ថៃ៖ក្រុមប្រឹក្សា ជាតិដើម្បីសណ្តាប់ធ្នាប់និងសន្តិភាពនៃរដ្ឋាភិបាលយោធាថៃ នៅថ្ងៃព្រហស្បតិ៍នេះបានថ្លែងអំណរគុណដល់រដ្ឋាភិបាលកម្ពុជាដែលបាន ដោះលែងសកម្មជនយោបាយជនជាតិថៃម្នាក់កាលពីថ្ងៃទី០១ខែកក្កដា។
អ្នកនាំពាក្យក្រុមប្រឹក្សាជាតិដើម្បីសណ្តាប់ធ្នាប់និងសន្តិភាពនៃ រដ្ឋាភិបាលយោធាថៃលោក Colonel Winthai Suwari ថ្លែងថាថៃបានផ្ញើលិខិតថ្លែងអំណរគុណដល់រដ្ឋាភិបាលកម្ពុជាករណីលើកលែង ទោសដល់លោក វីរ៉ា ស៊ុំក្វាមឃីត (Veera Somkwamkid) ជាសកម្មជននយោបាយដែលជាប់ពន្ធនាគារនៅកម្ពុជាជាង៣ឆ្នាំមក។តែលោក បញ្ជាក់ថា ករណីដោះលែងលោក វីរ៉ា ស៊ុំក្វាមឃីតមិនមែនជាការដោះដូរអ្នកទោសជាមួយកម្ពុជាទេ។នេះបើតាម បណ្តាញសារព័ត៌មានថៃ NNT។
រដ្ឋមន្ត្រីការបរទេសស្តីទី នៃរដ្ឋាភិបាលយោធាថៃលោក Sihasak Phuangketkaew ដែលបានបំពេញទស្សនកិច្ចនៅកម្ពុជាកាលពីថ្ងៃទី៣០ខែមិថុនា ហើយបានជួបលោក នាយករដ្ឋមន្ត្រីហ៊ុន សែននិងរដ្ឋមន្ត្រីការបរទេសកម្ពុជាលោក ហោ ណាំហុង នោះបញ្ជាក់ថាការស្នើសុំលើកលែងទោសដល់លោក ស៊ុំក្វាមឃីតគឺផ្អែកទៅតាមច្បាប់របស់កម្ពុជា មិនមែនជាការដោះដូរអ្វីទេ ៕
