ភ្នំពេញ ៖ លោកជឹម ស៊ីថា អធិការស្ដីទីនគរបាលខណ្ឌមានជ័យនៅរសៀលថ្ងៃទី១៩ ខែតុលា ឆ្នាំ២០១៤នេះបានចុះសាកសួរសុខទុក្ខ និងនាំយកនូវអំណោយជាគ្រឿងឧបភោគបរិភោគមួយចំនួនជូនដល់លោកអនុសេនីយ៍ឯកវ៉ែន ចាន់ថា ប្រធានផ្នែកសេនាធិការនគរបាលខណ្ឌមានជ័យ ដែលកំពុងមានជំងឺ និងជាមន្ត្រីចូលនិវត្តន៍ថ្មីៗ។
ក្នុងនោះដែរក៏មានការចូលរួមពីលោក កឹម រតនា អធិការរងខណ្ឌ លោកអនុសេនីយ៍ឯកម៉ៅ សាវឿន មេប៉ុស្តិ៍ស្ទឹងមានជ័យ លោកអនុសេនីយ៍ឯកទិត ចំរើន នាយផ្នែកនគរបាលសណ្ដាប់ធ្នាប់ចរាចរខណ្ឌ និងមន្ត្រីនគរបាលខណ្ឌមួយចំនួនផងដែរ។
លោកជឹម ស៊ីថាក៏បានធ្វើការសំណេះសំណាលនិងសួរសុខទុក្ខជាមួយក្រុមគ្រួសារ ក៏ដូចជាលោក វ៉ែន ចន្ថា ប្រធានសេនាធិការ នគរបាលខណ្ឌមានជ័យ ដែលបានចូលនិវត្តន៍កាលពីពេលថ្មីៗកន្លងមក ហើយកំពុងសម្រាកព្យាបាលជំងឺលើសឈាមដោយពិការមួយចំហៀងខ្លួនតាំងពីខែមករា ឆ្នាំ២០១៤មកម្ល៉េះ។ អំណោយដែលត្រូវបានផ្តល់ជូនរួមមាន ទឹកស៊ីអ៊ីវ ២យួរ ទឹកត្រី ២យួរ មី២កេស ត្រីខ២យួរ ស្ករស២កញ្ចប់ធំអង្ករ២បាវ និងថវិកាចំនួន៥៩ម៉ឺនរៀល។
ភរិយាលោកវ៉ែន ចន្ថា ក៏បានសម្តែងនូវសេចក្តីសោមនស្សរីករាយយ៉ាងក្រៃលែង រហូតស្រក់ទឹកភ្នែក ចំពោះការយកចិត្តទុកដាក់ និងចុះមកសួរសុខទុក្ខ ពីសំណាក់លោកអធិការស្ដីទីនគរបាលខណ្ឌមានជ័យ និងមន្ត្រីរួមការងារ ប្រកបដោយក្របសីលធម៌ត្រឹមត្រូវ និងច្បាស់លាស់ ធ្វើឲ្យប្រជាពលរដ្ឋក្នុងមូលដ្ឋានរស់នៅបានសុខដុមរមនាយ៉ាងក្រៃលែង។ លោកក៏បានបួងសួងសុំឲ្យបារមីរបស់សក្កទេវតាទាំងអស់ តាមជួយបីបាច់ថែរក្សា លោកជឹម ស៊ីថា ក៏ដូចជាមន្ត្រីនគរបាលក្រោមឱវាទទាំងអស់ក្នុងមូលដ្ឋានខណ្ឌមានជ័យ ឲ្យជួបតែពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូមបញ្ជាក់ផងដែរ នេះគឺជាសញ្ញាវិជ្ជមាន ក៏ដូចជាគំរូដ៏ល្អមួយសម្រាប់អធិការ ឬមន្ត្រីជាន់ខ្ពស់នគរបាលដទៃទៀត គួរយកតម្រាប់តាម អំពីការយកចិត្តទុកដាក់ចំពោះកម្លាំងមន្ត្រីនគរបាលចូលនិវត្តន៍ទាំងអស់ ដែលធ្លាប់មានស្នាដៃល្អក្នុងការបំពេញភារកិច្ច ក៏ដូចជាកាតព្វកិច្ច ហើយក៏ជាជ្រុងមួយក្នុងការការពារ និងថែរក្សាសន្តិសុខ សណ្ដាប់ធ្នាប់ជូនប្រទេសជាតិនាពេលកន្លងមកផងដែរ។ កុំមើលឃើញតែមន្ត្រីបម្រើការងារបាន ហើយបែរជាបោះបង់មន្ត្រីនគរបាលដែលមានជំងឺប្រគល់ទៅឲ្យក្រុមគ្រួសារជាអ្នកទទួលរ៉ាប់រងពេលដែលធ្វើការលែងបាននោះ៕