ភ្នំពេញ៖នាយករដ្ឋមន្ត្រីកម្ពុជា នៅថ្ងៃព្រហស្បតិ៍នេះ អះអាងថា ការដែលកម្ពុជាដោះលែងអ្នកទោសថៃនោះ មិនមែនជាថ្នូរនឹងការដែលកម្ពុជា ស្នើឲ្យរដ្ឋាភិបាលយោធថៃ ដោះលែងពលរដ្ឋខ្មែរ១៤នាក់ ដែលត្រូវបានថៃចាប់ខ្លួនពីបទប្រើលិខិតក្លែងក្លាយនោះទេ ។
បើតាមកាសែតបាងកកប៉ុស្តិ៍ ពលរដ្ឋខ្មែរចំនួន១៤នាក់ ត្រូវបានដោះលែងវិញ បន្ទាប់ពីទណ្ឌិតជនជាតិថៃ លោក វីរ៉ា ស៊ុំក្វាមឃីត (Veera Somkwamkid) ត្រូវបានព្រះមហាក្សត្រកម្ពុជាលើកលែង និងត្រូវបានដោះលែងកាលពីថ្ងៃអង្គារ។
កាសែតនេះ បានដកស្រង់សំដី អគ្គនាយករងនៃនាយកដ្ឋានអប់រំកែប្រែនៃប្រទេសថៃ លោក Kobkiat Kasivivat មកផ្សាយថា ការដោះលែងនោះ ដោយមានការស្នើសុំពីនាយករដ្ឋមន្ត្រីកម្ពុជា ខណៈដែលក្រោយការស៊ើបអង្កេតលើពលរដ្ឋខ្មែរទាំងនោះ ពួកគេមិនមានកំហុស។
កាលពីខែកុម្ភៈ ឆ្នាំ២០១៣ រដ្ឋាភិបាលកម្ពុជា បានដោះលែងអ្នកទោសថៃម្នាក់ដែរ គឺអ្នកស្រី រ៉ាទ្រី ពីតាណាប៉ៃប៊ូន។ ជនជាតិថៃទាំងពីរ ត្រូវបានចាប់ខ្លួននៅខេត្តបន្ទាយមានជ័យ កាលខែធ្នូ ឆ្នាំ២០១០ ពីបទចារកម្ម នៅពេលពួកគេឆ្លង ចូលបន្ទាយទាហានកម្ពុជា៕
