កំពង់ឆ្នាំងៈ យ៉ាងហោចណាស់ក៏មានមនុស្សចំនួន១៥នាក់ បានស្លាប់ និង៥៦នាក់ផ្សេងទៀត បានរងរបួសធ្ងន់ស្រាល និងបង្កឲ្យខូចខាតរថយន្ត ម៉ូតូគោយន្ត សរុបចំនួន៥៥គ្រឿង ក្នុងករណីគ្រោះថ្នាក់ចរាចរណ៍រយៈពេល១ខែ គិតចាប់ពីថ្ងៃទី១៥ ខែកញ្ញា ដល់ថ្ងៃទី២៧ ខែតុលា ឆ្នាំ២០១៤ នៅខេត្តកំពង់ឆ្នាំ។ នេះបើយោងតាមរបាយការណ៍របស់ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បង្ហាញឲ្យដឹងនៅថ្ងៃទី៣០ ខែតុលា ឆ្នាំ២០១៤។
តាមរបាយការណ៍របស់ការិយាល័យនគរបាលចរាចរណ៍ផ្លូវគោកខេត្ត បានឲ្យដឹងថា គ្រោះថ្នាក់ចរាចរណ៍ក្នុងខែនេះ បានកើនឡើងចំនួន១៩លើក ដោយបានបង្កឲ្យមនុស្សស្លាប់ ចំនួន១៥នាក់ (ស្រី២នាក់) កើនឡើងលើខែចាស់៨នាក់ បង្កឲ្យរងរបួសធ្ងន់ស្រាល សរុបចំនួន៥៦នាក់ ក្នុងនោះរបួសធ្ងន់២៩នាក់(ស្រី៨នាក់) រងរបួសស្រាល២៧នាក់(ស្រី៧នាក់), ខូចខាតរថយន្តរួម១៦គ្រឿង (ខូចធ្ងន់៤គ្រឿង) ខូចខាតម៉ូតូ៣៧គ្រឿង (ធ្ងន់៧គ្រឿង)។
នៅក្នុងគ្រោះថ្នាក់ចរាចរណ៍ខាងលើ បានកើតឡើងនៅលើផ្លូវជាតិលេខ៥ ចំនួន១៧លើក, លើផ្លូវលេខ១៥៣A ចំនួន២លើក, លើផ្លូវលេខ១៥០ ចំនួន១លើក, លើផ្លូវក្រាលកៅស៊ូក្នុងខេត្ត ២លើក, លើផ្លូវជាតិលេខ៥៣ ចំនួន៣លើក និងនៅលើផ្លូវក្រាលគ្រួសក្រហម ចំនួន៩លើក។
ក្នុងនោះ បានកើតឡើងនៅស្រុកសាមគ្គីមានជ័យ ចំនួន៣ករណី, ស្រុកកំពង់ត្រឡាច ១២ករណី, ស្រុករលាប្អៀរ ៦ករណី, ស្រុកទឹកផុស ៤ករណី, ស្រុកកំពង់លែង ៣ករណី និងក្រុងកំពង់ឆ្នាំង២ករណី។ គ្រោះថ្នាក់ចរាចរណ៍នេះ បានកើតឡើងរវាងរថយន្ត និងរថយន្ត ៣លើក, រថយន្ត និងម៉ូតូ ១១លើក, រថយន្ត និងថ្មើជើង២លើក, ម៉ូតូ និងម៉ូតូ ៩លើក, ម៉ូតូ និងថ្មើជើង ៥លើក, ម៉ូតូ និងគោយន្ត១លើក, ម៉ូតូគ្រោះថ្នាក់ចៃដន្យ ២លើក, និងគោយន្តចៃដន្យ១លើ។
ក្នុងករណីគ្រោះថ្នាក់ចរាចរណ៍ទាំង៣៤ករណី គឺកើតឡើងដោយសារបើកបរហួសល្បឿនកំណត់ ១២ករណី, បើកបរមិនគោរពសិទ្ធិអទ្ឋិភាព ១២ករណី, បើកបរប្តូរគន្លងមិនប្រយ័ត្ន៤ករណី និងបើកបរជែងក្នុងស្ថានភាពគ្រោះថ្នាក់ ៣ករណី, កំហុសប្រើប្រាស់ភ្លើងហ្វា១ករណី និងកត្តាយានយន្ត(ដាច់កង់)២ករណី។
ករណីគ្រោះថ្នាក់ចរាចរណ៍ក្នុងរយៈពេល១ខែកន្លងមកនេះ មានការកើនឡើងគួរឲ្យបារម្ភ ដែលគេសង្កេតឃើញថា អ្នកដែលបង្កគ្រោះថ្នាក់ដល់អាយុជីវិតអ្នកដទៃនៅក្នុងខេត្តកំពង់ឆ្នាំង តែងតែបាននៅក្រៅឃុំមិនដែលមានអ្នកណាម្នាក់ ត្រូវជាប់ពន្ធនាគានោះឡើយ។ នេះក៏ជាកត្តាមួយដែលធ្វើឲ្យអ្នកបើកបរមួយចំនួននៅតែព្រហើនមិនគោរពច្បាប់ចរាចរណ៍ឲ្យតែមានលុយបង់បន្តិចបន្តួច គឺអាចរួចខ្លួនរហូត៕ សេដ្ឋការ
