ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ទៅចូលរួមកិច្ចសន្ទនា ដើម្បីពង្រឹងភាពជាដៃគូ នៃការតភ្ជាប់ និងកិច្ចប្រជុំកំពូលនាយកប្រតិបត្តិ នៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ឆ្នាំ២០១៤ (APEC CEO Summit 2014) រយៈពេល៣ ថ្ងៃនៅទីក្រុងប៉េកាំង សាធារណរដ្ឋប្រជាមានិតចិន នេះបើយោងតាមព័ត៌មានពីក្រសួងការបរទេស។
តាមសេចក្តីជូនដំណឹងនោះបានឲ្យដឹងថា តាមការអញ្ជើញរបស់លោក ស៊ី ជិនពីង ប្រធានាធិបតីសាធារណរដ្ឋប្រជាមានិតចិន និងលោក ជាង ហ្សេងវ៉ៃ (Jiang Zengwei) ប្រធានគណៈ កម្មាធិការរៀបចំកិច្ចប្រជុំកំពូលនាយកប្រតិបត្តិ នៃកិច្ចសហប្រតិបត្តិកាសេដ្ឋកិច្ចអាស៊ីប៉ាស៊ីហ្វិក ឆ្នាំ២០១៤ (APEC CEO Summit 2014) ក្រុមប្រឹក្សាជំរុញពាណិជ្ជកម្មអន្តរជាតិនៃប្រទេសចិន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់ទៅចូលរួមកិច្ចសន្ទនា ដើម្បីពង្រឹងភាពជាដៃគូ នៃការតភ្ជាប់និងកិច្ចប្រជុំកំពូលនាយកប្រតិបត្តិ នៃកិច្ចសហប្រតិបត្តិកាសេដ្ឋកិច្ចអាស៊ីប៉ាស៊ីហ្វិក ឆ្នាំ២០១៤ (APEC CEO Summit 2014) ចាប់ពីថ្ងៃទី៧ ដល់ថ្ងៃទី៩ ខែវិច្ឆិកា ឆ្នាំ២០១៤ នៅបប្រទេសចិន។
សេចក្តីជូនព័ត៌មានរបស់ក្រសួងការបរទេសចុះថ្ងៃទី៣ ខែវិច្ឆិកា ឆ្នាំ២០១៤ បានឲ្យដឹងដែរថា គណៈប្រតិភូអមដំណើររួមមាន លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន និងសមាជិកដទៃទៀត នៃរាជរដ្ឋាភិបាលកម្ពុជា។ កិច្ចសន្ទនាដើម្បីពង្រឹងភាពជាដៃគូនៃការតភ្ជាប់ នឹងពិភាក្សាអំពីកាលានុវត្តភាព និងភាពប្រឈមសម្រាប់កិច្ចសហប្រតិបត្តិការ ឲ្យកាន់តែជិតស្និទ្ធអំពីការតភ្ជាប់ក្នុងតំបន់ ព្រមទាំងរិះរកដំណោះស្រាយ និងមធ្យោបាយធ្វើឲ្យជឿនលឿនកិច្ចសហប្រតិបត្តិការស្តីពី គំនិតផ្តួចផ្តើមនៃ "ខ្សែក្រវាត់សេដ្ឋកិច្ចវិថីសូត្រ" និង "វិថីសូត្រសមុទ្រសម្រាប់សតវត្សរ៍ ទី២១"។ រីឯកិច្ចប្រជុំកំពូលនាយកប្រតិបត្តិនៃកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក និងផ្លាស់ប្តូរទស្សនៈលើប្រធានបទជាគន្លឹះដូចជា សមាហរណកម្មសេដ្ឋកិច្ចក្នុងតំបន់ការអភិវឌ្ឍន៍តាមបែបបង្កើតថ្មី និងការតភ្ជាប់ក្រោមប្រធានបទ «ចក្ខុវិស័យថ្មី សម្រាប់តំបន់អាស៊ីប៉ាស៊ីហ្វិក ជាអាទិ៍ ការច្នៃប្រឌិតការតភ្ជាប់សមាហរណកម្ម និងវិបុលភាព»។
សេចក្តីជូនព័ត៌មានលើកឡើងទៀតថា ក្រៅពីនេះសម្តេចអគ្គមហាសេនាបតីតេជោ ហ៊ុន សែន នឹងជួបពិភាក្សាទ្វេភាគីដាច់ដោយឡែកជាមួយ លោក ស៊ី ជិនពីង ប្រធានាធិបតីសាធារណរដ្ឋប្រជាមានិតចិន និងលោក លី យ៉ុនចាវ ( Li Yuanchao )អនុប្រធានាធិបតីសាធារណរដ្ឋប្រជាមានិតចិន និងទទួលជួបលោក វង់ ចែវរ៉ុយ អនុប្រធានគណៈកម្មាធិការជាតិនៃសភាពិគ្រោះនយោបាយប្រជាជនចិន និងជារដ្ឋមន្ត្រីគណៈទំនាក់ទំនងអន្តរជាតិ នៃគណៈមជ្ឈឹមបក្សកុម្មុយនីស្តចិន៕