ភ្នំពេញ ៖ យោងតាមប្រភពព័ត៌មានច្បាស់ការ ពីសមាជិកគណៈកម្មាធិការអចិន្ត្រៃយ៍រដ្ឋសភាបានឱ្យដឹងថា បើទោះបី ជាគណបក្សសង្គ្រោះជាតិ មិនទាន់ចូលប្រជុំរដ្ឋសភាក៏ដោយ ក៏រដ្ឋសភាដែលសព្វថ្ងៃមានកែសមាជិកមកពីគណបក្ស ប្រជាជនកម្ពុជា និងកោះប្រជុំវិសាមញ្ញ នៅព្រឹកថ្ងៃព្រហស្បតិ៍ ទី ០៧ ខែសីហា ដើម្បីស្តាប់នូវការឆ្លើយបំភ្លឺរួមគ្នា របស់រដ្ឋមន្ត្រីចំនួន ០៣រូប ។
រដ្ឋមន្ត្រីទាំង ៣រូបនោះ រួមមាន លោក សាយ សំអាល់ រដ្ឋមន្ត្រីក្រសួងបរិស្ថាន លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោក អ៊ុក រ៉ាប៊ុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ។
បើតាមប្រភពខាងលើ បានឱ្យដឹងទៀតថា អង្គប្រជុំរដ្ឋសភា និងសួរដេញដោល រដ្ឋមន្ត្រីទាំងបី អំពិវិស័យ ទទួលខុសត្រូវតាមក្រសួងជំនាញនីមួយៗពិសេសពាក់ព័ន្ធ និងការកែទម្រង់ស៊ីជម្រៅរយៈពេល ១ឆ្នាំកន្លងមក បន្ទាប់ពីបង្កើតរដ្ឋាភិបាលអាណត្តិថ្មី ។
ក្នុងនោះ មានបញ្ហាការកាប់ឈើ និងការកសាងទំនប់វ៉ារីអគ្គិសនីសេសានក្រោម ២ នៅខេត្តស្ទឹងត្រែងក៏ជារបៀបវារៈមួយ ក្នុងការសួរដេញដោលលើរដ្ឋមន្ត្រីក្រសួងទាំងបីរូបផងដែរ ។
គួរបញ្ជាក់រំលឹកផងដែរថា ក្នុងពេលថ្មីៗកន្លងទៅនេះ រដ្ឋសភាជាតិបានបើកវេទិកាដេញដោលសួរឆ្លើយម្តង រួចមកហើយជាមួយលោក ស៊ុយ សែម រដ្ឋមន្ត្រីក្រសួងរ៉ែ និងថាមពល អំពីគម្រោងសាងសង់ទំនប់វ៉ារី អគ្គិសនីសេ សានក្រោម ២ នៅខេត្តស្ទឹងត្រែង ។ កាលណោះគេនៅចាំបានថា លោករដ្ឋមន្ត្រី ស៊ុយ សែម បានលើកឡើងថា គម្រោងទំនប់វ៉ារីអគ្គិសនីសេសាន្តក្រោម ២ មានតម្លៃ ជិត ១.០០០លានដុល្លារនោះ បានផ្តល់ផលចំណេញច្រើនជាង ផលអវិជ្ជមាន ។
រីឯការលើកឡើងពាក់ព័ន្ធនឹងការកាប់ឈើ និងផលប៉ះពាល់នានា ជាការទទួលខុសត្រូវគ្រប់គ្រងរបស់ក្រសួង បរិស្ថាន និងក្រសួងកសិកម្ម ៕
