត្រូវចំណាយអស់ថវិកា០,៨៥ដុល្លារ ក្នុងមួយថ្ងៃ និងតម្លៃសម្រាប់កាតនេះ មានតម្លៃ១០ដុល្លារ ជាមួយនឹងសុពលភាពរយៈពេល១ឆ្នាំ។

បើតាមក្រុមហ៊ុន រដ្ឋអាចរកចំណូលបានប្រមាណ២លាន៥០ម៉ឺនដុល្លារ ក្នុង១ឆ្នាំៗ សេវាកម្មនេះ ផងដែរ៕

ព្រះពុទ្ធបដិមា ត្រូវស្រ្តី ញូវ ហ្សឺឡែន វាយបំផ្លាញ បានជួសជុល និងរៀបចំពិធី ពុទ្ធាភិសេក តម្លល់នៅកន្លែងដើម

សៀមរាប៖ ព្រះពុទ្ធបដិមា នៅក្នុងប្រាសាទបាយ័ន ដែលស្រ្តីជនជាតិ ញូវ ហ្សឺឡែន វាយបំបែកឲ្យខូចខាត នោះ ត្រូវបានជួសជុលរួចរាល់ ព្រមទាំងធ្វើពិធីពុទ្ធា ភិសេកយកទៅតម្កល់នៅកន្លែងដើមវិញហើយ នៅថ្ងៃទី២៣ ខែតុលា ឆ្នាំ ២០១៤នេះ។

ពិធីពុទ្ធាភិសេកត្រូវបានធ្វើនាព្រឹកព្រលឹមថ្ងៃទី២៣ ខែតុលា នេះ នៅប្រាសាទបាយ័ន។ ពិធីពុទ្ធាភិសេកតាមបែប សាសនា ដើម្បីអារាធនារូបព្រះពុទ្ធបដិមា ដាក់កន្លែងដើមវិញ នៅប្រាង្គកណ្ដាល នៃប្រាសាទបាយ័ន ទុកសម្រាប់ ជាទីគោរពសក្ការៈរបស់ពុទ្ធបរិស័ទទាំងឡាយបន្ដទៀត។ ពិធីរៀបចំឡើង ដោយមានការចូលរួមពីថ្នាក់ដឹកនាំ មន្ត្រី បុគ្គលិក នៃអាជ្ញាធរអប្សរា ប្រធានក្រុមប្រឹក្សាខេត្ត អាជ្ញាធរដែនដី អភិបាលរងខេត្ត មន្ត្រីរាជការ អាជ្ញាធរពាក់ព័ន្ធ ព្រះសង្ឃ យាយជី តាជី និង ពូទ្ធបរិស័ទផងដែរ។

សូមបញ្ជាក់ថា រូបព្រះពុទ្ធបដិមា មួយអង្គ ដែលតម្កល់នៅកណ្តាលប្រាង្គប្រាសាទបាយ័ន ត្រូវបានស្រ្ដីភ្ញៀវទេសចរ ជនជាតិ ញូវ ហ្សីឡែន ឈ្មោះ Willemijn Vermaat អាយុ ៤០ឆ្នាំ ធ្វើឲ្យធ្លាក់បាក់ខូចខាត កាលពីរាត្រីថ្ងៃទី៩ ខែ តុលារ ឆ្នាំ២០១៤ កន្លងទៅ ខណៈដែលស្ដ្រីជាភ្ញៀវទេសចររូបនេះ ព្យាយាមពួនសម្ងំនៅក្នុងប្រាសាទអស់ពេញ មួយយប់។

ចំពោះមូលហេតុដែលធ្វើឲ្យបាក់ខូចខាតរូបបដិមា នៅពុំទាន់បានដឹងច្បាស់ទេ ព្រោះនៅពេលភ្នាក់ងាររបស់អាជ្ញាធរ អប្សរា ចូលបំពេញការងារព្រឹកឡើងតាមពេលកំណត់ ក៏ឃើញរូបព្រះពុទ្ធបដិមាធ្លាក់បាក់ តែស្រ្ដីជាភ្ញៀវទេសចរជន ជាតិ ញូវ ហ្សីឡែន រូបនេះ បានធ្វើដំណើរចាក់ចេញពីប្រទេសកម្ពុជា បាត់ទៅហើយ។

