ភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានលើកឡើងថា ក្នុងប្រទេសប្រជាធិបតេយ្យ មិនអាចផ្ទេរអំណាចពីឪពុកទៅកូនបានទេ លើកលែងតែមានការបោះឆ្នោតពីប្រជាពលរដ្ឋ ។
សម្តេចតេជោ សែន បានលើកឡើងបែបនេះ នៅក្នុងឱកាសបិទសន្និសិទ្ធអន្តរជាតិលើកទី ៥ ស្តីពី“ភាពអ្នក ដឹកនាំបញ្ញាវ័ន្តឆ្នើម ២០១៤” ដែលកម្ពុជាបានធ្វើជាម្ចាស់ផ្ទះ ហើយពិធីបិទស្ថិតនៅក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅសណ្ឋាគារសូហ្វី តែលភ្នំពេញ កាលពីថ្ងៃទី ០៦ ខែសីហា ឆ្នាំ២០១៤ កន្លងទៅនេះ ។
សម្តេចតេជោ បានបញ្ជាក់ថា ប្រទេសនៅលើពិភពលោក ដែលអនុវត្តនូវលទ្ធិប្រជាធិបតេយ្យតាមរយៈនៃ ការបោះឆ្នោត តើការផ្ទេរតំណែងបែបណាទៅដល់កូនបាននោះ ? ក្នុងន័យនេះ សម្តេចបញ្ជាក់ថា ក្នុងប្រទេសប្រជា ធិបតេយ្យមិនអាចផ្ទេរអំណាចពីឪពុកទៅកូនបានទេ លើកលែងតែមានការបោះឆ្នោតគាំទ្រពីប្រជាពលរដ្ឋ ។ សម្តេចបន្តថា ក្នុងនាមជានាយករដ្ឋមន្ត្រី សម្តេចអាចដាក់កូនអ្នកនេះអ្នកនោះ ទៅក្នុងតំណែងជួរដ្ឋាភិបាលបាន ប៉ុន្តែសម្តេចលំបាកមិនអាចដាក់កូនខ្លួនឯងបាន ព្រោះវានិងអាចមានការចោទជាសំណួរថា រៀបចំតាមបក្ខពួកនិយម ។
ការលើកឡើងរបស់សម្តេចតេជោ ទំនងប្រតិកម្មតបតជាមួយទៅនឹងកាសែត ឌឺណេសិន របស់ថៃ ។ កាសែតនេះបានសរសេរពាក់ព័ន្ធទៅនឹងកូនប្រុសច្បងរបស់សម្តេច គឺលោកឧត្តមសេនីយ៍ ហ៊ុន ម៉ាណែត ដែលបានធ្វើ ទស្សនកិច្ចប្រទេសថៃ នាពេលកន្លងទៅថ្មីៗនេះ ជាមួយលោកឧបនាយករដ្ឋមន្ត្រីការពារជាតិ ទៀ បាញ់ ។ កាសែត ឌឺណេសិន របស់ថៃសរសេរថា នេះជាការបង្ហាញកាន់តែច្បាស់ថា ហ៊ុន ម៉ាណែត និងក្លាយជាអ្នកស្នងតំណែងរបស់ នាយករដ្ឋមន្ត្រី ហ៊ុន សែន ប្រាកដណាស់ ។
សម្តេចបានគូសបញ្ជាក់បន្តថា ដើម្បីជំនះមន្ទិល ដែលថាកូនប្រុសឡើងថ្លែងសុន្ទរកថា ហើយហៅឪពុក ឡើង ថ្លែងសុន្ទរកថា បន្តនោះ ។ សម្តេចតេជោ បន្តថា វាជាការលំបាកណាស់ សម្រាប់ខ្ញុំ នៅក្នុងឋានៈជានាយករដ្ឋមន្ត្រី របស់ប្រទេសនេះ ហើយខ្ញុំគិតថា អ្នកដឹកនាំមួយចំនួនក៏មានការលំបាកដូចខ្ញុំដែរ ប៉ុន្តែសម្រាប់ខ្លួនខ្ញុំ គឺការលំបាកនោះ វាច្រើនជាងអ្នកដទៃ ។
សម្តេចបន្តថា “កាលពីអតីតកាលខ្ញុំមានបងប្រុសម្នាក់ គឺលទ្ធភាពរបស់គាត់ស្ទើរតែខ្ពស់ជាងខ្ញុំ ប៉ុន្តែជាអកុសល ដោយសារតែកាន់តំណែងជានាយករដ្ឋមន្ត្រីរបស់ខ្ញុំ គឺក្លាយទៅជាឧបសគ្គរារាំងបងប្រុសមួយនេះ នៅត្រឹមកម្រិតអភិបាលខេត្ត ហើយចូលនិវត្តន៍ មិនអាចក្លាយជាសមាជិករាជរដ្ឋាភិបាលបានទេ” ។
សម្តេចបានបន្តថា ឥឡូវនេះសម្តេចមានកូន ៥នាក់ និងកូនប្រសារ ៥នាក់ទៀត ដែលសុទ្ធតែរៀននៅឧត្តម សិក្សា និងក្រោយឧត្តមសិក្សា ក៏ប៉ុន្តែពួកគេ ពិតជាមានការលំបាក ។ យើងមិនអាចបញ្ចូលពួកគេទៅក្នុងក្របខណ្ឌ នៃកិច្ចការរដ្ឋបានទេ ព្រោះវាអាចនិងនាំឱ្យមានការចោទជាសំណួរថា តើនេះ គឺជាការរៀបចំបែបបក្ខពួកនិយម ឬយ៉ាងម៉េច ? ។ សម្តេចបានលើកឡើងទៀតថា វាមិនមែនជាបញ្ហាដាច់ដោយឡែករបស់គណបក្សនៅក្នុងរាជរដ្ឋា ភិបាលនោះទេ ។
ព្រឹកមិញនេះ អត្ថបទកាសែតរបស់ភ្នំពេញប៉ុស្តិ៍ ក៏បានចុះផ្សាយអំពីកូនរបស់មេដឹកនាំគណបក្សប្រឆាំង ដែលនិងត្រូវរៀបចំខ្លួន ចូលទៅកាន់តំណែងជាសមាជិករបស់គណៈកម្មការជាតិរៀបចំការបោះឆ្នោត ដែលគ្រាន់តែ ឮបែបនេះ គឺមានការទិះទៀនដែរ ។
សម្តេចបានបន្តបន្ថែមទៀតថា “ដូចនេះការធ្វើជាឪពុកម្តាយ ប្រាកដជាមានការលំបាកណាស់ សម្រាប់រៀបចំ អនាគតកូន សូម្បីតែថ្មីៗនេះ កូនប្រសារស្រីរបស់ខ្ញុំ បន្ទាប់ពីបញ្ចប់បណ្ឌិតផ្នែកសុខភាព នៅចក្រភពអង់គ្លេស បន្ទាប់ ពីបញ្ចប់បរិញ្ញាបត្រជាន់ខ្ពស់នៅសហរដ្ឋអាមេរិក ប៉ុន្តែឥឡូវគេមិនអាចចូលធ្វើការងាររដ្ឋបានទៅទៀត អីចឹងទេ សូមកូនៗ ធ្វើការងារមនុស្សធម៌វិញ” ៕