កំពូលអ្នកប្រដាល់Manny Pacquiao ដែលមានប្រវត្តិប្រកួតឈ្នះគេ៥៦លើក ចាញ់៥លើកស្មើ២លើក និងផ្តួលគូប្រកួតឲ្យសន្លប់៣៨លើក និយាយរួចហើយមុនការប្រកួតនៅរាត្រីថ្ងៃសៅរ៍នេះ នៅលើសង្វៀន Venetian Hotel របស់ទីក្រុងម៉ាកាវប្រទេសចិន ថា លោកនឹងមិនធ្វើឲ្យទស្សនិកជនខកបំណងនោះឡើយ ពេលគាត់ជួបជាមួយកីឡាករមិនដែលមានប្រវត្តិចាញ់គេ Chris Algieri ដោយធ្លាប់បានឈ្នះគូប្រកួតទាំង២១លើក និងផ្តួលគូប្រកួតឲ្យសន្លប់៨លើក មកពីអាមេរិកម្នាក់នេះ។
យ៉ាងណាមិញ មិនមានអ្នកនិយាយច្រើននោះទេ ចំពោះលទ្ធភាពនៃការផ្តួលគូប្រកួតឲ្យសន្លប់ពីសំណាក់កីឡាករហ្វីលីពីនម្នាក់នេះ ខណៈដែលគូប្រកួតរបស់គាត់លើកនេះគឺជាកីឡាករម្នាក់ដែលធ្លាប់ផ្តួលគូប្រកួតជើងខ្លាំងរាប់មិនភ្លេច។ ប្រិយមិត្តមួយចំនួន បានលើកឡើងថា លោក Pacquiao លែងរហ័សរហួនដូចកាលពីមុនទៀត ពោលគឺបន្ទាប់ពីបរាជ័យជាមួយកីឡាករJuan Manuel Marquez និងកីឡាករ Timothy Bradley កាលពីអំឡុងឆ្នាំ២០១២ ជាហេតុធ្វើឲ្យភាគរយនៃការឈ្នះការប្រកួតលើកនេះរបស់គាត់ មានការធ្លាក់ចុះ។
ដោយឡែក កីឡាករ Chris Algieri វិញ ក្រោយពីយកឈ្នះកីឡាករ Ruslan Provodnikov រួចមកនោះ បានធ្វើឲ្យគេចាប់អារម្មណ៍នឹងសមត្ថភាពប្រកួតនៅលើសង្វៀនរបស់គាត់ ថ្វីត្បិត តែមានទស្សនិកជនភាគតិច ធ្លាប់បានស្គាល់គាត់ក៏ដោយ។ ដោយធ្លាប់មានបទពិសោធន៍ ឡើងប្រកួតក្បាច់គុណការ៉ាតតេ និងកីឡាកាស តាំងពីគាត់មានអាយុ១៥ឆ្នាំមកម្ល៉េះនោះ គេជឿជាក់ថា ការប្រកួតជាមួយជើងខ្លាំងដូចជាកីឡាករ Pacquiao កីឡាករវ័យ៣០ឆ្នាំម្នាក់នេះ នឹងមិនធ្វើឲ្យទស្សនិកជនខកបំណងឡើយនឹងស្តាយល៍ និងតិចនិកប្រកួតរបស់គាត់។
ពេលជួបជាមួយ Pacquiao នៅរាត្រីថ្ងៃសៅរ៍នេះ កីឡាករ Algieri ប្រហែលជាមិនភ្លេចទេ ចំពោះការប្រើប្រាស់ស្នៀត និងក្បាច់ពិសេសរបស់គាត់ ដែលគាត់បានប្រើពេលយកឈ្នះកីឡាករ Provodnikov ម្យ៉ាងវិញទៀត ស្ថិតក្នុងកម្ពស់១.៧៨ម៉ែត្រ គឺមានប្រៀបខ្លាំង លើគូប្រកួត Pacquiaoដែលមានកម្ពស់ត្រឹមតែ១.៦៩ម៉ែត្រតែប៉ុណ្ណោះ។
ទោះបីជាយ៉ាងណាក៏ដោយ លទ្ធផលនឹងដឹងច្បាស់នៅរាត្រីថ្ងៃសៅរ៍នេះ ថាតើ អ្នកប្រដាល់ Pacquiao ឬ Algieriដែលជាអ្នកសន្លប់ ឬក៏បរាជ័យនៅលើសង្វៀន Venetian Hotel របស់ទីក្រុងម៉ាកាវ ប្រទេសចិន។