បើតាមការស្រង់សម្ដី ដែលចេញផ្សាយតាមសារព័ត៌មាន ញូវ ហ្សីឡែន ស្ដ្រីឈ្មោះ Willemijn Vermaat បានអះ អាងថា នាងយល់ថា រូបព្រះបដិមាមួយអង្គនោះ មិនមែនជាកម្មសិទ្ធិរបស់ប្រាសាទបាយ័ន។

នៅក្នុងរឿងហេតុនេះ លោក ប៊ុន ណារិទ្ធ អគ្គនាយកអាជ្ញាធរអប្សរា បានបញ្ជាក់ថា ទោះបីជាស្រ្ដីជនជាតិ ញូវ ហ្សី ឡែន Willemijn Vermaat បានធ្វើដំណើរទៅដល់ប្រទេសរបស់ខ្លួនវិញហើយក៏ដោយ ក៏អាជ្ញាធរអប្សរាតាមរយៈ មេធាវីរបស់ទីស្ដីការគណៈរដ្ឋមន្ដ្រី នឹងធ្វើការចាត់ការទៅតាមផ្លូវច្បាប់ ចំពោះករណីធ្វើឲ្យធ្លាក់បាក់រូបព្រះពុទ្ធបដិមា នៅប្រាង្គកណ្ដាល នៃប្រាសាទបាយ័ននេះ៕

សាលារាជធានីភ្នំពេញ ហៅការដង្ហែក្បួន របស់អង្គការ សង្គមស៊ីវិល ជាការបំពាន ស្មារតីកិច្ចប្រជុំ

ភ្នំពេញ៖ សាលារាជធានីភ្នំពេញ បានហៅការដង្ហែ ក្បួន របស់ក្រុមអង្គការ សង្គមស៊ីវិល យកញត្តិទៅកាន់បណ្តា ស្ថានទូត នៃប្រទេសម្ចាស់ហត្ថលេខី នៃកិច្ចចរចាសន្តិភាពទីក្រុងប៉ារីស (២៣-តុលា-១៩៩១) ដែលធ្វើនាព្រឹកថ្ងៃ ទី២៣ ខែតុលា ឆ្នាំ២០១៤នេះថា ជាការធ្វើបំពាន និងផ្ទុយទៅនិងស្មារតី នៃកិច្ចប្រជុំរួមគ្នា ធ្វើឲ្យខូចសណ្តាប់ធ្នាប់សាធារណៈ ផ្ទុយការនិងការណែនាំរបស់ក្រសួងមហាផ្ទៃ។

យោងតាមសេចក្តីថ្លែងដែលចេញផ្សាយនៅល្ងាចថ្ងៃទី២៣ ខែតុលា ឆ្នាំ២០១៤នេះ សាលារាជធានី ភ្នំពេញ បានថ្កោលទោស ចំពោះទង្វើ ដែលធ្វើផ្ទុយពីកិច្ចប្រជុំ ព្រមទាំងដាក់កំហិតឲ្យមេដឹកនាំក្បួនតវ៉ា ទទួលខុសត្រូវចំពោះមុខច្បាប់ ក្នុងករណីកើតមានបាតុភាពអសកម្មផ្សេងៗ។

សូមបញ្ជាក់ថា ក្រុមអង្គការ សង្គមស៊ីវិលមកពីបណ្តាញផ្សេងៗគ្នា ប្រមាណជា ១ពាន់នាក់ ដឹកនាំដោយលោក សៀ ភារម្យ លោក វន ពៅ លោក អ៉ី សារ៉ុម លោក រុង ឈុន និងលោកបណ្ឌិត ឡៅ ម៉ុងហៃ និង លោកបណ្ឌិត កែម ឡីផងនោះ បាននាំគ្នាដង្ហែភ្ជាប់ដោយលក្ខខណ្ឌទាមទារ ៥ចំណុច ទៅដាក់នៅស្ថានទូតប្រទេសហត្ថលេខី កិច្ចព្រមព្រៀងក្រុងប៉ារីស រួមមាន៖ ស្ថានទូតបារាំង អង់គ្លេស អាម៉េរិក យូអិន រដ្ឋភាជាតិ ជប៉ុន និង ចិន។

