នៅក្នុងថ្ងៃទី១មានបងប្អូនប្រជាពលរដ្ឋ ដែលមានអាការៈឈឺក្បាល វិលមុខ និងរងរបួសផ្សេងៗមក ទទួលការព្យាបាលនៅតាមតង់ចំនួន ១២៥០នាក់។ បើបូកក្នុងរយៈពេល២យប់ ២ថ្ងៃ នៃថ្ងៃបុណ្យអុំទូកនេះ មានប្រមាណជិត៣ពាន់នាក់ ដែលចូលមកទទួលយកការព្យាបាល។
កាលពីថៃ្ងទី៤ វិច្ឆិកា ដែលជាថ្ងៃមុនការចាប់ផ្តើមប្រារឰពិធីបុណ្យអុំទុកមួយថ្ងៃ ក្រុមគ្រូពេទ្យចល័ត និងគ្រូពេទ្យប្រចាំការនៅតាមប៉ុស្តិ៍និមួយៗ បានពិនិត្យជំងឺបាន១០០៧នាក់ ក្នុងនោះកាប់គ្នារបួស១នាក់ លង់ទឹក១នាក់ជាកីឡាករអុំទូកបញ្ចូនទៅមន្ទីរពេទ្យកាល់ម៉ែត្រ ប៉ុន្តែគ្មានអ្នកស្លាប់នោះទេ។
បើតាមលោក ឡុង ឌីម៉ង់ អ្នកនាំពាក្យសាលារាជធានីភ្នំពេញបាន ថ្លែងឲ្យដឹងកាលពីថ្ងៃទី៦ វិច្ឆិកាថា ចំនួនប្រជាពលរដ្ឋចូលរួមនៅថ្ងៃទី២ នៃព្រះរាជពិធីបុណ្យអុំទូកមានប្រមាណជាង៣០ម៉ឺននាក់។ ចំនួននេះគឺកើនឡើងប្រហែល ៣ដង បើធៀបទៅនឹងថ្ងៃទី១ ដែល មានប្រមាណតែ ១០ម៉ឺននាក់ប៉ុណ្ណោះ។
អាជ្ញាធររាជធានីភ្នំពេញ និងស្ថាប័នពាក់ព័ន្ធបានបានរៀបចំសេវាសុខភាពចំនួន១២ទីតាំងដើម្បីជួយព្យាបាលជំងឺដង្កាត់ផ្សេងៗជូនដល់បងប្អូនប្រជាពលរដ្ឋដែលបានមកចូលរួមទស្សនានៅក្នុងពិធីបុណ្យអុំទូក អកសំបុក សំពះព្រះខែ និងបណ្តែតប្រទីប។
ចំពោះទីតាំងដែលមានសេវាសុខភាព ចំនួន១២កន្លែងមានដូចជា ១. នៅវត្តភ្នំ ម្តុំ CDC មួយកន្លែង២.នៅមាត់ទន្លេម្តុំមុខវណ្ណឧណ្ណាលោម មួយកន្លែង៣. នៅមាត់ទន្លេ ម្តុំព្រះអង្គដងកើរ មួយកន្លែង៤. នៅសួនច្បារមុខព្រះបរមរាជវាំងពីរកន្លែង ៥.នៅសាលមហោស្រពចតុមុខមួយកន្លែង៦. នៅមុខសណ្ឋាគារ ហ៊ីម៉ាវ៉ារី មួយកន្លែង៧. នៅម្តុំសួន ច្បារ មុខវត្តបុទុមវត្តី មួយកន្លែង៨. នៅសួនច្បារ សម្តេច ហ៊ុន សែន មួយកន្លែង៩. នៅត្រើយខាង កើត ម្តុំវត្តប្រជុំសាគរ មួយកន្លែង១០ . នៅត្រើយខាងកើត ម្តុំក្បាលជ្រោយសាគរ មួយកន្លែង១១. នៅកោះពេជ្រ មុខអគារសាល មហោស្រព កោះពេជ្រ មួយកន្លែង១២. នៅកោះពេជ្រ ក្រោយអគារសាលមហោស្រព កោះពេជ្រ មួយកន្លែង។
គួរបញ្ជាក់ថា មន្ទីរសុខាភិបាលរាជធានីបានដាក់ពង្រាយក្រុមគ្រូពេទ្យ នៅតាមគោលដៅសរុប១០ទីតាំង មានរថយន្តAmbulance ៣១គ្រឿង បុគ្គលិកសុខាភិបាលចូលរួមសង្គ្រោះ៥៩៧នាក់ ក្រុមគ្រូពេទ្យចល័ត១០ក្រុម មាន៥០នាក់ ក្រុមអប់រំផ្សព្វផ្សាយអនាម័យចំណីអាហារ៩នាក់ មួយក្រុម៣នាក់ មាន៣ក្រុម ក្រុមផ្សព្វផ្សាយទប់ស្កាត់ជំងឺអេដស៍១០នាក់។ ក្រៅពីក្រុមគ្រូពេទ្យរបស់ក្រសួងសុខាភិបាល និងមន្ទីរសុខាភិបាលរាជធានីភ្នំពេញ ក៏មានការចូលរួមពីយុវជនស្ម័គ្រចិត្តកាកបាទក្រហម រាជធានីមាន១០កន្លែង ១កន្លែង៤នាក់ ដើម្បីសង្គ្រោះ និងមានរថយន្តសង្គ្រោះរបស់មន្ទីរពេទ្យង-៧០ចំនួន ៤គ្រឿងចូលរួមផងដែរ៕