*ជីវប្រវត្តិសង្ខេបរបស់លោក Manny Pacquiao
លោក Manny Pacquiao កើតនៅថ្ងៃទី ១៧ ខែមេសា ឆ្នាំ១៩៧៨នៅក្នុងខេត្តគីបាវ៉េ ប្រទេសហ្វីលីពីន ហើយលោកក៏ជាកូនទី៤ក្នុង ចំណោមបងប្អូន៦នាក់។ "ពុកម្តាយរបស់ ប៉ាកគីអៅ បានលែងលះគ្នាតាំងពីពីលោករៀន ថ្នាក់ទី៦មកម្ល៉េះ។ កាលនៅរៀនបឋមសិក្សា លោក Pacquiao មិនសូវបានរៀនទៀងទាត់ដូច សិស្ស ឯទៀតនោះទេ ដោយសារតែជីវភាពគ្រួសារ លោកក្រីក្រពេក។ លោកបានចេញពីផ្ទះ នៅអាយុ១៤ឆ្នាំ ដោយសារតែម្តាយរបស់ លោកដែលមានកូន៦នាក់នៅក្នុងបន្ទុកនោះ គ្មានលទ្ធភាពចិញ្ចឹមគ្រួសារ។ ពេលនោះហើយ ដែលលោក ប៉ាកគីអៅបានធ្វើចំណាកស្រុកទៅ កាន់ទីក្រុងម៉ានីឡា ជាកន្លែងដែលលោករស់ នៅតាមចិញ្ចើមថ្នល់និងរកព្រឹកខ្វះល្ងាចនោះ តែក៏ជាទីកន្លែងដែលលោកចាប់ផ្តើមហាត់ ប្រដាល់ផងដែរ។
ក្នុងអាជីពជាអ្នកប្រដាល់ លោក Pacquiao បានកសាងកេរ្តិ៍ឈ្មោះច្រើន ទាំងនៅ លើសង្វៀនប្រដាល់អន្តរជាតិ និងនៅលើឆាកនយោបាយក្នុងប្រទេសហ្វីលីពីន។ ជាក់ស្តែងនៅឆ្នាំ ២០១០ លោកក៏ទទួលបានការ ជ្រើសតាំងជាអភិបាលខេត្តសារ៉ានកានី បន្ទាប់ពីគណបក្សសេរីនិយមរបស់ លោកបានឈ្នះឆ្នោត។ ក្រៅពីអាជីពជាអ្នកប្រដាល់ និងអ្នកនយោបាយ លោកPacquiao ក៏ជាតារាសម្តែង និងចម្រៀងមួយ រូបផងដែរ។ លោក ប៉ាក់គីអៅ មានភរិយា ឈ្មោះម៉ារៀ ហ្គេរ៉ាឌីន ហើយពួកគេមានកូន ៤នាក់ ស្រី២ប្រុស២។
*ជីវប្រវត្តិសង្ខេបរបស់លោក Chris Algieri
លោក Chris Algieri កើតនៅថ្ងៃទី២ ខែមីនា ឆ្នាំ១៩៨៤ នៅទីក្រុង Huntingtonរដ្ឋញូវយ៉ក សហរដ្ឋអាមេរិក ក្នុងគ្រួសារដែលមានដើមកំណើតជាជនជាតិអ៊ីតាលី និងអាហ្សង់ទីន។ លោកបានបញ្ចប់ថ្នាក់បរិញ្ញាប័ត្រផ្នែកវិទ្យាសាស្ត្រសុខាភិបាលពីសាកលវិទ្យាល័យ Stony Brook University និងបានបញ្ចប់ថ្នាក់អនុបណ្ឌិតនៅសាលា New York Institute of Technology។ លោក Algieriចាប់អារម្មណ៍ខ្លាំងនឹងការងារសុខាភិបាលរបស់គាត់ និងបានបញ្ចូលបទពិសោធន៍ ជាអត្តពលិករបស់គាត់ជាមួយនឹងមុខជំនាញមួយនេះ ហើយលោកបានចាប់ផ្តើមការងារប្រដាល់របស់លោកតាំងពីលោកមានអាយុ១០ឆ្នាំមកម្ល៉េះ៕
