ភ្នំពេញ ៖ នៅក្នុងការជួបសន្ទនាដោយផ្ទាល់ជាមួយឯកឧត្តម បាន គីមូន អគ្គលេខាធិការអង្គការសហប្រជាជាតិ នៅក្រៅកិច្ចប្រជុំកំពូលអាស៊ាន លើកទី២៥ នៅទីក្រុងណៃពីដោ សម្តេចអគ្គមហាសេនាបតីតេជោ ហ៊ុន សែន បានបង្ហាញនូវឆន្ទៈក្នុងការដោះស្រាយប្រាក់បៀវត្សរបស់បុគ្គលិកនៃសាលាក្តីខ្មែក្រហមភាគីកម្ពុជាសម្រាប់ចុងឆ្នាំ២០១៤នេះ។
បេសកជនពិសេសរបស់ទូរទស្សន៍ជាតិកម្ពុជារាយការណ៍ ពីប្រ ទេសមីយ៉ាន់ម៉ាមកថា ក្នុងជំនួបពិភាក្សាគ្នានោះ សម្តេចតេជោនាយករដ្ឋមន្ត្រីបានជម្រាបជូនឯកឧត្តមអគ្គលេខាធិការអង្គការសហប្រជាជាតិ ពីការសម្រេចរបស់រាជរដ្ឋាភិបាលកម្ពុជា ក្នុងការជួយឧបត្ថម្ភថវិកាចំ នួន១.១៥០.០០០ដុល្លាអាម៉េរិក ក្នុងការដោះស្រាយប្រាក់បៀវត្សជូន ដល់បុគ្គលិក នៃសាលាក្តីខ្មែរក្រហមនៃភាគីកម្ពុជាសម្រាប់ខែតុលា វិច្ឆិកា និងខែធ្នូឆ្នាំ២០១៤ ។ ជាមួយគ្នានេះសម្តេចតេជោក៏បានធានាអះអាងនៅចំពោះមុខឯកឧត្តមអគ្គលេខាធិការអង្គការសហប្រជាជាតិទៀតថា រាជរដ្ឋាភិបាលកម្ពុជានឹងបន្តដោះស្រាយប្រាក់បៀវត្សសម្រាប់ បុគ្គលិកភាគីកម្ពុជា នៃសាលាក្តីខ្មែរក្រហមសម្រាប់រយៈពេល៦ខែក្នុង ឆ្នាំ២០១៥ខាងមុខបន្តទៀត។
បេសកជនពិសេសរបស់ទូរទស្សន៍ជាតិកម្ពុជាបានបញ្ជាក់ថា ឯកឧត្តម បាន គីមូន មានប្រសាសន៍ថ្លែងនូវអំណរគុណចំពោះសម្តេចតេ ជោនាយករដ្ឋមន្ត្រី និងរាជរដ្ឋាភិបាលកម្ពុជាចំពោះការខិតខំដោះស្រាយដល់ការលំបាករបស់បុគ្គលិក នៃសាលាក្តីកាត់ទោសមេដឹកនាំខ្មែរក្រហមប្រកបដោយប្រសិទ្ធភាពខ្ពស់បំផុត ។
ជាមួយគ្នានេះភាគីទាំងពីរ ក៏បានពិភាក្សាគ្នាយ៉ាងយកចិត្តទុក ដាក់ទៅលើបញ្ហាតំបន់ និងអន្តរជាតិដែលមានការយកចិត្តទុកដាក់ដូចគ្នា៕