ភ្នំពេញ ៖ លោកឧត្តមសេនីយ៍ ហ៊ុន ម៉ាណែត មេបញ្ជាការកម្លាំងពិសេសប្រឆាំងភេរវកម្ម និងជាមេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ហើយជាបុត្រាច្បងរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានោះ បានប្រាប់ឲ្យស្ថាប័នសារព័ត៌មានចំនួន២ បញ្ឈប់ការចាប់អារម្មណ៍ទៅលើការពាក់ឋានន្តរសក្ដិ ហើយងាកមកចាប់អារម្មណ៍លើការអនុវត្តការងារនៅក្នុងស្ថាប័ន ដែលលោកកំពុងធ្វើការវិញ។
លោកឧត្តមសេនីយ៍ ហ៊ុន ម៉ាណែត លើកឡើងបែបនេះ បន្ទាប់ពីវិទ្យុអាស៊ីសេរី និងសារព័ត៌មានដើមត្នោត ដែលមហាជនទូទៅមើលឃើញដឹង ស្គាល់ យល់ថា ជាប្រព័ន្ធព័ត៌មានឯករាជ្យខាងប្រឆាំងបានព្យាយាមផ្សាយព័ត៌មានពាក់ព័ន្ធលោកឧត្តមសេនីយ៍ ជាពិសេសរឿងតួនាទី និងឋានន្តរស័ក្តិ ហើយព្យាយាមភ្ជាប់ទៅបញ្ហាផ្សេងៗទៀត ដែលមិនមែនជារឿងពិត ។ ជាមួយគ្នានោះ លោកឧត្តមសេនីយ៍បានអះអាងថា សាព័ត៌មានទាំងនោះ កំពុងធ្វើជ្រុលហួសព្រំដែនរបស់អ្នកសារព័ត៌មានក្នុងករណីនេះផងដែរ និងបានសំណូមពរឲ្យប្រព័ន្ធព័ត៌មានទាំងនោះ កុំទៅរំខានថ្នាក់ដឹកនាំ ឈប់រំខានទាក់ទងរឿងសក្តិរបស់លោកតទៅទៀត ពីព្រោះលោកឧត្តមសេនីយ៍មានភារកិច្ចច្រើនផ្សេងទៀត ដែលត្រូវធ្វើ។
លោកឧត្តមសេនីយ៍ ហ៊ុន ម៉ាណែត បានសរេសរនៅក្នុងហ្វេសប៊ុករបស់ខ្លួនយ៉ាងនេះថា “សួរស្តីមិត្តទាំងអស់គ្នា! ខ្ញុំសូមយកពេលបន្តិចដើម្បីបញ្ចេញមតិខ្លីឆ្លើយតបទៅនឹងប្រធានបទមួយ ដែលបានផ្សព្វផ្សាយជាច្រើនដងនៅតាមបណ្តាសារពត៌មានមួយចំនួនក្នុងពេលកន្លងមកទាក់ទងនឹងឋានន្តរសក្តិរបស់ខ្ញុំ។ វិទ្យុអាស៊ីសេរី ប៉ុន្មានថ្ងៃមុនបោះឆ្នោតជ្រើសរើសតំណាងរាស្ត្រឆ្នាំ២០១៣ បានផ្សាយព័ត៌មានមួយដែលថា ខ្ញុំត្រូវបានដំឡើងជានាយឧត្តមសេនីយ៍ផ្កាយមាសបួន។ ពេលថ្មីៗនេះសារព័ត៌មានដើមត្នោតបានផ្សាយព័ត៌មានម្តងហើយម្តងទៀតទាក់ទងនឹងការពាក់សក្តិរបស់ខ្ញុំដោយអ្នកសរសេរបានខិតខំស្រាវជ្រាវរកឯកសារតែងតាំងពីក្រសួងការពារជាតិមកបង្ហាញ។ អ្វីដែលធ្វើឲ្យខ្ញុំសម្រេចចិត្តបញ្ចេញមតិឆ្លើយតបនៅពេលនេះគឺ ប៉ុន្មានថ្ងៃមុននេះសារព័ត៌មានដើមត្នោតបានសរសេរលិខិតទៅថ្នាក់ដឹកនាំរបស់ខ្ញុំ និងទាមទារឲ្យគាត់បកស្រាយពីរឿងខ្ញុំ ដែលខ្ញុំគិតថានេះជាការធ្វើជ្រុលហួសព្រំដែនរបស់អ្នកសារព័ត៌មានក្នុងករណីនេះ”។