ក្នុងញត្តិនោះ គឺទាមទារឲ្យរាជរដ្ឋាភិបាល ក៏ដូចជាអ្នកនយោបាយនៅកម្ពុជា គោរពនូវស្មារតី នៃកិច្ចចរចាសន្តិភាព ទីក្រុងប៉ារីសថ្ងៃទី២៣ តុលា ១៩៩១។ ពួកគេបានចាត់ទុកថា រាជរដ្ឋាភិបាលនាពេលបច្ចុប្បន្នមិនទាន់គោរពបាន ពេញលេញនូវស្មារតី នៃកិច្ចប្រជុំនេះនៅឡើយទេ៕

ស្ថាបនិក Facebook បង្ហាញវត្តមាន និងសន្ទនាជាមួយ ក្រុមនិស្សិត នៅប៉េកាំង ដោយប្រើប្រាស់ ភាសាចិន

ប៉េកាំង៖ លោក Mark Zuckerberg ដែលគេស្គាល់ថា ជាស្ថាបនិកវ័យក្មេង បង្កើតបណ្តាញទំនាក់ទំនង សង្គមយក្ស (Facebook) បានបង្ហាញវត្តមាន និងជួបសន្ទនា ជាមួយក្រុមសិស្សនិស្សិត ដោយលើកជាសំនួរ ឆ្លងឆ្លើយ រយៈពេល ៣០នាទី នៅឯសាកលវិទ្យាល័យ Tsinghua នាទីក្រុងប៉េកាំង ប្រទេសចិន ។

ទូរទស្សន៍សិង្ហបុរី Channel News Asia ផ្សព្វផ្សាយនៅថ្ងៃទី២៣ ខែតុលា ឆ្នាំ២០១៤ថា ស្ថាបនិក និងជានាយក ប្រតិបត្តិ បណ្តាញទំនាក់ទំនង សង្គមយក្ស មានវត្តមាននៅក្រុងប៉េកាំង ហើយលោកបានជួបជាមួយ ក្រុមនិស្សិត នៅសាកលវិទ្យាល័យ Tsinghua ដោយបានលើកឡើងអំពី បច្ចេកវិទ្យាអ៊ីនធើណេត ។

បើផ្អែកតាមការ បង្ហោះខ្លឹមសារមួយនៅលើគេហទំព័រស្ថានិក រូបនេះបានឲ្យដឹងថា កិច្ចពិភាក្សាសំខាន់ក្នុង អំឡុង ពេល ដែលរូបលោកនៅក្រុងប៉េកាំង គឺនឹងលើកយកប្រធានបទមួយ "ស្តីអំពីបណ្តាញពិភពលោក " ក្នុងនោះ Internet.org និងការប្រើប្រាស់ បណ្តាញហ្វេសប៊ុក" ។

ក្នុងអំឡុងពេលជួប សន្ទនានោះដែរ លោក Zuckerberg បាននិយាយថា មូលហេតុមួយដែលរូបលោក ចង់រៀន អំពីភាសាចិនកុកងឺ គឺ ដើម្បីទំនាក់ទំនង ជាមួយសមាជិកនានាដែល ជាភរិយារបស់គ្រួសារលោក ដែលពួកគេ និយាយភាសា ម៉ង់ដារីនតែមួយគត់ ។

នេះជាការបង្ហាញខ្លួន ជាសាធារណៈ ដែលចង់បង្ហាញអំពីសមត្ថភាព របស់លោក ក្នុងរយៈពេល៤ឆ្នាំ អាច ប្រើប្រាស់ ភាសាចិនបាន ។

