ក្រចេះ ៖ ក្នុងរយៈពេលមួយសប្ដាហ៍ មុនព្រះរាជពិធីបុណ្យអុំទូក ដែលនៅតាមបណ្តាខេត្ត មួយចំនួនបានរៀបចំដឹកនាំទូកទៅប្រណាំង នៅរាជធានីភ្នំពេញនោះ ក្រុមឈ្មួញជាច្រើននៅខេត្តក្រចេះ បានឆ្លៀតយកឱកាសនេះទៅធ្វើអាជីវកម្មដឹកឈើខុសច្បាប់យ៉ាងគគ្រឹកគ្រេង តាមដងទន្លេមេគង្គ លើស្ថិតក្នុងស្រុកសំបូរ។
ជាក់ស្តែងកាលពីថ្ងៃទី០២ ខែវិច្ឆិកានេះ ក្រុមឈ្មួញបានធ្វើសកម្មភាពដឹកជញ្ជូនឈើអារ ដោយលួចបង្កប់ ឈើប្រណិតដែលជាប្រភេទឈើធ្នង់ខុសច្បាប់ យកលេសថា ជាទូក អូសទូកងទៅប្រណាំងនៅឯទីក្រុងភ្នំពេញ ហើយឈើទាំងនេះត្រូវបានគេដឹងថា មានក្រុមឈ្មួញជាច្រើនដែលត្រូវបានគេដឹងថា សុទ្ធសឹងជាមន្ត្រីអ្នកមានមុខមាត់ធំ នៅស្រុកសំបូរ ក្នុងនោះមានទាំងគ្រូបង្រៀនម្នាក់ឈ្មោះ គ្រូ ព្រលឹង ជាអ្នករាប់រងចេញមុខក្នុងចំណោម បក្សពួកគេបានប្រើប្រាស់ទូកធំដោយមានផ្ទុកឈើអាលេខ១ ពេញប្រៀប។ ដោយសារ ការផ្ទុកខ្លាំងលើសចំណុះក៏ទៅបុកជាមួយ នឹងគោលថ្ម កណ្តាលទន្លេ ជាប់ទៅមុខលែងរួច ពេញមួយថ្ងៃ ពុំមានការរំខានដល់ភ្នែក សមត្ថកិច្ចជំនាញឬមន្ត្រីពាក់ព័ន្ធ ឡើយ ក្នុងនោះមានមន្ត្រីរដ្ឋបាលព្រៃឈើ សង្កាត់រដ្ឋបាល ព្រៃវឌ្ឍនៈ នៃផ្នែករដ្ឋបាលព្រៃឈើ ព្រែកប្រសព្វ បានចុះទៅពិនិត្យមើលដែរ តែគ្មានវិធានការបន្តិចសោះឡើយ ដោយបណ្ដោយអោយឈ្មួញឈើដឹកដោយរលូន។
ប្រភពពីមន្ត្រីម្នាក់បានលួចខ្សឹបប្រាប់អ្នករាយការណ៍ថា ទូកដឹកឈើខុសច្បាប់ខាងលើ ត្រូវបានគេដឹងថា ក្រុមឈ្មួញបានប្រមូលទិញឈើប្រណិតនិងឈើអារ ស្តុកទុកជាច្រើនថ្ងៃមកហើយ ដោយដឹកតាមទូក ត្រៀមទុកនៅក្នុងទឹកដី ស្រុកសំបូរ និងស្រុកព្រែកប្រសព្វ បម្រុងដឹកចេញទៅទីក្រុងភ្នំពេញជាមួយទូក.ងតែសំណាងអាក្រក់បានបុកនិងគោលថ្មចាប់ពីម៉ោង៧ព្រឹករហូតពេញ១ថ្ងៃ។
មន្ត្រីរដ្ឋបាលព្រៃឈើម្នាក់ ឈ្មោះ លោក ថ្លាង ឡុង នាយរងសង្កាត់រដ្ឋបាលព្រៃ ឈើវឌ្ឍនៈ បានចុះទៅមើលទូកដឹកឈើខុសច្បាប់នោះ គ្រាន់តែអើតហើយត្រឡប់មកវិញ ដោយបណ្តោយឲ្យក្រុម ឈ្មួញយកកាណូតតូចជាច្រើនគ្រឿងទៅជញ្ជូនជម្លៀសចេញយ៉ាងគឃ្លើន។
ប្រជាពលរដ្ឋ ស្រុកសំបូរបានធ្វើការរិះគន់ ទៅលើជំនាញរដ្ឋបាលព្រៃឈើ វឌ្ឍនៈនិង ផ្នែកព្រែក ប្រសព្វ ថាជាអ្នកបើកដៃ និងសម្របសម្រួលអោយ ក្រុមឈ្មួញ ទើបពួកគេមិនហ៊ាន ចេញមុខទៅបង្ក្រាប ជំនួញឈើខុសច្បាប់នេះ។
គួរបញ្ជាក់ថា ទូកដឹកឈើទាំងនេះ កាលពីថ្ងៃ ៣០ ខែតុលា ទូកមួយគ្រឿងបានជាប់ខ្សាច់កណ្តាលទន្លេទៅមុខមិនរួចព្រោះតែផ្ទុកឈើលើសចំណុះ ហើយមន្ត្រីជំនាញ បានធ្វើកំណត់ហេតុឲ្យរើចុះវិញ និងដោះលែងឲ្យរួចម្តងមកហើយ ដោយឡែកថ្ងៃនេះទូករបស់ឈ្មួញឈ្មោះ គ្រូព្រលឹង ដដែល មិនត្រឹមតែមិនអនុវត្តតាមកំណត់ហេតុទេ ថែមទាំងបានទៅដាក់ឈើបន្ថែមពេញប្រៀបទៅវិញ។
ដោយឡែកស្រុកសំបូរគឺជាស្រុកមួយដែលមានបទល្មើសព្រៃឈើកើតឡើងជាអចិន្ត្រៃយ៍ ដែលមានទូក តូចធំដឹកជញ្ជូនមកស្តុកដើម្បីលើកដឹកតាមរថយន្ត ទៅលក់បន្តទៀតផង៕