លោកឧត្តមសេនីយ៍ ហ៊ុន ម៉ាណែត សរសេរទៀតថា “នេះជាការឆ្លើយតបរបស់ខ្ញុំ: ជាដំបូងខ្ញុំសូមថ្លែងអំណរគុណចំពោះវិទ្យុ អាស៊ីសេរី និង សារព័ត៌មានដើមត្នោតដែលបានយកចិត្តទុកដាក់តាមដានរឿងសក្តិរបស់ខ្ញុំ ហើយមានកង្វល់ខ្លាចខ្ញុំពាក់សក្តិមិនគ្រប់។ តែនេះមិនមែនជាកង្វល់ ឬការផ្តោតអារម្មណ៍របស់ខ្ញុំទេ ហេតុដូច្នេះលោកមិនចាំបាច់តាមដានច្រើនលើរឿងនេះទៀតទេ ប៉ុន្តែបើលោកចាប់អារម្មណ៍ខ្លាំងលើរឿងការងាររបស់ខ្ញុំ លោកគួរបង្វែរអារម្មណ៍ពីថាតើថ្ងៃនេះ ហ៊ុន ម៉ាណែត មានពាក់ផ្កាយប៉ុន្មាននៅលើស្មា ទៅសួរថាតើ ហ៊ុន ម៉ាណែត បានធ្វើអ្វីខ្លះដើម្បីបំពេញតួនាទី និងភារកិច្ចរបស់ខ្លួន ជាមេបញ្ជាការកម្លាំងពិសេសប្រឆាំងភេរវកម្ម ជាមេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ដែលនេះជាការងារដែលខ្ញុំផ្តោតអារម្មណ៍នាពេលបច្ចុប្បន្នខ្លាំង។ សូមស្រាវជ្រាវមើល ថាតើ ហ៊ុន ម៉ាណែត បានធ្វើអ្វីខ្លះដើម្បីចូលរួមក្នុងការកសាងសមត្ថភាពកម្លាំងជាតិប្រឆាំងភេរវកម្មចាប់ផ្តើមតាំងពីចំណុចសូន្យ៦ ឆ្នាំមុន ដែលពេលនោះកម្ពុជាមិនទាន់មានកម្លាំងជំនាញប្រឆាំងភេរវកម្ម ឲ្យក្លាយជាកម្លាំងមួយ ដែលបណ្តាថ្នាក់ដឹកនាំកងទ័ពបរទេសបានវាយតម្លៃថាជាកម្លាំងលំដាប់ទីមួយនៅក្នុងតំបន់ ដោយផ្អែកលើសមត្ថភាពជំនាញប្រឆាំងភេរវកម្ម និងជាកម្លាំងមួយ ដែលបានចូលរួមចំណែកយ៉ាងសកម្មក្នុងការដោះស្រាយយថាហេតុផ្សេងៗដើម្បីធានាសន្តិសុខជូនប្រជាពលរដ្ឋ ក៏ដូចជាថ្នាក់ដឹកនាំជាតិនិងអន្តរជាតិសំខាន់ៗនាពេលកន្លងមក”។
សូមស្រាវជ្រាវមើលផងដែរថាតើខ្ញុំបានបំពេញតួនាទីរបស់ខ្ញុំជានាយរងសេនាធិការចម្រុះ និងមេបញ្ជាការរងកងទ័ពជើងគោកចូលរួមចំណែកអ្វីខ្លះជាមួយថ្នាក់ដឹកនាំកងទ័ព ក្នុងការដោះស្រាយបញ្ហាប្រឈម ក៏ដូចជាការរៀបចំយុទ្ធសាស្ត្រការពារជាតិសម្រាប់អនាគត ជាពិសេសទាក់ទងនឹងការកសាងប្រៀបការពារជាតិ ការពង្រឹងនាយទាហានវ័យក្មេងសម្រាប់ការបន្តវេនការពារជាតិនាពេលអនាគត ការលើកស្ទួយកម្រិតជីវភាពរស់នៅរបស់កងទ័ព និងគ្រួសារទ័ព ការយកចិត្តទុកដាក់ទៅលើយោធិនចូលសោធននិវត្ត ពលី មរណ: និងការងារមួយចំនួនផ្សេងទៀត ហើយបើការស្រាវជ្រាវរបស់លោករកឃើញនូវចំណុចខ្វះខាតរបស់ខ្ញុំក្នុងការបំពេញតួនាទី និងភារកិច្ចរបស់ខ្ញុំ សូមមេត្តាប្រាប់ខ្ញុំផង ហើយបើលោកអាចផ្តល់ជាមតិយោបល់ទាក់ទងការកែលំអចំណុចខ្សោយទាំងនោះខ្ញុំកាន់តែអរគុណលោកច្រើន។ ខ្ញុំក៏សូមសំណូមពផងដែរ សូមលោកកុំទៅរំខានថ្នាក់ដឹកនាំរបស់ខ្ញុំទៀតទាក់ទងរឿងសក្តិរបស់ខ្ញុំ។ សូមអរគុណ!៕