ភ្នំពេញ ៖ កាលពីព្រឹកថ្ងៃទី៣០ ខែតុលា ឆ្នាំ ២០១៤ នេះ នៅក្នុងសាលប្រជុំ នៃសាលាខណ្ឌឫស្សីកែវ បានបើកវេទិកាផ្សព្វផ្សាយ និងពិគ្រោះយោបល់របស់ ក្រុមប្រឹក្សាខណ្ឌឫស្សីកែវ អាណត្តិទី០២។
ចូលរួមនាឱកាសនោះលោក វ៉ាន់ សាលី ប្រធាន ក្រុមប្រឹក្សាខណ្ឌឫស្សីកែវ លោកស្រី លី រ៉ូហ្សាមី អភិបាលរងខណ្ឌ,លោកលីន ញ៉ក់ អភិបាលរងខណ្ឌ សមាជិកក្រុម ប្រឹក្សាខណ្ឌ និងអស់លោក លោកស្រី ចំណុះឱ្យសាលាខណ្ឌជាច្រើនរូបទៀត។ ជាកិច្ចចាប់ផ្តើម លោក នាក់ បូ បានឡើងអានបទបញ្ជាផ្ទៃក្នុង ដែលមានចំនួន០៨ចំណុចដើម្បីឱ្យអង្គពិធីបានយល់និងជ្រាបក្នុងពិធីផ្សព្វផ្សាយ និងពិគ្រោះយោបល់នេះ។
ជាមួយគ្នានោះដែរ អ្នកដែលចូលរួមអាចមានយោបល់ ដើម្បីពិគ្រោះដោយលើកដៃមានរយៈពេលត្រឹមតែ០៥នាទីសម្រាប់០១នាក់ ដែលបានទទួលការអនុញ្ញាតពីអ្នកសម្របសម្រួល ដើម្បី មានមតិយោបល់ដែលបានលើកឡើងជាបន្តបន្ទាប់។
លោកវ៉ាន់ សាលី ប្រធាន ក្រុមប្រឹក្សាខណ្ឌបានលើកឡើងថា យើងផ្ដល់ឱ្យក្រុមប្រឹក្សាខណ្ឌនូវនីតិវិធី និងជាឧបករណ៍មួយសម្រាប់លើកកម្ពស់គណនេយ្យភាព តម្លាភាពផ្ដល់ជូនដល់ ប្រជា ពល រដ្ឋក្នុងការចូលរួម និងក្នុងដំណើរការអភិបាលកិច្ចរបស់ក្រុមប្រឹក្សា នៃរដ្ឋបាលខណ្ឌ។ លោកបានបន្តទៀតថា វេទិកាផ្សព្វផ្សាយពិគ្រោះយោបល់គឺជាការផ្ដល់ឱកាសជូនប្រជាពលរដ្ឋបានប្រាស្រ័យទាក់ទងគ្នាទៅវិញទៅមករវាង រដ្ឋបាលខណ្ឌជាមួយរដ្ឋបាលសង្កាត់ នឹង ប្រជាពលរដ្ឋតំណាងសង្គមស៊ីវិល វិស័យឯកជន ដោយលើកជាសំណួរ និងសំណូមពរពាក់ព័ន្ធបញ្ហាផ្សេងៗ ដែលកើតឡើងក្នុងមូលដ្ឋានជូនក្រុមប្រឹក្សា ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់ធ្វើ ការដោះស្រាយ និងបកស្រាយបំភ្លឺទៅតាមជំនាញដែលមានការពាក់ព័ន្ធ។
លោក វ៉ាន់ សាលី បានបញ្ជាក់ទៀតថា ប្រធានបទដែលត្រូវលើកដាក់ក្នុងវេទិកាផ្សព្វផ្សាយពិគ្រោះយោបល់នាថ្ងៃនេះមានចំនួន០៣ប្រធានបទ ១-ការងារការពារសន្តិសុខសណ្ដាប់ធ្នាប់ និងរបៀបរៀបរយសាធារណៈ,២-ស្ថានភាពនៃការអភិវឌ្ឍមូលដ្ឋានរបស់រដ្ឋបាលខណ្ឌឫស្សីកែវ និង៣-ការងារបរិស្ថាន។
លោក វ៉ាន់ សាលី ក៏សង្ឃឹមថាក្រុមប្រឹក្សាខណ្ឌឫស្សីកែវ អាណត្តិទី០២នេះនឹងអនុវត្តបានល្អនូវខ្លឹមសារនៃការផ្សព្វផ្សាយ និងពិគ្រោះយោបល់នេះ៕