ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថាចាប់ពីពេលនេះ តទៅ វត្តមានមន្ត្រីរាជការនៅក្នុងក្រសួងការងារ បណ្តុះបណ្តាល និងវិជ្ជាជីវៈ ត្រូវបានរឹតបន្តឹងខ្ពស់ ហើយ មន្ត្រីរាជការណាដែលមិនមកធ្វើការ ឬអវត្តមានច្រើននៅក្នុង អង្គភាព នឹងមិនមានការបើកប្រាក់បៀវត្សជូនឡើយ។
លោករដ្ឋមន្ត្រីបានលើកឡើងបែបនេះនៅក្នុងសារលិខិតមួយចុះផ្សាយកាលពីថ្ងៃទី៨ ខែកញ្ញា កន្លងទៅនេះ។
លោករដ្ឋមន្ត្រីបានមានប្រសាសន៍នៅក្នុងសាលិខិតនោះទៀតថា «ប្រធានអង្គភាព ឬមន្ត្រីណាម្នាក់ ដែលបើកប្រាក់បៀវត្សមន្ត្រីដែលមិនមកធ្វើការ ត្រូវទទួល ខុសត្រូវចំពោះមុខច្បាប់។ ក្នុងករណីអង្គភាពប្រឆាំងអំពើពុករលួយរកឃើញ មន្ត្រីដែលពាក់ ព័ន្ធ ត្រូវទទួលខុសត្រូវចំពោះមុខច្បាប់ដោយខ្លួនបុគ្គលនោះផ្ទាល់»។
យោងតាមខ្លឹមសារក្នុងលិខិតដដែលនោះបានបញ្ជាក់ថា ចំណាត់ការនេះធ្វើឡើងក្នុងគោលបំណងចូលរួម សកម្មភាពកំណែទម្រង់ស៊ីជម្រៅរបស់រដ្ឋាភិបាលអាណត្តិទី៥នេះ។ ក្រៅពីប្រកាសមិនឲ្យប្រធានអង្គភាពមួយៗ បញ្ឈប់ផ្តល់ប្រាក់បៀវត្សរ៍ដល់មន្ត្រីរាជការ ដែលមិនបានមកធ្វើការ ហើយនោះ រដ្ឋមន្ត្រីក្រសួងការងារ ក៏បានឲ្យមន្ត្រីក្រោមឱវាទទាំងអស់ ធ្វើការត្រួតពិនិត្យ និង ពង្រឹងវត្តមានមន្ត្រីក្នុងអង្គភាពមួយៗឡើងវិញ។ មួយទៀតប្រធាននាយកដ្ឋាន ប្រធានមន្ទីរ និង ប្រធានការិយាល័យ ត្រូវទទួលខុសត្រូវ ចំពោះមន្ត្រីក្រោមឱវាទណា ដែលមិនមកធ្វើការទៀងទាត់ ឬអវត្តមានគ្មានមូលហេតុ ត្រូវរាយការណ៍មកថ្នាក់លើ ដើម្បីសុំទៅក្រសួងចាត់វិធានការតាមផ្លូវច្បាប់។ គួររំលឹក ថា មិនមានតែក្រសួងការងារមួយទេ ដែលផ្ដើមពង្រឹងវត្តមានមន្ត្រីអំឡុង ពេលធ្វើការ នៅតាមក្រសួងមួយចំនួន ក៏បានធ្វើដូចគ្នានេះដែរ តួយ៉ាងដូចជាក្រសួងមុខងារ សាធារណៈជាដើម៕