ភ្នំពេញ ៖ លោក ហ៊ុន សែន បានប្រាប់គណៈប្រតិភូ ក្រុមប្រឹក្សាធុរកិច្ច US-ASEANថា កម្ពុជាមានវិស័យអាទិភាពជាច្រើន ដែលបាននិងកំពុងតែអនុវត្តន៍នោះ។
លោក អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា នៅពេលអនុញ្ញាតឲ្យគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន ចូល ជួបសម្តែងការគួរសមនៅវិមានសន្តិភាពក្នុងរាជធានីភ្នំពេញ កាលពីថ្ងៃទី០៤ខែកញ្ញា ឆ្នាំ២០១៤ សម្តេចតេជោនាយករដ្ឋមន្ត្រីបានជម្រាបជូនគណៈប្រតិភូទាំងមូលអំពីអាទិភាពរបស់កម្ពុជា ក្នុងនោះទី១គឺការបណ្តុះបណ្តាលធនធានមនុស្ស ដែលជាអាទិភាពចម្បង ទី២ជំរុញការអភិវឌ្ឍន៍លើវិស័យកសិកម្មដោយផ្តោត ការយកចិត្តទុកដាក់ទៅលើការស្តារប្រព័ន្ធស្រោចស្រព ទី៣ការកសាងហេដ្ឋារចនាសម្ព័ន្ធដឹកជញ្ជូន និង ទូរគមនាគមន៍ និង ទី៤ការស្ថាបនាថាមពលអគ្គិសនី។ សម្តេចតេជោនាយករដ្ឋមន្ត្រីមានប្រសាសន៍បន្តថា កម្ពុជាកំពុងតែប្រែទិស នៃការអភិវឌ្ឍន៍ ពោលគឺបន្ថែមទៅលើការជំរុញការវិនិយោគលើវិស័យឧស្សាហ កម្មអតិពលកម្មតាមរយៈឧស្សាហកម្មកែច្នៃ។
លោកជំទាវ Kathleen Santillo នាយកគម្រោងប្រចាំតំបន់ នៃក្រុមប្រឹក្សា ធុរកិច្ចសហរដ្ឋអាមេរិកមានប្រសាសន៍ថា លោកជំទាវបាននាំមកនូវអ្នកវិនិយោគ អាមេរិក-អាស៊ានមកកាន់ប្រទេសកម្ពុជានៅពេលនេះក្នុងគោលបំណងទី១ដើម្បី ស្វែងយល់ពីអាទិភាពរបស់រាជរដ្ឋាភិបាលកម្ពុជា ទី២ដើម្បីចូលរួមចំណែកក្នុង ការវិនិយោគលើវិស័យឯកជនផង និងវិស័យសាធារណៈផង និង ទី៣ដើម្បី ចូលរួមក្នុងវិស័យឧស្សាហកម្មខ្នាតតូច និងមធ្យម ជាពិសេសនៅក្នុងបណ្តាប្រទេសអាស៊ាន និងការងារដទៃទៀត។
ឯកឧត្តម វីលៀម ខត ឯកអគ្គរដ្ឋទូតអាមេរិកប្រចាំកម្ពុជា បានជម្រាបជូន សម្តេចតេជោនាយករដ្ឋមន្ត្រីដែរថា ក្នុងឆ្នាំខាងមុខនេះ ទិសដៅរបស់ឯកឧត្តម គឺធ្វើយ៉ាងណាលើកស្ទួយអ្នកវិនិយោគទុនអាមេរិកមកកាន់កម្ពុជា ក្នុងគោលបំណង ដើម្បីបង្កើនការងារផង និង ដើម្បីបង្កើនប្រាក់ចំណូលជូនដល់ប្រជាជន កម្ពុជាផងដែរ៕