សៀមរាប ៖ យោងតាមរបាយការណ៍សង្ខេបប្រចាំខែរបស់មន្ទីរពេទ្យគន្ធបុប្ផាក្នុងខែតុលា បានបង្ហាញថា នៅក្នុងរយៈពេល០១ខែនៅខែតុលានេះ មានស្ត្រីជិត២ពាន់ដែលខ្លួនបានធ្វើការសម្រាលកូននៅអាគារសម្ភពនៃមន្ទីរពេទ្យជ័យវរ្ម័នទី០៧ ឬគន្ធបុប្ផា០៣ ខេត្តសៀមរាប។
ផ្នែកសម្ភពសាខាសៀមរាប ក្នុងខែតុលា មានស្ត្រីចំនួន១១,៧០៨ ដែលមកទទួលសេវាពិនិត្យតាមដានផ្ទៃពោះនិងមាន១,៨៦៤ បានសម្រាលកូនប្រកបដោយជោគជ័យ។ កុមារដែលមានជំងឺធ្ងន់ ត្រូវព្យាបាលផ្នែកពិគ្រោះជម្ងឺខាងក្រៅ សរុបមានចំនួន៦៩,២៣៦នាក់ ជំងឺធ្ងន់ដាក់ព្យាបាលក្នុងពេទ្យមាន១៣,៥៤៦នាក់ វះកាត់ផ្នែកសល្យសាស្ត្រចំនួន១,៦៩៣នាក់ ក្នុងនោះវះកាត់បេះដូងចំនួន២៨នាក់។ នេះតួលេខអ្នកជំងឺដែលមានមកព្យាបាលក្នុងមន្ទីរគន្ធបុប្ផាទាំងរាជធានី និងខេត្តសៀមរាប។
យោងតាមរបាយការណ៍ដែលចេញផ្សាយកាលពីថ្ងៃទី០១ ខែវិច្ឆិកា បានបញ្ជាក់ថា មានអ្នកជំងឺរលាកខួរក្បាលធ្ងន់ធ្ងរចំនួន៥០២ករណី ដែលបានពិនិត្យឃើញនិងមានកុមារចំនួន២៨,៣៨៧បានទទួលវ៉ាក់សាំងការងារជំងឺនេះ។ ក្នុងមួយថ្ងៃពេទ្យនេះបានចំណាយប្រាក់ប្រមាណ១២ម៉ឺនដុល្លារ សហរដ្ឋអាមេរិក ដើម្បីផ្គត់ផ្គង់រាល់សេវាកម្មព្យាបាលទាំងអស់។ ថ្មីៗនេះមន្ទីរគន្ធបុប្ផាទី០៣ នៅ ខេត្តសៀមរាប ទើបនឹងក្លាយនាយកដ្ឋានដំបូងគេ ដែលមានសាខានៅតាមខេត្ត។ ហើយអ្វីដែលពិសេសជាងគេនោះសាខានេះមានអាគារសម្ភព និងអាគារផ្នែកវះកាត់បេះដូងកុមារ។
ចាប់តាំងពីពេលដំណើរការឡើងវិញ នៅឆ្នាំ១៩៩១ រហូតមកដល់ពេលនេះ មន្ទីរពេទ្យគន្ធបុប្ផាមានសាខាសរុបចំនួន០៥សាខាហើយ គឺទី០១-ស្ថិតនៅក្នុងបរិវេណព្រះបរមរាជវាំង សាខា ០៣ទៀតនៅម្ដុំវត្តភ្នំ និងសាខាចុងក្រោយនៅក្រុងសៀមរាប គឺមន្ទីរពេទ្យកុមារជ័យវរ្ម័នទី០៧ ដែលសាខាទាំងអស់នៅក្រោមការគ្រប់គ្រងរបស់វេជ្ជបណ្ឌិតជនជាតិស្វីស ឯកទេសផ្នែកជំងឺកុមារ គឺលោកវេជ្ជបណ្ឌិត បេអាត រិឆណឺរ (Beat Richner) ជាប្រធាន។ រហូតមកដល់ពេលនេះ តម្រូវការថវិកាសម្រាប់ដំណើរការមន្ទីរពេទ្យគឺ៣០លានដុល្លារក្នុងមួយឆ្នាំ។
នៅក្នុងឆ្នាំ២០១០ កុមារជិត១,៥លាននាក់ បានចូលសម្រាកព្យាបាលនៅក្នុងសាខាទាំង០៥ នៃមន្ទីរពេទ្យគន្ធបុប្ផា ព្រមទាំងបានទទួលសេវាព្យាបាលសេវាវះកាត់ និងទទួលវ៉ាក់សាំងពីមន្ទីរពេទ្យនេះ។ ដោយឡែកស្ត្រីមានផ្ទៃពោះជាង១០ម៉ឺននាក់ បានទទួលសេវាពិនិត្យ និងសម្រាលកូន។ បើគ្មានមន្ទីរពេទ្យគន្ធបុប្ផាទេ កុមារចំនួន៣.២០០នាក់នៅកម្ពុជា នឹងត្រូវបាត់បង់ជីវិតជារៀងរាល់ខែ។
កន្លងទៅ ថវិកាសម្រាប់ដំណើរការមន្ទីរពេទ្យ គឺបានមកពីការខិតខំរបស់លោកវេជ្ជបណ្ឌិត បេអាត រិឆណឺរ តាមរយៈការអំពាវនាវសុំជំនួយពីសប្បុរសជន ដោយលោកកូដវីយោឡុង ក្នុងការប្រគំតន្ត្រីផង ប៉ុន្តែពេលនេះលោកមានអាយុ៦៥ឆ្នាំហើយ។ គេហទំព័ររបស់មន្ទីរពេទ្យគន្ធបុប្ផា បានឲ្យដឹងថា រហូតមកដល់ពេលនេះមន្ទីរពេទ្យទទួលប្រាក់បរិច្ចាគចំនួន២លានដុល្លារពីរដ្ឋាភិបាលកម្ពុជា៤លានដុល្លារពីរដ្ឋាភិបាលស្វីស និង២២លានដុល្លារពីសប្បុរសជននានាជារៀងរាល់ឆ្នាំ ហើយក្នុងរយៈពេលពេល២០ឆ្នាំកន្លងទៅនេះ ថវិកាចំនួន៤០០លានដុល្លារត្រូវបានចំណាយសម្រាប់ដំណើរការមន្ទីរពេទ្យ៕