លោក Zuckerberg បាននិយាយថា លោកចង់ដឹងអំពីវប្បធម៌ របស់ចិន និងចង់រៀនអំពីភាសានេះ ព្រោះលោកមាន ចំណាប់អារម្មណ៍ ចំពោះភាសានេះណាស់ ។ ក្នុងឆ្នាំ២០១០ ការប្រើប្រាស់ភាសារបស់លោក វាស្ថិតក្នុងភាព មួយលំបាកណាស់ ដើម្បីរៀនឲ្យចេះភាសាចិន កុកងឺនេះ ។

សូមបញ្ជាក់ថា បើយោងតាមឯកសារដែល បង្ហាញឡើងដោយគេហទំព័រវីគីប៉េឌៀ បានបញ្ជាក់ថា ភាសាម៉ង់ដារីន ជាភាសាមួយដែល ពលរដ្ឋចិនប្រើប្រាស់ សម្រាប់ផ្លូវការ ហើយគិតត្រឹមឆ្នាំ២០១០ មានអ្នកចេះប្រើភាសានេះ ប្រមាណ៩៦០លាននាក់ នៅក្នុងប្រទេសមហាអំណាច សេដ្ឋកិច្ចទី២លើលោកមួយនេះ ។

តាមការបញ្ជាក់បន្ថែមទៀត ពីប្រវត្តិរបស់ភាសាកុកងឺនេះដែរ គេហទំព័រវីគីប៉េឌៀ បានបញ្ជាក់ថា អក្សរសាស្ត្រចិន ផ្គុំឡើងជាច្រើនតួ ហើយភាសានេះប្រើប្រាស់ ជាផ្លូវការសម្រាប់កិច្ចការទំនាក់ទំនង នៃប្រជាជាតិចិន ៕

សមត្ថកិច្ចចុះ ត្រួតពិនិត្យ លិខិតឆ្លងដែន និងស្នាក់នៅ របស់ជនជាតិ វៀតណាម នៅ ប្លុកសិប្បកម្ម បឹងត្របែក

ភ្នំពេញ ៖ កម្លាំងនគរបាលអគ្គអន្ដោ ប្រវេសន៍ក្រសួងមហាផ្ទៃ បានបន្ដប្រតិបត្ដិ ការរបស់ខ្លួន ចុះឆែកឆេរ កន្លែងរក ស៊ីនិងស្នាក់នៅរបស់ជនជាតិវៀតណាម នៅប្លុកសិប្បកម្មតាមបណ្ដោយផ្លូវលេខ៤៧៤ សង្កាត់បឹងត្របែក ខណ្ឌ ចំការមន ពោល ផ្លូវទល់មុខមជ្ឈមណ្ឌលកំសាន្ដរ៉ុក ។

ប្រតិបត្ដិការខាងលើនេះ បានធ្វើឡើង នៅវេលាម៉ោងប្រមាណ៣និង៥០នាទីរសៀលថ្ងៃទី២៣ ខែតុលា ឆ្នាំ ២០១៤នេះ ដោយសមត្ថកិច្ចបានឃាត់ សួរនាំបុរសជនជាតិវៀតណាម ដែលជាជាងសិប្បកម្មជាច្រើននាក់ តើថាពួកគេទាំងនេះ មានលិខិតឆ្លងដែននិងស្នាក់នៅត្រឹមត្រូវឬមួយយ៉ាងណានោះ ។

ប្រភពព័ត៌មានពីសមត្ថកិច្ច ដែលចូលរួម នៅក្នុងប្រតិបត្ដិការនេះ បានថ្លែងឱ្យដឹងថា ជាជំហានដំបូង សមត្ថកិច្ច បាននាំខ្លួនជនជាតិវៀតណាម ចំនួន១៥នាក់ ឆ្ពោះទៅអគ្គនាយកដ្ឋានអន្ដោប្រវេសន៍ ដើម្បីមានវិធានការណ៍ បន្តទៀត៕

បណ្តាញព័ត៌មាន

Wednesday, October 29, 2014

Monday, October 27, 2014

Thursday, October 23, 2014